▪️လက်နက်ခဲယမ်းများစွာရရှိဟု ကော်ဘရာစစ်ကြောင်း ထုတ်ပြန်
မြ၀တီမြို့နယ်တွင် ယမန်နေ့က ကရင်အမျိုးသားအစည်းအရုံး(KNU) ဦးဆောင်သည့် ပူးပေါင်း တပ်ဖွဲ့နှင့် စစ်ကောင်စီတပ်တို့ တိုက်ပွဲပြင်းထန်ခဲ့ရာ အဆိုပါဒေသအား နယ်မြေရှင်းလင်းရေး ဆောင်ရွက်ရာ၌ စစ်ကောင်စီဘက်မှ ၆၁ဦး သေဆုံးကြောင်း အတည်ပြုနိုင်ခဲ့သည်ဟု တိုက်ပွဲတွင် ပါဝင်ခဲ့သည့် ကော်ဘရာစစ်ကြောင်းက သတင်းထုတ်ပြန်သည်။
လေးကေ့ကော်ဒေသ ဖလူးကျေးရွာဘက်မှ ဝေါ်လေမြို့နယ်ခွဲဘက်သို့ ဝင်ရောက်လာသည့် စစ်ကောင်စီ တပ်ကို ပူးပေါင်းတပ်ဖွဲ့က မတ်လ ၂၇ရက် နံနက် ၉နာရီမှ ညနေ ၄နာရီအထိ တိုက်ခိုက်ခဲ့ခြင်းဖြစ်သည် ဟုဆိုသည်။
ယမန်နေ့က တိုက်ပွဲ ဖြစ်ပွားခဲ့ရာနေရာအား Cobra စစ်ကြောင်းမှ နယ်မြေရှင်းလင်းရေး ပြုလုပ်ခဲ့ရာ အကြမ်းဖက်စစ်ကောင်စီဘက်မှ ၆၁ဦး သေဆုံးကြောင်း အတည်ပြုနိုင်ခဲ့ပြီး စစ်သုံးပစ္စည်းများနှင့် လက်နက်ပစ္စည်းများစွာ ကျန်ရှိခဲ့ကြောင်း ထုတ်ပြန်ခဲ့ပြီး နယ်မြေရှင်းလင်းရေး ဆက်လက်ပြုလုပ်လျက်ရှိသည်ဟု အသိပေးထားသည်။
Public Service Announcement
တိုက်ပွဲဖြစ်ပွားရာဒေသသည် KNU တပ်မဟာ(၆) နယ်မြေ ဖြစ်ပြီး စစ်ကောင်စီတပ်များ အထိနာခဲ့၍ လေကြောင်းမှ တိုက်ခိုက်လာမည်ကို ဒေသခံများက စိုးရိမ်နေကြောင်း၊ ထို့ကြောင့် မတ်လ ၂၇ရက် ညပိုင်းကစ၍ လေကြောင်းအန္တရာယ် ဂရုပြုရန် ကျေးရွာတာဝန်ခံများက ဒေသခံများကို တပ်လှန့်ထားကြောင်း ကော့ကရိတ်ဒေသခံတစ်ဦးက ပြောကြားထားသည်။
“မော်ခီးစခန်း(ဝေါ်လေမြို့နယ်ခွဲရှိ စစ်ကောင်စီတပ်စခန်း) ကျသွားတဲ့ နောက်ပိုင်းမှာ သူတို့ (စစ်ကောင်စီ) ပြန်လိုက် တက်သွားတဲ့သဘောဖြစ်တာပေါ့။ လမ်းကနေ ဖြတ်တော်ပြီးတော့ သူများ(ပူးပေါင်းတပ်ဖွဲ့)မိုင်းဆွဲတိုက်ခိုက်လိုက်တဲ့အခါကျတော့ ကျွန်တော်ကြားတာကတော့ လူဦးရေ(စစ်ကောင်စီတပ်ဖွဲ့ဝင်) က ၄၀ ကျော် ဝန်းကျင်လောက် ကျ(သေဆုံး)တယ်လု့ သိရတယ်”ဟု ကော့ကရိတ်ဒေသခံတစ်ဦးက မတ်လ ၂၇ရက် ညပိုင်း၌ ပြောကြားထားသည်။
လတ်တလောတွင် ကော့ကရိတ်တောင်ပိုင်း ဒေသများ၌လည်း KNUပူးပေါင်းတပ်နှင့် စစ်ကောင်စီတပ်တို့ တိုက်ပွဲများ ပြင်းထန်လျက်ရှိသည်။
