ကချင်ပြည်နယ် ဗန်းမော်မြို့နယ်အတွင်း ပြည်သူ့ကာကွယ်ရေးတပ်(PDF)အမည်ခံ၍ ခြိမ်းခြောက်စာပေးခြင်း၊ ငွေတောင်းခံခြင်းနှင့် ငွေကြေးဆိုင်ရာ ခြိမ်းခြောက်မှုများ ပြုလုပ်နေသူများကို အမြန်ဆုံးဖော်ထုတ်အရေးယူမည်ဟု ဗန်းမော်မြို့နယ်ပြည်သူ့အုပ်ချုပ်ရေး(BTPA)က ယနေ့(မတ် ၁၈ ရက်) သတိပေးသည်။
ယခုကဲ့သို့ ခြိမ်းခြောက်စာများဖြင့် ပြုလုပ်နေမှုများသည် အမှန်တရား ဘက်တော်သား PDF အဖွဲ့များ၏ ဂုဏ်သိက္ခာ များစွာကျဆင်းစေရန် ရည်ရွယ်လုပ်ဆောင်ခြင်းဖြစ်သည်ဟု BTPA က ဆိုသည်။
ပြည်သူများအပေါ် ခြိမ်းခြောက်မှုများကို စာဖြင့်သော် လည်းကောင်း၊ ကာယအားဖြင့်သော်လည်း ကောင်း အမှန်တရားဘက်တော်သား အဖွဲ့သားများမှ မည်သို့သော အခါမျှပြုလုပ်မည် မဟုတ်ကြောင်း နှင့် PDF တပ်ဖွဲ့များနှင့် လုံးဝမသက်ဆိုင်ကြောင်းလည်း အသိပေးသည်။
“ကျွန်တော်တို့ ဆီမှာ Missionအတွက် သီးသန့်ဘက်ဂျက်ရှိတယ်။ပြီးတော့လိုအပ်ရင် တရားဝင်အလှူခံတာတွေလုပ်တယ်။ဒီလို ခြိမ်းခြောက်မှုတွေဟာ ဒေသခံလူထု နဲ့ ကျွန်တော်တို့ကို သွေးခွဲတာ “ဟု ဗန်းမော်ခရိုင် ပြည်သူ့ကာကွယ်ရေးတပ်ဖွဲ့ဝင်တစ်ဦးက လူထုနွေဦးသို့ ပြောသည်။
PDF အမည်ခံ၍ ပြည်သူများဆီမှ ခြိမ်းခြောက် ငွေညစ်သည့် နည်းလမ်းများမှာ အကြမ်းဖက်စစ် ကောင်စီ၏ လက်ဝေခံဖြစ်သော ပျူစောထီးအဖွဲ့များက စစ်ကိုင်း တိုင်း၌ တွင်ကျယ်စွာ ပြုလုပ်နေသည်။