အာဆီယံအထူးကိုယ်စားလှယ်၊ ကမ္ဘောဒီးယားနိုင်ငံခြားရေးဝန်ကြီး ပရက်ဆော့ခွန်းသည် အကြမ်းဖက်စစ်ကောင်စီ၏ဖိတ်ကြားချက်အရ မတ်လ ၂၁ရက်မှ ၂၃ ရက်အထိ မြန်မာနိုင်ငံသို့ အလုပ်သဘောလာရောက်လည်ပတ်မည်ဖြစ်သည်။
ကမ္ဘောဒီးယားနိုင်ငံခြားရေးဝန်ကြီးသည် အာဆီယံအထူးကိုယ်စားလှယ်အနေဖြင့် မြန်မာနိုင်ငံသို့ ပထမဆုံးအကြိမ်လာရောက်မည်ဖြစ်ပြီး မည်သည့်အဖွဲ့အစည်းများနှင့်တွေ့ဆုံမည်ဆိုသည်ကို ထုတ်ပြန်ခြင်းမရှိပေ။
“အထူးကိုယ်စားလှယ်ရဲ့ပထမဆုံးခရီးစဉ်က အကြမ်းဖက်မှုအဆုံးသတ်ရေးနဲ့ အဖွဲ့အစည်းအားလုံးအကြား အတတ်နိုင်ဆုံးထိန်းချုပ်ကန့်သတ်ရေးဆီဦးတည်တဲ့ ကောင်းမွန်တဲ့အခြေအနေဖန်တီးဖို့ရည်ရွယ်ပါတယ်။ လူသားချင်းစာနာမှုအထောက်အပံ့တွေ ဖြန့်ဖြူခြင်း၊ အာဆီယံအတွင်း ရေးမှူးချုပ်ရုံးနဲ့ AHA စင်တာအကြားချိတ်ဆက်ဆောင်ရွက်ခြင်းနဲ့ သက်ဆိုင်ရာပါတီများအကြား နိုင်ငံရေးအကြံပြုချက်များ၊ ဆွေးနွေးမှုများကို တိုက်တွန်းခြင်း စတာတွေလည်း ရည်ရွယ်ပါတယ်” ဟု ကမ္ဘောဒီးယားနိုင်ငံခြားရေးဝန်ကြီးဌာနက ထုတ်ပြန် သည်။
အထက်ပါ ခရီးစဉ်အတွင်း ဖမ်းဆီးထိန်းသိမ်းခံထားရသည့် ၂၀၂၀ ရွေးကောက်ပွဲအနိုင်ရပါတီခေါင်းဆောင် နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် အာဆီယံအထူးကိုယ်စားလှယ်တို့ တွေ့ဆုံနိုင်ဖွယ်မရှိပေ။
Public Service Announcement
ယခင်အာဆီယံအထူးကိုယ်စားလှယ်က နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့် တွေ့ဆုံခွင့်ရရှိရန် အကြမ်းဖက်စစ်ကောင်စီကို တောင်းဆိုရာ ခွင့်ပြုခဲ့ခြင်းမရှိပေ။ ထို့အတွက် အဆိုပါအထူးကိုယ်စားလှယ် ၏ သက်တမ်း ၄လကျော်အတွင်း မြန်မာနိုင်ငံသို့ လာရောက်နိုင်ခြင်းမရှိပေ။
လက်ရှိအာဆီယံအထူးကိုယ်စားလှယ်သည် အကြမ်းဖက်စစ်ကောင်စီခေါင်းဆောင်မင်းအောင်လှိုင်နှင့် ၎င်းတို့တွေ့ဆုံခွင့်ပေးသည့် ပါတီ၊ အဖွဲ့အစည်း၊ လူပုဂ္ဂိုလ်များနှင့်သာ တွေ့ဆုံရဖွယ် ရှိနေသည်။
NLD ပါတီကမူ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်နှင့်တွေ့ဆုံခြင်းမဟုတ်ပါက မည်သူနှင့်တွေ့ဆုံသည်ဖြစ်စေ NLD ကို ကိုယ်စားပြုတွေ့ဆုံခြင်းမဟုတ်ဘဲ ၎င်းတို့၏ ပုဂ္ဂိုလ်ရေး တွေ့ဆုံမှုသာဖြစ်မည်ဟု ပြောကြားထားသည်။
