လေးကေ့ကော်တိုက်ပွဲ စစ်ကောင်စီတပ် ၄၀ခန့် သေပြီး လက်နက်ခဲယမ်းများရရှိဟု ထုတ်ပြန်

ကရင်အမျိုးသားအစည်းအရုံး(KNU) တပ်မဟာ(၆) နယ်မြေ လေးကေ့ကော်ဒေသ တိုက်ပွဲ၌ စစ်ကောင်စီတပ်မှ ၄၀ဦးခန့်သေဆုံးပြီး လက်နက်ခဲယမ်းများ သိမ်းဆည်းရရှိကြောင်း အမျိုးသားညီညွတ်ရေးအစိုးရ၏ သတင်းနှင့်ပြန်ကြားရေး PVTVက ထုတ်ပြန်သည်။

လေးကေ့ကော်မြို့သစ်သို့ စစ်ကောင်စီတပ်များ စစ်ကြောင်းထိုး ဝင်ရောက်လာ၍ KNU ဦးဆောင်သည့် ပူးပေါင်းတပ်ကခုခံတိုက်ခိုက်ခဲ့ရာ စစ်ကောင်စီတပ်မှ သေဆုံးထိခိုက်မှုများပြားခဲ့သည်။

စစ်ကောင်စီ၏ တပ်မ(၄၄)မှ ဗိုလ်ကြီးတင်လင်းခိုင်အား အရှင်ဖမ်းမိခဲ့ပြီး MA 3 ၅လက်၊ MA 2 တစ်လက်၊ MA sniper တစ်လက်၊ RPG.7 တစ်လက် စုစုပေါင်း လက်နက် ၈လက်နှင့် ကျည်ဘောက်များ သိမ်းဆည်းရမိခဲ့ကြောင်း ဖော်ပြထားသည်။

အထိနာသည့် စစ်ကောင်စီတပ်သည် တိုက်လေယာဉ် အသုံးပြုပြီး လေကြောင်းတိုက်ခိုက်မှုများ လုပ်ဆောင်ခဲ့သည်ဟု အဆိုပါဒေသရှိ ပြည်သူ့ကာကွယ်ရေးတပ် (PDF)စခန်း တာဝန်ခံတစ်ဦးက ပြောကြားသည်။

Public Service Announcement

အဆိုပါတိုက်ပွဲတွင် ပူးပေါင်းတပ်မှ ရဲဘော်နှစ်ဦးကျဆုံးခဲ့ပြီး ထိခိုက်ဒဏ်ရာရသူအချို့ရှိခဲ့သည်။