ကလေးမြို့တောင်ပိုင်း နတ်ချောင်းရွာတွင် အကြမ်းဖက်စစ်ကောင်စီတပ်နှင့် ဒေသခံကာကွယ်ရေးတပ်တို့ကြား သုံးရက်ဆက်အဖြစ်တိုက်ပွဲပြင်းထန်နေကြောင်းဒေသခံများကပြောသည်။
ထိုတိုက်ပွဲတွင် ကလေးမြို့ ပြည်သူ့ကာကွယ်ရေးတပ်-တပ်ရင်း (၁) (PDF-ကလေး)နှင့် အခြားမဟာမိတ်တပ်များကအကြမ်းဖက်စစ်ကောင်စီတပ်ကို တွန်းလှန်တိုက်ခိုက်နေခြင်းဖြစ်သည်ဟု အဆိုပါတပ်ရင်းကထုတ်ပြန်ထားသည်။လက်ရှိ တိုက်ပွဲအခြေအနေများကြောင့် ကလေးမြို့တောင်ပိုင်းကို ခရီးသွားလာခြင်းမပြုရန်လည်းဒေသခံကာကွယ်ရေးတပ်များက အထူးသတိပေးထားသည်။
ယနေ့(မတ်၁၆ရက်)တွင် အကြမ်းဖက်စစ်တပ်ဘက်က လက်နက်ကြီးများအလွန်အကျွံအသုံးပြုတိုက်ခိုက်နေပြီး ကျေးရွာအချို့ကို မီးရှို့ခဲ့ကာ ဖုန်းလိုင်းနှင့်အင်တာနက်လိုင်းများကိုလည်း ဖြတ်တောက်ထားသည်ဟု ဒေသခံများကပြောသည်။
“စစ်တပ်ဘက်က PDFတွေကို မနက်ကတည်းကလက်နက်ကြီးတွေ စပစ်နေတာ၊ တချို့ရွာတွေကိုလည်း မီးရှို့နေတယ်၊ အသေးစိပ်ကတော့ သေချာမသိရသေး။”ဟု ကလေးမြို့ခံတစ်ဦးကပြောသည်။
Public Service Announcement
အကြမ်းဖက်စစ်ကောင်စီတပ်များသည် မတ် ၁၃ ရက်ကတည်းက ကလေးမြို့တောင်ပိုင်းကိုစစ်အင်အားအလုံးအရင်း ထိုးစစ် ဆင်ခဲ့ခြင်းဖြစ်သည်ဟု ဒေသခံအချို့ကပြောသည်။
ထိုနောက်မတ် ၁၄ ရက်မှစတင်ပြီးဒေသခံကာကွယ်ရေးတပ်များနှင့် အကြမ်းဖက်စစ်ကောင်စီတပ်တို့ကြား ထိတွေ့တိုက်ပွဲများဖြစ်ပွားခဲ့ခြင်းဖြစ်သည်။ အကြမ်းဖက်စစ်ကောင်စီတပ်က ကလေးမြို့တောင်ပိုင်းရှိ နတ်ချောင်းနှင့် နတ်မြောင်းရွာများကို စစ်ကြောင်းထိုးပြီး လူနေအိမ်များကိုပါ မီးရှို့ဖျက်စီးနေသည်ဟု ဒေသခံများကပြောသည်။
