ရန်ကုန်မြို့ ကမာရွတ်မြို့နယ် အင်းယားလမ်းတွင် ပစ်ခတ်မှုဖြစ်ပွားပြီး စစ်ကောင်စီတပ်သားတစ်ဦးသေဆုံးကာ လှိုင်မြို့နယ် တပ်မတော်ချည်မျှင်နှင့်အထည်ချုပ်စက်ရုံဂိတ်ပေါက်တွင်လည်း ဗုံးပေါက်ပြီး ဝန်ထမ်းနှစ်ဦးထိခိုက်မှု ဖြစ်ပွားကြောင်း သတင်းရရှိသည်။
ယနေ့(ဧပြီ ၁၀ ရက်) ညနေ ၄ နာရီ ၅မိနစ်က ကမာရွတ်မြို့နယ် (၁၀)ရပ်ကွက်၊ ပန်းဝါအိမ်ယာဝင်ထွက်ပေါက်ဂိတ် (၂) အင်းယားလမ်းရှိ စစ်ကောင်စီဂိတ်ကို ကားတစ်စီးပေါ်မှ ၁၅ချက်ခန့် ပစ်ခတ်သွားခဲ့သည်ကို ဖေစ်ဘွခ်လူမှုကွန်ယက်တွင်ပျံ့နှံ့နေသောရုပ်သံဖိုင်တွင်တွေ့ရသည်။
အဆိုပါအိမ်ယာဝန်းသည် အကြမ်းဖက်စစ်ခေါင်ဆောင် မင်းအောင်လှိုင်နှင့် စိုးဝင်းတို့၏ ရန်ကုန်မှ နေအိမ်များနှင့်နီးပြီးစစ်ကောင်စီတပ်မှထိပ်ပိုင်းအရာရှိများနေထိုင်ရာဝန်းဖြစ်ကြောင်းလည်းသိ့ရသည်။
ထို့ကြောင့် စစ်ကောင်စီတပ်သားတစ်ဦး ဦးခေါင်းကျည်ထိမှန်သေဆုံးသွားခဲ့သည်ဟု သိရသည်။
Public Service Announcement
အလားတူ လှိုင်မြို့နယ် (၁၂) ရပ်ကွက် အင်းစိန်လမ်း တပ်မတော်ချည်မျှင်နှင့် အထည်ချုပ်စက်ရုံဝင်ပေါက်တွင်လည်း ယနေ့ ညနေ ၅ နာရီက လက်လုပ်ဗုံးဖြင့် တိုက်ခိုက်ခံရပြီး ဝန်ထမ်းနှစ်ဦး ထိခိုက်ခဲ့သည်။
“အရေးပေါ်ကားတွေလည်း လာတယ်။စခ DC ကား နှစ်စီးလည်း အင်းစိန်လမ်းမပေါ် ရပ်ထားတယ်”ဟု လှိုင်မြို့နယ် (၁၂)ရပ်ကွက်နေသူများက ပြောသည်။
ထိုသို့ ပစ်ခတ်ပေါက်ကွဲမှုများကြောင့် စစ်ကောင်စီတပ်သားများက ရန်ကုန်မြို့တွင်း လမ်းပိုင်းများ၌ အင်အားအများအပြားဖြင့် လမ်းများပိတ်ဆို့၍ရှာဖွေစစ်ဆေးနေသည်။
ယမန်နေ့ကလည်း မြို့တော်ဂေါက်ကွင်းနှင့် မင်္ဂလာ ဒုံလေတပ်စခန်းကို ရန်ကုန်တိုင်းတော် လှန်ရေးအင်အားစုများက ရှော့တိုက်ဒုံးများဖြင့် တိုက်ခိုက်ထားသည်။
ထို့အပြင် ရန်ကုန်မြို့ပြစစ်ဆင်ရေး ဒုတိယလှိုင်း အဖြစ် ” နန်းထိုက်အောင်” စစ်ဆင်ရေး စတင်ပြီဖြစ် ကြောင်း ရန်ကုန်တိုင်းစစ်ဒေသခွဲ ကွပ်ကဲရေးအဖွဲ့တာဝန်ရှိသူက ဧပြီ ၉ ရက်တွင် ပြောကြားသည်။
