စစ်ကိုင်းတိုင်း၊ မုံရွာမြို့ရှိ မကြာခဏ တိုက်ခိုက်ခံရလေ့ရှိသည့် အကြမ်းဖက် စစ်ကောင်စီတပ်စွဲထားသော ဆည်မြောင်းရုံး လက်ပစ်ဗုံးဖြင့် ထပ်မံပစ်ခတ် တိုက်ခိုက်ခံရပြီး စစ်ကောင်စီတပ်သားတစ်ဦးသေဆုံးကြောင်း Special Regional Attacks Force-Monywa အဖွဲ့က သတင်းထုတ်ပြန်သည်။
ယမန်နေ့ (ဧပြီ၉ရက်)က မုံရွာမြို့ပေါ်ရှိ ဆည်မြောင်းရုံးအား လက်ပစ်ဗုံးဖြင့် တိုက်ခိုက်ခဲ့ ခြင်းဖြစ်ပြီး အကြမ်းဖက်စစ်ကောင်စီ၏ သင်္ကြန်ပွဲတော်အတွက် နှစ်သစ်လက်ဆောင် ပေးလိုက်ခြင်းဟု Special Regional Attacks Force-Monywa အဖွဲ့ သတင်းတာဝန်ခံက ပြောသည်။
“မနေ့က (ဧပြီ၉ရက်နေ့) နေ့လယ်ပိုင်းလောက်က တိုက်ခိုက်ခဲ့တာပါ။ ဆည်မြောင်းရုံးထဲ စစ်ကောင်စီတပ်တွေချထားတာ အင်အားများပါတယ်။ ပြန်ပစ်တာမျိုးတော့မရှိဘူး။”ဟု ၎င်းက ပြောသည်။
အဆိုပါတိုက်ခိုက်မှုတွင် မုံရွာခရိုင်တပ်ရင်း-၁ ၊M.P.D.F တပ်ခွဲ-၄ ၊Special Regional Attacks Force-Monywa ၏ တပ်စိတ်-၂ ၊Monywa NightKing နှင့်မဟာမိတ်အဖွဲ့များ ပူးပေါင်း ပါဝင်ခဲ့သည်ဟု ၎င်းတို့က အသိပေးသည်။
ယမန်နေ့ (ဧပြီလ ၉ ရက်)နံနက် ၁၁နာရီမှ ၁၁ နာရီခွဲအတွင်းကလည်း စစ်ကောင်စီတပ်များကင်းစောင့်နေသော မုံရွာမြို့တွင်း ပေ(၈၀)လမ်း KBZ Bankဘဏ်ခွဲ(၄) ၊ပြည်ထောင်စုလမ်းမော်တော်ပီကယ်ရုံးနှင့် အထက (၁) စာသင်ကျောင်းတို့အား လက်ပစ်မိုင်းများဖြင့် ပစ်ခတ်တိုက်ခိုက်ခဲ့ကြောင်း Brother defense Forceက ထုတ်ပြန်ထားသည်။