ပြည်သူလူထု၏ ထောက်ပံ့လှူဒါန်းမှုဖြင့် ဝယ်ယူထားသည့်လက်နက်အချို့ကို ကလေးမြို့နယ်အခြေစိုက် ပြည်သူ့ကာကွယ်ရေးအဖွဲ့တစ်ဖွဲဲ့က ထုတ်ဖော်ပြသလိုက်ပြီး စစ်အာဏာရှင်တော်လှန်ရေး ဆက်လက်ပံ့ပိုးပေးကြရန်လည်း တောင်းဆိုလိုက်သည်။
ကလေးမြို့နယ်အခြေစိုက် Ranger Kalay Defend Forceက လက်နက်ခဲယမ်းအချို့ကို ယနေ့(ဧပြီ ၂ရက်) ထုတ်ဖော်ပြသခြင်းဖြစ်သည်။
” လက်နက်ဝယ်ရခက်ခဲခြင်း ၊ သယ်ယူရေးလမ်းကြောင်းခက်ခဲခြင်းများကြောင့် ကြန့်ကြာနေခဲ့ရသော လက်နက်များ ကျွန်တော်တို့အဖွဲ့ဆီကိုရောက်ရှိလာပါပြီ” ဟု Ranger Kalay Defend Forceက ပြောသည်။
အမျိုးအစားမတူသည့် သေနတ်သုံးလက်နှင့်ကျည်များကို ဝယ်ယူထားခြင်းဖြစ်ပြီး မှာယူပြီးဖြစ်သည့် AK 47 တစ်လက်လည်း မကြာမီ ရောက်ရှိမည်ဟု အသိပေး ထားသည်။ထို့အပြင် ပြည်သူ့ကာကွယ်ရေးအဖွဲ့များမှာ လက်နက်များ လိုအပ်နေသေးပြီး ဆက်လက်ပံ့ပိုးပေးရန် တောင်းဆိုထားသည်။
Public Service Announcement
စစ်ကိုင်းတိုင်းသည် စစ်အာဏာရှင်အား ခုခံတော်လှန်စစ်ဆင်နွဲရာတွင် ယခင်ကထက် အောင်မြင်မှုရနေပြီး လက်နက်ခဲယမ်းလိုအပ်ချက်အတွက်လည်း ပြည်သူ့ကာကွယ်ရေးအဖွဲ့များက နည်းမျိုးစုံကြိုးစားနေသည်။
ပြည်သူ့ကာကွယ်ရေးအဖွဲ့များတွင် လက်နက်ခဲယမ်းလိုအပ်ချက် ကြီးမားနေဆဲဟု ဒီပဲယင်းမြို့နယ်အခြေစိုက် ဂဠုန်တပ်တော်မှ တပ်ဖွဲ့ဝင်တစ်ဦးက ပြောသည်။
