ထီးချိုင့်မြို့ စစ်​ဆေး​ရေးဂိတ် တိုက်ခိုက်ရာ စစ်​ကောင်စီတပ်သား နှစ်ဦး​သေဟု TR ​ပြော

စစ်ကိုင်းတိုင်း ထီးချိုင့်မြို့အထွက် ကုက္ကိုကုန်းလမ်းဆုံစစ်ဆေးရေးဂိတ်မိုင်းဆွဲခံရပြီး စစ်ကောင်စီတပ်သား နှစ်ဦးသေပြီး သုံးဦးအပြင်းအထန်ဒဏ်ရာရရှိကြောင်း Tigyaing Revolution -TR က People’s Springသို့ ပြောသည်။

ကုက္ကိုကုန်းလမ်းဆုံစစ်ဆေးရေးဂိတ်ကို ယနေ့ (မတ်လ ၂၆ ရက်)နံနက် ၇နာရီခွဲခန့်က မိုင်းတစ်ကြိမ်ဆွဲခဲ့ပြီးနောက် စစ်ကောင်စီတပ်သားသုံးဦး ကနဦးဒဏ်ရာအပြင်းအထန် ရရှိခဲ့သည်ဟု ဆိုသည်။

“ထီးချိုင့်မြို့ကနေ ထီစချိုင့် တံတားဘက် အတက်ကားတွေကို အဓိကထား တောင်းရမ်းနေတဲ့ဂိတ်။ ဖွင့်ထားတာ နှစ်လလောက်ပဲရှိသေးတယ်။မိုင်းဆွဲချိန်မှာ စခ ၁၀ ကောင်လောက်ရှိတယ်”ဟု TR က ပြောသည်။

ထို့နောက် နံနက် ၉ နာရီ မိနစ် ၂၀တွင် ဖောက်ခွဲရန်ကျန်ရှိသည့် မိုင်းတစ်လုံးပေါက်ကွဲခဲ့ပြီးနောက် စစ်ကောင်စီတပ်သားနှစ်ဦး ထပ်မံသေဆုံးခဲ့သည်ဟု အသိပေးသည်။

Public Service Announcement

သေဆုံး၊ဒဏ်ရာရရှိသည့် စစ်ကောင်စီတပ်သားများကို ထီးချိုင့်ဆေးရုံသို့ ခေါ်ဆောင်သွားကြောင်းလည်း မျက်မြင်တွေ့ရှိသူများ၏ အတည်ပြုချက်ကို TR က ကိုးကားသည်။

မတ်လ ၂၁ ရက်ကလည်း ထီးချိုင့် မြို့နယ် နီကယ်စက်ရုံအနီး အကြမ်းဖက်စစ်ကောင်စီတပ်မှ စစ်ဆေးဗိုလ်ကြီး တစ်ဦးနှင့် ရဲတပ်သားတစ်ဦး မိုင်းဆွဲခံရပြီးနောက် သေဆုံးထားသည်။