ကရင်နီ(ကယား)ပြည်နယ် ဖရူဆိုမြို့နယ် ကဒါးလားကျေးရွာအနီး အကြမ်းဖက် စစ်ကောင်စီ တပ်နှင့် တိုက်ပွဲဖြစ်ပွားရာ စစ်ကောင်စီတပ်သား ခြောက်ဦးသေဆုံးကြောင်း ကရင်နီအမျိုးသားများကာကွယ်ရေးတပ် (KNDF) တပ်ရင်း- ၁၅က ယနေ့ (ဧပြီ ၆ ရက်) ထုတ်ပြန်သည်။
ဖရူဆိုမြို့နယ်သို့ စစ်ထိုးလာသည့် စစ်ကောင်စီတပ်ကို ကရင်နီတပ်မတော်(KA) နှင့် KNDF ပူး ပေါင်းတပ်ဖွဲ့များက ပူးပေါင်းတိုက်ခိုက်ခဲ့ခြင်းဟု KNDF က ဆိုသည်။
လက်ရှိတွင် စစ်ကောင်စီတပ်က ငွေတောင်ရွာသစ်ကျေးရွာရှိ ပြည်သူ့နေအိမ် အချို့ကို မီးရှို့ဖျက်ဆီးမှုများ ဆက်လက်ပြုလုပ်နေသည်ဟုလည်း ထုတ်ပြန်ချက်၌ ဖော်ပြသည်။
ထို့အပြင် တိုက်ပွဲဖြစ်ပွားသော နေရာအနီးအနားတွင် သွားလာခြင်းမပြုကြရန် သတိပေး ထားသော်လည်း သွားလာနေကြသော ပြည်သူတစ်ချို့ကို အကြမ်းဖက်စစ်တပ်က ဆိုင်ကယ်နှင့်လူပါ ဖမ်းဆီးခေါ်ဆောင်သွားမှုများရှိ သည်ဟု KNDF က အသိပေးသည်။
Public Service Announcement
ဖမ်းဆီးခံရသည့် ပြည်သူများအား သတ်ဖြတ်ခြင်း ရှိ၊မရှိ စုံစမ်းနေဆဲဖြစ်ပြီး ပြည်သူများ အနေဖြင့် ထီးပေါ်ဆိုအုပ်စုအတွင်းတွင် သွားလာခြင်းမပြုလုပ်ကြပါ ရန် သတိပေးသည်။
ထို့အပြင် ဒီးမော့ဆိုမြို့နယ်မှတစ်ဆင့် ဖရူဆို မြို့နယ်သို့ စစ်အင်အား ဖြည့်တင်းထောက်ပံ့ရန် စစ်ကောင်စီက ကြိုးစားနေ၍ ထွီလွီးဘီလာ- ငွေတောင်ရွာသစ်လမ်းပိုင်းကို ပြည်သူများ လတ်တလော အသုံးမပြုရန် KNDFက မေတ္တာရပ်ခံထားသည်။
