မန္တ​လေး-မုံရွာလမ်းတွင် စစ်​ကောင်စီယာဥ်တန်းကိုနှစ်ရက်ဆက် တိုက်ခိုက်

စစ်ကိုင်းတိုင်း၊မန္တလေး-မုံရွာလမ်းမကြီးပေါ်တွင်အကြမ်းဖက်စစ်ကောင်စီယာဥ်များအား မဟာမိတ်အဖွဲ့ ၆ ဖွဲ့ပူးပေါင်းကာ နှစ်ရက်ဆက်တိုက် မိုင်းဆွဲတိုက်ခိုက်ခဲ့ပြီး ကားတစ်စီးပြာကျကာ အကြမ်းဖက် စစ်ကောင်စီ တပ်ဖွဲ့ဝင်များလည်း ထိခိုက်မှုများရှိကြောင်း မြင်းမူမြို့ပြတော်လှန်ရေးအဖွဲ့-CRF(Myinmu)က သတင်းထုတ်ပြန်သည်။

ပြီးခဲ့သည့်ဧပြီလ (၄)ရက်နေ့ ည၁၀ နာရီ ၄၉မိနစ်အချိန်တွင် မန္တလေးမှ မုံရွာသို့လာသော အက်စစ် သယ်ဆောင်လာသည့် အကြမ်းဖက်စစ်​ကောင်စီတပ်ဖွဲ့ဝင်တို့၏ ထောက်ပို့ယာဉ်တစ်စီးအား ပျော့ရွာနှင့်နပဲကျူး ကျေးရွာကြားတွင် မိုင်း (၃) လုံးဖြင့်ဖောက်ခွဲတိုက်ခိုက်ရာ အဆိုပါယာဥ် မီးလောင်ပြာကျ၍ နေရာမှ မရွေ့နိုင်ဖြစ်ပြီး ပါလာသော အကြမ်းဖက်စစ်ကောင်စီတပ်ဖွဲ့ဝင်နှစ်ဦးမှာလည်း ဒဏ်ရာအပြင်းအထန် ရရှိသွားခဲ့ကြောင်း ထုတ်ပြန်ချက်တွင် ဖော်ပြထားသည်။
သို့​သော် ​​သေဆုံးမှု ရှိ၊မရှိကိုမူမသိရသေးဟုဆိုသည်။

ဧပြီလ ၅ ရက်နေ့ ည (၇:၀)နာရီအချိန်ကလည်း မန္တလေးမှ မုံရွာသို့ ဖြတ်သန်းလာသော တင့်ကားသယ်တွဲကား (၈) စီးအား မိုင်းများဖောက်ခွဲပြီး တိုက်ခိုက်ခဲ့ရာ (၁) စီးထိမိသွားခဲ့ကြောင်း၊ဖော်ပြပါ စစ်ဆင်ရေး(၁) နှင့် (၂) အား မြင်းမူမြို့ပြတော်လှန်ရေးအဖွဲ့-CRF(Myinmu)၊ MMUPDF People Defence Force Myinmu ၊ Black Eagle Defence Force-MMU၊ Black Hawk Force Myinmu – BGFM နှင့် မြင်းမူလျှပ်စီးပြောက်ကျားအဖွဲ့တို့မှ ပူးပေါင်းဆောင်ရွက်ခဲ့ကြောင်းလည်းအသိ​ပေးသည်။

စစ်ဆင်ရေးများတွင်ပြည်သူ့ကာကွယ်ရေးရဲဘော်များအထိအခိုက်အကျအဆုံးမရှိဘဲအောင်မြင်စွာ ဆုတ်ခွာနိုင်ခဲ့ကြောင်း မြင်းမူမြို့ပြတော်လှန်ရေးအဖွဲ့-CRF(Myinmu)က အသိပေးသည်။

Public Service Announcement

အဆိုပါဖြစ်စဥ်နှင့်ပတ်သက်၍ မဟာမိတ်အဖွဲ့များထံ ဆက်သွယ်မေးမြန်း ထားပြီး ပြန်လည်ဖြေကြားခြင်းမရှိသေးပါ။

မန္တလေး-မုံရွာလမ်းမကြီးပေါ်တွင် အကြမ်းဖက်စစ်ကောင်စီယာဥ်များအား ဒေသတွင်းပြည်သူ့ကာကွယ်ရေးအဖွဲ့များက မကြာခဏ ခုခံတိုက်ခိုက်နေသည်။