ကရင်အမျိုးသားအစည်းအရုံး(KNU)ပူးပေါင်းအဖွဲ့နှင့် အကြမ်းဖက်စစ်ကောင်စီတပ်တို့ ကော့ကရိတ်-မြဝတီအာရှလမ်းမကြီးတွင် ယနေ့(ဧပြီ ၄ရက်) နံနက်အစောပိုင်းကစတင်ကာ တိုက်ပွဲဖြစ်နေပြီး ကုန်တင်ကားနှစ်စီး မီးလောင်နေသည်ဟု ဒေသခံများက ပြောသည်။
ကော့ကရိတ်- မြဝတီ အာရှလမ်းပိုင်းရှိ ဆိပ်ဖူးတောင်ခြေတွင် ကားနှစ်စီး မီးရှို့ခံထားရခြင်းဖြစ်ပြီး အသေးစိတ်အခြေအနေကို မသိရှိကြောင်း မျက်မြင်တွေ့ခဲ့သူတစ်ဦးက ပြောသည်။
“အာရှလမ်းမကြီး မသုံးဖို့ KNUက သတိပေး ထားပေမယ့် အခြေအနေကြည့်ပြီး သွားလာနေကြတာပဲ။ ဒီနေ့တော့ မသွားကြတာ ကောင်းမယ်။လမ်းမနဲ့ မဝေးတဲ့နေရာမှာ တိုက်ပွဲလည်း ဖြစ်နေတယ်”ဟု ကော့ကရိတ်မြို့ခံတစ်ဦးက ပြောသည်။
စစ်အာဏာရှင်ဆန့်ကျင်ရေးတွင် ပြည်သူလူထုနှင့်အတူရပ်တည်နေသည့် ကရင်အမျိုးသားအစည်းအရုံး(KNU) ဦးဆောင်သည့် ပူးပေါင်းတပ်ဖွဲ့သည် ကရင်ပြည်နယ်သို့ စစ်ကြောင်းထိုးလာသည့် စစ်ကောင်စီတပ်ကို စောင့်ကြိုတိုက်ခိုက်နေပြီး ခရီးသွားပြည်သူများ အသက်အန္တရာယ်မဖြစ်စေရေးအတွက် အာရှလမ်းမအသုံးပြုခွင့်ကို ကန့်သတိပေးထားခြင်းဖြစ်သည်။
Public Service Announcement
မြေပြင်တိုက်ပွဲတိုင်းတွင် အထိနာနေသည့် အကြမ်းဖက်စစ်ကောင်စီတပ်က လေကြောင်းအသုံးပြုတိုက်ခိုက်နေပြီး ယမန်နေ့ကလည်း KNU တပ်မဟာ (၅) နယ်မြေသို့ လေကြောင်းမှ လာရောက်ထောက်လှမ်းသွားခဲ့သည်ဟု ဆိုသည်။
