အကြမ်းဖက်စစ်​ကောင်စီ​ကြောင့် နည်းပညာတက္ကသိုလ်​ကျောင်းသားနှစ်ဦးကျဆုံး

ပြီးခဲ့သည့် မတ်လ ၈ ရက်နေ့က နည်းပညာတက္ကသိုလ်(စစ်ကိုင်း) ပဉ္စမနှစ် မြို့ပြအင်ဂျင်နီယာဌာနမှ ကျောင်းသားတစ်ဦးသည်စစ်ကိုင်းတိုင်းဒေသကြီးအတွင်း အကြမ်းဖက်စစ်တပ်အား ခုခံတွန်းလှန်စဉ် ဂုဏ်ရောင်ပြောင်စွာ ကျဆုံးခဲ့ရကြောင်း၊ ကျဆုံးခဲ့ရသည့် ကျောင်းသားရဲဘော်၏ မိသားစုနှင့်ထပ်တူမိမိတို့နည်းပညာတက္ကသိုလ်(စစ်ကိုင်း)ကျောင်းသားများသမဂ္ဂမှ ဝမ်းနည်းကြေကွဲရပြီးအလေးနီပြုအပ်ကြောင်း၊ ​အရေးတော်ပုံအတွင်း နည်းပညာတက္ကသိုလ်(စစ်ကိုင်း)မှ ကျောင်းသား(၂)ဦး ဂုဏ်ရောင်ပြောင်စွာ ကျဆုံးခဲ့ရပြီးဖြစ်ကြောင်းနည်းပညာတက္ကသိုလ်(စစ်ကိုင်း) ကျောင်းသားများသမဂ္ဂက သတင်းထုတ်ပြန်ခဲ့သည်။

အလားတူ မတ်လ(၁၈)ရက်နေ့ညနေပိုင်းက ရေးမြို့နယ်၊ ဝယ်‌ပေါင်ကျေးရွာ၌ ဒေသခံပြည်သူ့ကာကွယ်ရေးတပ်ဖွဲ့ဝင်များနှင့် စစ်ကောင်စီတပ်ဖွဲ့ဝင်များ အပြန်အလှန်ပစ်ခတ်မှုများဖြစ်ပွားခဲ့ကြောင်း၊ ထို့နောက် စစ်ကောင်စီတပ်ဖွဲ့ဝင်များက နည်းပညာတက္ကသိုလ်(မော်လမြိုင်) ကျောင်းသားတစ်ဦးဖြစ်သူ ကိုအောင်ခန့်ဟိန်းနှင့် အခြားအရပ်သားပြည်သူတစ်ဦးအား ဖမ်းဆီးကာစစ်ကြောရေးသို့ပို့ဆောင်ခဲ့ကြောင်း၊ ဖမ်းဆီးထိန်းသိမ်းခံရချိန်တွင်ကိုအောင်ခန့်ဟိန်းသည် သေနတ်ဒဏ်ရာများရရှိခဲ့ပြီးဆေးကုသခွင့်မရရှိသည့်အတွက်ကြောင့် (၂)ရက်အကြာ မတ်လ(၂၀)ရက်နေ့တွင် စစ်ကြောရေး၌ ကျဆုံးခဲ့ကြောင်း နည်းပညာတက္ကသိုလ်(မော်လမြိုင်) ကျောင်းသားသမဂ္ဂအဖွဲ့က သတင်းထုတ်ပြန်သည်။

စစ်အာဏာသိမ်းကာလအတွင်း နည်းပညာတက္ကသိုလ်(မော်လမြိုင်)ရှိ ကျောင်းသား/သူများ၏ ဖမ်းဆီး/ကျဆုံး စာရင်းများအား ကျွန်ုပ်တို့သမဂ္ဂမှ မှတ်တမ်းထားစုစည်းလျက်ရှိသည်။ တော်လှန်ရေးအလွန်ကာလများတွင် ကျောင်းသား/‌သူများရသင့်ရထိုက်သော ကျောင်းသားအခွင့်အရေး၊ ပညာရေးအခွင့်အရေးများအတွက် ဆက်လက်တောင်းဆိုသွားမည်ဖြစ်သည်ကြောင်း နည်းပညာတက္ကသိုလ်(မော်လမြိုင်) ကျောင်းသားသမဂ္ဂအဖွဲ့က အသိပေးသည်။