ယင်းမာပင်ပြည်သူ့ကာကွယ်ရေးတပ်ဖွဲ့ဝင်အချို့ လက်စားချေ သတ်ဖြတ်ခဲ့ပြီး ဖြစ်စဉ်ကို ဖုံးကွယ်ရန် ကြိုးပမ်းခဲ့ကြောင်း ကနဦးတွေ့ရှိဟု NUG ထုတ်ပြန်

▪️အပြစ်ရှိကြောင်း စစ်ဆေးတွေ့ရှိပြီး ပြစ်ဒဏ်ချမှတ်ခံရပါက အကျိုးဆက်များကို ရင်ဆိုင်ရန်အသင့်ဟု အဆိုပါတပ်ဖွဲ့ခေါင်းဆောင် ဗိုလ်သံမဏိပြော

စစ်ကိုင်းတိုင်း၊ ဗိုလ်သံမဏိခေါင်းဆောင်သော ပြည်သူ့ကာကွယ်ရေးတပ်ဖွဲ့ဝင်အချို့၏ ဥပဒေမဲ့ သတ်ဖြတ်မှုဟု ယူဆရသည့်ဖြစ်စဉ်မှာ လက်စားချေသတ်ဖြတ်ခဲ့ခြင်းဖြစ်ကြောင်း ကနဦးစုံစမ်း စစ်ဆေးမှုအရ သိရှိရကြောင်း NUG တရားရေးဝန်ကြီးဌာနက ယနေ့ထုတ်ပြန်သည်။

ကနဦးသိရှိချက်အရ အဆိုပါဖြစ်စဉ်သည် ဖောက်ခွဲရေးပစ္စည်းများ မှားယွင်းပေါက်ကွဲမှုက စတင်အခြေတည်ကာ လက်စားချေသတ်ဖြတ်ခဲ့ခြင်းဖြစ်ကြောင်း စုံစမ်းစစ်ဆေးမှုအရ သိရှိရပြီး အဆိုပါ ဖြစ်ရပ်ကို ကျူးလွန်သူများက ဖုံးကွယ်ရန် ကြိုးပမ်းခဲ့ကြောင်းလည်း သိရသည်ဟု ထုတ်ပြန်ချက်၌ ဖော်ပြသည်။

အဆိုပါ ဖြစ်စဉ်နှင့်ပတ်သက်၍ ဒေသခံကာကွယ်ရေးတပ်ဖွဲ့ခေါင်းဆောင် ဗိုလ်သံမဏိက ထိုသို့ သတ်ဖြတ်ရန် အမိန့်ပေးခဲ့မှုမျိုး မရှိခဲ့သော်လည်း အပြစ်ရှိကြောင်း စစ်ဆေးတွေ့ရှိပြီး ပြစ်ဒဏ်ချ မှတ်ခံရပါကလည်း ရင်ဆိုင်ရန် အသင့်ရှိဟုပြောဆိုကြောင်း တရားရေးဝန်ကြီးဌာန၏ ထုတ်ပြန်ချက်၌ ဖော်ပြသည်။

Public Service Announcement

“တချို့သော လက်အောက်ငယ်သား တပ်ဖွဲ့ဝင်တွေ အနေနဲ့ကတော့ ‌ဒေါသမထိန်းနိုင်လို့ ဒီလိုဖြစ်ရပ်မျိုးကို ကျုးလွန်မိတာ ဖြစ်နိုင်ကြောင်း၊ အပြစ်ရှိကြောင်း စစ်ဆေးတွေ့ရှိပြီး ပြစ်ဒဏ်ချမှတ်ခံရရင်လည်း ဒီဖြစ်စဉ်ရဲ့ အကျိုးဆက်တွေကို မိမိအနေနဲ့ ရင်ဆိုင်ဖို့ အသင့်ပါပဲ” ဟု ဗိုလ်သံမဏိက ဆိုသည်။

NUG တရားရေးဝန်ကြီးဌာနက “အကယ်၍ ခိုင်လုံသောသက်သေများ စစ်ဆေးတွေ့ရှိခဲ့ပါက ပြစ်မှုစစ်ဆေးစီရင်ခြင်းများ ပြုလုပ်သွားမည် ဖြစ်ပြီး ပြစ်မှုထင်ရှားပါက ထိုက်သင့်သော ပြစ်ဒဏ်များ ချမှတ်သွားမည် ဖြစ်ပါသည်”ဟု ထုတ်ပြန်သည်။

၂၀၂၁ နိုဝင်ဘာလတွင် ဗိုလ်သံမဏိ ဦးဆောင်သော ယင်းမာပင် ပြည်သူ့ကာကွယ်ရေးအဖွဲ့ဝင် အချို့က အရပ်သားပြည်သူ ၁၀ ဦးကို သတ်ဖြတ်ခဲ့မှုနှင့်ပတ်သက်၍ တရားရေးဝန်ကြီးဌာနနှင့် ကာကွယ်ရေးဝန်ကြီးဌာနတို့ ပူးတွဲ၍ စစ်ရေးပြစ်မှုဆိုင်ရာ စုံစမ်းစစ်ဆေးရေး ဗဟိုကော်မရှင် ဖွဲ့စည်းကာ စုံစမ်းစစ်ဆေးမှုများ ပြုလုပ်နေသည်။

ပဋိပက္ခဖြစ်စဉ်ကာလ၌ ကျင့်သုံးရမည့် စစ်ဘက်ဆိုင်ရာ စည်းမျဉ်းစည်းကမ်းများ၊ နိုင်ငံတကာဥပဒေများကို ဒေသခံကာကွယ်ရေးတပ်ဖွဲ့ခေါင်းဆောင်များအား လေ့ကျင့်မှုများ၊ ရှင်းလင်းမှာကြားမှုများ ပြုလုပ်ခဲ့ပြီးဖြစ်ပြီး စစ်မြေပြင်တွင် အပြစ်မဲ့အရပ်သား ပြည်သူများကို အသက်အန္တရယ်ပြုခြင်းနှင့် သတ်ဖြတ်ခြင်း များကို လုံးဝ ခွင့်ပြုလိမ့်မည် မဟုတ်ကြောင်း NUG က ကြေညာထားသည်။