▪️အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်အပါအဝင် နိုင်ငံရေးအကျဉ်းသား ပြန်လွှတ်ပေးရေး ပူးတွဲတောင်းဆို
စစ်အာဏာသိမ်းမှုကြောင့် မြန်မာ့စီးပွားရေးတိုးတက်မှု နှစ်ပေါင်းများစွာ နောက်ပြန်ဆုတ်သွားခြင်းနှင့် တရားမဝင်ဘဏ္ဍာရေးအန္တရာယ်ကြီးထွားလာမှုအပေါ် စိုးရိမ်ကြောင်း အမေရိကန်သမ္မတနှင့် စင်ကာပူဝန်ကြီးချုပ်တို့က ပူးတွဲထုတ်ပြန်သည်။
စင်ကာပူဝန်ကြီးချုပ်လီရှန်လွန်း၏ ဝါရှင်တန်ခရီးစဉ်တွင် ခေါင်းဆောင်နှစ်ဦး၏ ပူးတွဲကြေညာချက်၌ မြန်မာ့အရေးကို ထည့်သွင်းထားခြင်းဖြစ်ပြီး မြန်မာပြည်အခြေအနေ၊ ဒေသတွင်းတည်ငြိမ်မှု အပေါ်သက်ရောက်စေသည့်စိန်ခေါ်မှုများအတွက် နက်ရှိုင်းစွာစိုးရိမ်ကြောင်းလည်း ဖော်ပြသည်။
မြန်မာပြည်သူများအပေါ် အကြမ်းဖက်မှုများအဆုံးသတ်ရေး၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်၊ သမ္မတဦးဝင်းမြင့်၊ နိုင်ငံခြားသားဖမ်းဆီးထိန်းသိမ်းခံများအပါအဝင် နိုင်ငံရေးအကျဉ်းသားများအားလုံးပြန်လွှတ်ပေးရေး၊ လူသားချင်းစာနာမှုအကူ အညီများမဟန့်တားရေးနှင့် ဒီမိုကရေစီအသွင်ကူးပြောင်းရေးလမ်းကြောင်းဆီပြန်သွားရေးတို့ကိုလည်း အမေရိကန်-စင်ကာပူ ခေါင်းဆောင်နှစ်ဦးက တောင်းဆိုသည်။
ထို့အပြင် မြန်မာပြည်သူများအကျိုးအတွက် ငြိမ်းချမ်းစွာအဖြေရှာရေး စင်ကာပူနှင့် အာဆီယံ၏ အပြုသဘောဆောင်ပါဝင်မှုအခန်းကဏ္ဍကို အသိအမှတ်ပြုပြီး မြန်မာစစ်ကောင်စီအနေဖြင့် အာဆီယံဘုံဆုံးဖြတ်ချက် ၅ရပ်ကို အရေးပေါ် အကောင်အထည်ဖော်ရေးအတွက် တောင်းဆိုကြောင်း ပူးတွဲထုတ်ပြန်သည်။