ကပ္ပလီပင်လယ်မှာမုန်တိုင်းဖြစ်လာနိုင်ခြင်းနဲ့အတူ မြန်မာ့ကမ်းရိုးတန်းဘက်ကို ရွေ့လျားလာနိုင်ခြေရှိလို့ အချိန်မခါမဟုတ်မိုးနဲ့ လေပြင်းဘေးကို ကြိုတင် သတိပြုကြဖို့ အမျိုးသားညီညွတ်ရေးအစိုးရကခန့်မှန်းသတိပေးချက်ထုတ်ပြန်ထားပါတယ်။
၂၀၂၂ နွေကာလမှာ ဒုတိယမြောက်ဖြစ်လာနိုင်တဲ့ မုန်တိုင်းငယ်နဲ့ပတ်သက်လို့ အမျိုးသားညီညွတ်ရေးအစိုးရ(NUG)ရဲ့ လူသားချင်းစာနာထောက်ထားရေးနှင့် ဘေးအန္တရာယ်စီမံ
ခန့်ခွဲမှုဆိုင်ရာဝန်ကြီးဌာန(MHADM)ကဧပြီ ၄ ရက်မှာ သတိပေးချက် ထုတ်ပြန် ထားတာပါ။
ထိုင်းပင်လယ်ကွေ့မှာ ဖြစ်နေတဲ့ လေပွေလှိုင်းဟာ မြန်မာနဲ့ထိစပ်နေတဲ့ ကပ္ပလီပင်လယ်ပြင်ထဲကို လေဖိအားနည်းရပ်ဝန်းအဖြစ် ဧပြီလ (၅)ရက်နေ့မှာရောက်ရှိလာနိုင်ပြီး ဧပြီလ ၆ရက်နေ့မှာ မုန်တိုင်းငယ် ဖြစ်လာနိုင်တယ်လို့ ကြိုတင်ခန့်မှန်းထားပါတယ်။
ဧပြီလ ၆ ရက်နေ့ညနေကစပြီး မုတ္တမကွေ့၊ မြစ်ဝကျွန်းပေါ် ကမ်းရိုးတန်း တစ်လျှောက် နဲ့ ပင်လယ်ပြင်မှာ လေတိုက်နှုန်း တစ်နာရီလျှင် မိုင် ၄၀ ခန့် တိုက်ခတ်နိုင်တာကြောင့် ကြိုတင်သတိပြုဖို့လိုတယ်လို့ MHADMက သတိပေးထားပါတယ်။ ပင်လယ် ရေလှိုင်းအမြင့်ကလည်း ၆ပေကနေ ၇ပေခန့် အထိ ရှိနိုင်တယ်လို့ ထုတ်ပြန်ထားပါတယ်။
Public Service Announcement
မုန်တိုင်းငယ်ကဧပြီလ၇ရက်နေ့မှာအနည်းငယ်ပိုအားကောင်းလာနိုင်ပြီးတော့ ကိုကိုးကျွန်းအနီးကမေကပ် ရွေ့လျားနိုင်တယ်လို့ခန့်မှန်းထားပါတယ်။ ဒါကြောင့် မြစ်ဝကျွန်းပေါ်ဒေသတွေမှာ သတိပြုနေထိုင်ကြဖို့နဲ့မိုးနဲ့လေပြင်းဘေးကြိုတင်ကာကွယ်ဖို့ သတိပေး ထားပါတယ်။
အထက်ပါ အချက်အလက်တွေဟာ MHADMရဲ့ကနဦးကြိုတင်ခန့်မှန်းချက်တွေဖြစ်ပါတယ်။ နောက်ဆက်တွဲအခြေအနေကို ဆက်လက်ထုတ်ပြန်ပေးသွားမယ်လို့ ဆိုပါတယ်။
မိုးလေဝသဆိုင်ရာ ကွန်ပြူတာမော်ဒယ်တစ်ခုဖြစ်တဲ့ECMWF မှာတော့ ရန်ကုန်တိုင်းအပါအဝင် မြန်မာနိုင်ငံဒေသအများစုမှာ ဧပြီး ၇ရက်ကနေ ၉ ရက်အတွင်း အချိန်အခါမဟုတ်မိုးတွေ ရွာနိုင်တယ်လို့ ဧပြီ ၃ရက်မှာ ဖော်ပြထားပါတယ်။
ဒီတစ်ကြိမ် မုန်တိုင်းငယ် သတိပေးချက်ဟာ ၂၀၂၂ နွေရာသီအတွင်း ဒုတိယအကြိမ်မြောက်ဖြစ်ပါတယ်။ ပြီးခဲ့တဲ့ မတ်လ တတိယလပတ်ထဲမှာ ဘဂ်လားပင်လယ်အော်အတွင်း မုန်တိုင်းငယ်ဖြစ်ခဲ့ပြီး မြစ်ဝကျွန်းပေါ်ကမ်းရိုးတန်းကို ဝင်ခဲ့ပါတယ်။ မုန်တိုင်းငယ်အဆင့်နဲ့သာ ဝင်တာဖြစ်လို့ ကြီးမားတဲ့ ပျက်စီးထိခိုက်မှုတွေ မရှိခဲ့ပါဘူး။ အဲဒီမုန်းတိုင်းငယ်တုန်းက NUG ရဲ့ MHADM ကအနီးစပ်ဆုံးမှန်ခဲ့ပြီး အကြမ်းဖက်စစ်ကောင်စီရဲ့ မိုးဇလကတော့ ဆိုင်ကလုန်းမုန်တိုင်းတိုက်ခေတ်ပြီး မုန်တိုင်းဒီရေ ၁၀ ပေဝန်းကျင်အထိ့တက်နိုင်တယ်လို့ ခန့်မှန်းချက်တွေကလွဲချော်ခဲ့ပါတယ်။
အန္ဒိယမိုးဇလရဲ့ ကြိုတင်ခန့်မှန်းချက်ကိုယ်တိုင် အမှားအယွင်းများခဲ့ပေမယ့် NUG ရဲ့ လူသားချင်းစာနာထောက်ထားရေးနှင့် ဘေးအန္တရာယ်စီမံခန့်ခွဲမှုဆိုင်ရာဝန်ကြီးဌာန ခန့်မှန်းချက်တွေက အမှန်ဆုံးဖြစ်ခဲ့တာပါ။
