မုံရွာအကျဥ်းထောင်အတွင်း အကျဥ်းသားအချို့ဆန္ဒထုတ်ဖော်မှုကို စစ်ကောင်စီတပ်က အကြမ်းဖက် ပစ်ခတ်နှိမ်နင်း၍ အကျဥ်းသားတစ်ဦးသေဆုံးပြီး ငါးဦးဒဏ်ရာခဲ့သည်ဟု People’s Springက ကနဦးသတင်းရရှိသည်။
” တစ်ဦးသေတယ်။ ဘယ်သူလဲ မသိရသေးဘူး။ ငါးဦးဒဏ်ရာရတယ်”ဟု ယင်းဖြစ်စဥ်ကို သိရှိထားသည့် ဒေသခံတစ်ဦးက ပြောသည်။
သေဆုံးသူ၏ ဓာတ်ပုံနှင့်ဒဏ်ရာရသူငါးဦးအနက် နှစ်ဦး၏ ဓာတ်ပုံကို သတင်းရင်းမြစ်တစ်ဦးက ပေးပို့၍ People’s Spring ရရှိခဲ့သည်။ ငါးဦးမှာ အသက်အန္တရာယ် မစိုးရိမ်ရသော်လည်း သေနတ်ဖြင့်ပစ်ခတ်ခံရ၍ ရရှိထားသည့် ဒဏ်ရာများဟုဆိုသည်။
မုံရွာထောင်တွင် မတရားချုပ်နှောင်ခံထားရသူအချို့က ယနေ့(ဧပြီ ၃ရက်) ညနေ ၅နာရီခန့်ကစတင်ကာ ဆန္ဒထုတ်ဖော်ခဲ့ခြင်းဖြစ်သည်။၎င်းတို့က “တို့ပြည်သူတွေ ညီရဲ့လားဟေ့” ဟူသော ကြွေးကြော်သံဖြင့် ဆန္ဒထုတ်ဖော်ကြခြင်းဟု ဒေသခံများက ပြောသည်။
ယခုညတွင် စစ်ကောင်စီက မုံရွာမြို့တွင်း၌ အင်အားတိုးချလိုက်ပြီး အရပ်သားတစ်ဦးကို သေနတ်ဖြင့် ပစ်ခတ်လိုက်သည်ဟုလည်း သတင်းရရှိသည်။
အချက်အချာကျသည့် ပြည်ထောင်စုလမ်းကို စစ်ကောင်စီက ပိတ်ဆို့နေရာယူထားပြီး အရပ်သားဆိုင်ကယ်တစ်စီးကို ပစ်ခတ်ခြင်းဟု မုံရွာအခြေစိုက် ပြည်သူ့ကာကွယ်ရေးအဖွဲ့များ၏ သတင်းထုတ်ပြန်ရေးဖေ့စ်ဘွတ်ခ်စာမျက်နှာဖြစ်သည့် မုံရွာမြို့နယ်သတင်းမှန်ပြန်ကြားရေးက ရေးသားထားသည်။
ထို့အပြင် ပြည်သူ့ကာကွယ်ရေးအဖွဲ့များကလည်း ပြည်သူလူထုအနေဖြင့် အပြင်သို့ မထွက်ကြရန် သတိပေးနေကြသည်။