မုန်တိုင်းငယ်ဟာ ဒီနေ့ မတ်လ ၂၂ ရက် နေ့လယ်ပိုင်းမှာ ဧရာဝတီမြစ်ဝကျွန်းပေါ် ဟိုင်းကြီးကျွန်းအနီးကနေ ကမ်းရိုးတမ်းကိုဖြတ်ကျော်ဝင်ရောက်နိုင်တယ်လို့ NUG ရဲ့ ဘေးအန္တရာယ်ဆိုင်ရာစီမံခန့်ခွဲရေးဝန်ကြီးဌာနက ထုတ်ပြန်ပါတယ်။
မုန်တိုင်းငယ်ဖြတ်ကျော်ချိန်မှာ ဧရာဝတီတိုင်း ၊ မြောင်းမြခရိုင်နဲ့ လပွတ္တာခရိုင် တို့မှာ မုန်တိုင်းဒီရေဟာ ၈ ပေကနေ ၁၀ ပေခန့်အထိမြင့်တက်နိုင်တယ်လို့ သိရပါတယ်။
ဒါအပြင် လေတိုက်နှုန်းဟာလည်း တစ်နာရီကို မိုင် ၄၀ ကနေ ၄၅ မိုင်နှုန်းရှိပြီး လှိုင်းကြီးနိုင်တယ်လို့ NUG က ဆိုထားပါတယ်။
ဒါကြောင့် အဲဒီဒေသတွေက ပြည်သူတွေအနေနဲ့ဘေးလွတ်ရာကို ရှောင်တိမ်းကြဖို့တိုက်တွန်းထားတာတွေ့ရပါတယ်။
ကလေးသူငယ်တွေ ၊မသန်စွမ်းတွေ ၊သက်ကြီးရွယ်အိုတွေ ၊နာတာရှည်ရောဂါသည်တွေနဲ့ ကိုယ်ဝန်ဆောင်အမျိုးသမီးတွေကို ဦးစားပေး ပြောင်းရွှေ့ပေးသင့်တယ်လို့လည်းအကြံပေးထားတာတွေ့ရပါတယ်။
မုန်တိုင်းအရှိန်ကြောင့် တပြည်လုံးမိုးရွာနိုင်ပြီး ပဲခူးနဲ့ရန်ကုန်မှာတော့နေရာကွက်ပြီးမိုးကြီးနိုင်တယ်လို့သိရပါတယ်။
မိုးကြီးတာကြောင့် ရုတ်တရက်ရေကြီးရေလျှံတာတွေဖြစ်နိုင်ပါတယ်။
ဒါအပြင် ဧရာဝတီမြစ်ဝကျွန်းပေါ်နဲ့ဆက်စပ်ဒေသတွေမှာ လေပြင်းတိုက်ခတ်တာ ၊မိုးသက်လေပြင်းကျရောက်တာတွေဖြစ်နိုင်တဲ့အတွက် ခိုင်ခံမှုမရှိတဲ့ နေအိမ်တွေကနေ ခေတ္တတိမ်းရှောင်ကြဖို့ ၊ သစ်ပင် ၊သစ်ကိုင်းကြီးများကြိုးကျတာ ၊ဓာတ်ကြိုးပြတ်တောက်တဲ့အန္တရာယ်တွေကိုလည်းသတိပြုရှောင်ရှားကြဖို့ အထူးသတိပေးထားပါတယ်။