ထိုင်းတောင်ပိုင်း၊ မြောင်ခရိုင်ထဲက ဖန်ခဆန်မ်အဝေးပြေးလမ်းမကြီးမှာ မြန်မာလုပ်သားတွေလိုက်ပါလာတဲ့ ပစ်ကပ်ကားဟာ ဒီနေ့မနက်ပိုင်းက လမ်းလယ်စည်းရိုးကိုဝင်တိုက်လို့ ၁၂ ဦးထိခိုက်ဒဏ်ရာရကာ ခြောက်ဦးသေဆုံးခဲ့တယ်လို့ သိရပါတယ်။
ဘန်ကောက်ဘက်ကိုအသွား ပစ်ကပ်ကားဟာ ဒီမနက် ပိုင်း ၃ နာရီလောက်က ယာဉ်မတော်တဆမှုဖြစ်ပွားခဲ့တာလို့ အမှုစစ် ရဲမှူးကြီးဆူသက်ဂျမီခွန် ပြောပါတယ်။
အနက်ရောင်ချဗလက်အမျိုးအစားပစ်ကပ်ကားဟာ အဝေးပြေးလမ်းမပေါ်က သတ္တုခြံစည်းရိုးကိုဝင်တိုက်မိတာပါ။
ဒီလိုတိုက်မိချိန်မှာ ကားပေါ်လိုက်ပါလာသူတွေ လွင့်စင်သွားပြီး ခြောက်ဦးသေဆုံးကာ ၁၂ ဦးထိခိုက်ဒဏ်ရာရသွားကာ ဒဏ်ရာရသူတွေထဲက ငါးဦးဟာ စိုးရိမ်ရတယ်လို့သိရပါတယ်။
Public Service Announcement
ခြံစည်းရိုးကိုဝင်တိုက်တဲ့ ပစ်ကပ်ကားကို အဖြူရောင်ဗင့်ကားတစ်စီးက နောက်ကနေဝင်တိုက်ပေမယ့် ဗင့်ကားပေါ်က တစ်ဦးတစ်ယောက်မျှ ထိခိုက်တာမရှိခဲ့ပါဘူး။
ယာဉ်တိုက်မှုမှာ ထိခိုက်ဒဏ်ရာရသူနဲ့သေဆုံးသူတွေဟာမြန်မာနိုင်ငံသားတွေဖြစ်ကာ ကချင်ပြည်နယ်က ဖြစ်တယ်လို့သိရပါတယ်။
ဒဏ်ရာရသွားသူတွေကိုတော့ ပါရာချက်ခင်ရီခန် ဆေးရုံကိုပို့ဆောင်ကုသပေးထားတယ်လို့သိရပါတယ်။
ပစ်ကပ်ကားဟာ ဘီးပေါက်ပြီး လမ်းလယ်ခြံစည်းရိုးကိုဝင်တိုက်တာလို့ ထိုင်းရဲက ဆိုထားပါတယ်။
စစ်တပ်က အာဏာသိမ်းပြီးတဲ့နောက် ပြည်တွင်းမှာ ဖမ်းဆီး၊ သတ်ဖြတ်နေတဲ့အခြေအနေတွေနဲ့ အလုပ်အကိုင်အခွင့်အလမ်းရှားပါနေတာကြောင့် ထိုင်းနိုင်ငံအတွင်း တရားမဝင်နည်းလမ်းကြောင်းနဲ့ မြန်မာရွေ့ပြောင်းလုပ်သားတွေ ဝင်ရောက်နေတာဖြစ်ပါတယ်။
ထိုင်းရောက်မြန်မာလုပ်သားများအရေး ကူညီဆောင်ရွက်ပေးနေတဲ့ မြန်မာအဖွဲ့အစည်းတွေရဲ့ ပြောကြားချက်အရ ထိုင်းနိုင်ငံကို နေ့စဉ် တရားမဝင်နည်းလမ်းနဲ့ ဝင်ရောက်လာနေတဲ့ မြန်မာနိုင်ငံသား ရာနှင့်ချီရှိနေပြီး အချို့က ထိုင်းစစ်တပ်နဲ့ ရဲတပ်ဖွဲ့တို့ရဲ့ ဖမ်းဆီးခံရမှုခံနေရတာပါ။
