ဒီးမော့ဆိုမြို့တွင် ယနေ့ တိုက်ပွဲဖြစ်ပွားခြင်းမရှိဘဲ စစ်ဘေးရှောင်စခန်းသို့ အကြမ်းဖက်စစ်ကောင်စီတပ်က လက်နက်ကြီးဖြင့် ပစ်ခတ်ရာ စစ်ဘေးရှောင်ပြည်သူတစ်ဦး ထိမှန်၍ ဒဏ်ရာရှိခဲ့သည်ဟု KNDF B-8က ထုတ်ပြန်သည်။
ယနေ့(ဧပြီ ၁ရက်)နံနက်အစောပိုင်းတွင် ဒီမောဆိုမြို့ အနောက်ဘက်ခြမ်းရှိ စစ်ဘေးရှောင်စခန်းနေရာများကို စစ်ကောင်စီက လက်နက်ကြီးဖြင့် ခြောက်ကြိမ်ပစ်ခတ်ခဲ့သည်ဟု ကရင်နီအမျိုးသားကာကွယ်ရေးတပ် တပ်ရင်း(၈)- Karenni Nationalies DefenceForce KNDF B-08 က သတင်းထုတ်ပြန်သည်။
“လက်နက်ကြီးနဲ့ ခြောက်လုံးပစ်တာ။ ဘုရားကျောင်းအနီးကို ကျတဲ့အလုံးမှာ အရပ်သားတစ်ယောက် ထိသွားတယ်။ စိုးရိမ်ရတယ်”ဟု KNDF ရဲဘော်တစ်ဦးကပြောသည်။
တိုက်ပွဲလုံးဝဖြစ်ပွားခြင်းမရှိဘဲ အကြောင်းမဲ့ပစ်ခတ်ခြင်းဟု KNDFB-08 သတင်းပြန်ကြားရေးဌာနက ထုတ်ပြန်သည်။
ဒီမောဆိုမြို့အပါအဝင် ကရင်နီဒေသကို စစ်ကောင်စီက နည်းမျိုးစုံသုံး၍ စစ်ကြောင်းထိုးနေပြီး ဒေသခံပြည်သူ့ကာကွယ်ရေးအဖွဲ့များကလည်း စစ်ကောင်စီအထိနာအောင် ခုခံတိုက်ခိုက်နေသည်။ တိုက်ပွဲများ မကြာခဏ ဖြစ်နေ၍ လက်နက်ခဲယမ်းလိုအပ်ချက်ရှိနေပြီး ပြည်သူလူထုအနေဖြင့် အာရုံစိုက်ကူညီပေးရန် KNDF အပါအဝင် ကရင်နီဒေသအခြေစိုက် ပြည်သူ့ကာကွယ် ရေးအဖွဲ့များက မေတ္တာရပ်ခံထားသည်။