▪️အကြမ်းဖက်စစ်ကောင်စီတပ်က တိုက်လေယာဥ်အသုံးပြု တိုက်ခိုက်နေဟုဆို
စစ်ကိုင်းတိုင်း၊ ပင်လည်ဘူးမြို့နယ်တွင် တိုက်ပွဲ ပြင်းထန်နေပြီး အကြမ်းဖက်စစ်ကောင်စီတပ်က တိုက်လေယာဥ်များအသုံးပြု တိုက်ခိုက်နေကြောင်း ကောလင်းခရိုင်ပြည်သူ့ကာကွယ်ရေးတပ်ဖွဲ့ဝင်တစ်ဦးက People’s Springသို့ ပြောသည်။
လက်ရှိတွင် အကြမ်းဖက်စစ်အုပ်စုက ပင်လည်ဘူးဒေသအတွင်း အင်တာနက်အပြင် ဖုန်းလိုင်းများပါ ဖြတ်တောက်ထားသည်ဟုလည်း ၎င်းက ဆိုသည်။
“ပင်လည်ဘူးနဲ့ ဝန်းသိုဘက်မှာ တိုက်ပွဲဆက်နေတယ်။ပြင်းလည်း ပြင်းထန်နေတယ်လို့တော့ လောလောဆယ် ပြောလို့ရတယ်။မြေပြင်နဲ့ ချိတ်ဆက်မှုပြတ်နေတာ လေးငါးရက်ရှိပြီး ဖုန်းတွေအားလုံးနီးပါး ဆက်သွယ်မရတော့လို့ ဘယ်နေရာမှာ ဖြစ်နေလည်းဆိုတာ တိတိကျကျ ပြောဖို့တော့ ခက်နေတယ်”ဟု အထက်ပါတာဝန်ရှိသူက ရှင်းပြသည်။
Public Service Announcement
ထို့အပြင် ယနေ့(ဧပြီ ၈ ရက်)နံနက် ၇နာရီခန့်က ပင်လည်ဘူးမြို့နယ်ဘက်သို့ ဂျက်ဖိုက်တာ လေယာဉ်သုံးစီး မိနစ်အနည်းငယ်စီခြားပြီး ပျံသွာကြောင်း Kawlin Revolution -KR က အသိပေးသည်။
ဧပြီ ၁ရက်နှင့် ၄ ရက်တွင်လည်း ပင်လည်ဘူးဒေသကပ်ပံသာကျေးရွာအနီးတိုက်ပွဲ ဖြစ်ပွားခဲ့ရာ အကြမ်းဖက်စစ်တပ်က လေယာဥ်အသုံးပြုတိုက်ခိုက်ခဲ့သည်ဟု ဆိုသည်။
လက်ရှိ အာဏာရှင်တော်လှန်ရေးကာလတွင် တိုက်ပွဲများ၌ ၎င်းတို့ထိခိုက်သေဆုံးမှုများပါက စစ်ကောင်စီသည် တိုက်လေယာဥ်များ အသုံးပြုတိုက်ခိုက်လျှက်ရှိနေသည်။
