ရန်ကုန်မြို့ မြောက်ဒဂုံမြို့နယ် ပြည်ထောင်စုလမ်းမပေါ်၌ စစ်ကောင်စီတပ်အား ပဒေသာမိုင်းအလုံး ၂၀ဖြင့်ပစ်မှတ်ထားတိုက်ခိုက်ခဲ့သည်ဟု မြို့ပြပြောက်ကျားအဖွဲ့ Little Heroes က ယနေ့(ဧပြီ ၁၂ ရက်)တွင် ထုတ်ပြန်သည်။
ယမန်နေ့(ဧပြီ ၁၁ ရက်) ည ၇နာရီကစ၍ UG Urban Gurellia Defence Force အပါအဝင် မဟာမိတ်ညီကိုရဲဘော်အဖွဲ့များသည် မိုင်တစ်ကြိမ် စတင်ဖောက်ခွဲကာ မိနစ်အနည်းအငယ်အကြာတွင် သုံးလုံးတွဲ၍ နောက်ထပ်တစ်ကြိမ်ဖောက်ခွဲခဲ့သည်ဟု ဆိုသည်။
ထို့နောက် အကြမ်းဖက်စစ်ကောင်စီတပ်က လာရောက်စစ်ဆေးခဲ့ရာတွင် ပဒေသာမိုင်းနှစ်လုံးဖြင့် ထပ်မံဖောက်ခွဲတိုက်ခိုက်ခဲ့ရာ အကြမ်းဖက် စစ်ကောင်စီတပ်သားသုံးဦး ထိခိုက်ဒဏ်ရာရကာ စစ်ကားထိခိုက်ပျက်စီးခဲ့သည်ဟု Little Heroesက အသိပေးသည်။
“ စုစုပေါင်း ခြောက်ကြိမ်ပေါက်တာ ။ပြီးတော့ စခ တွေက သေနတ် ငါးချက် ဖောက်တယ်။၁၀ နာရီကျော်က ပစ်တဲ့နှစ်ချက်တော့ ဆိုင်ကယ် စီးလာတဲ့သူ တွေကိုပစ်တယ်ပြောတယ်။ထိတဲ့သူတော့မရှိဘူး” ဟု ပြည်ထောင်စုလမ်းမအနီးနေထိုင်သူက People’s Springသို့ ပြောသည်။
ဖောက်ခွဲရန်ကျန်ရှိသော မိုင်းများအနက် (၈)လုံးကိုမူ စစ်ကောင်စီတပ်က ရှာဖွေသိမ်းဆည်းသွားခဲ့ကြောင်း ထုတ်ပြန်ချက်၌ ဖော်ပြသည်။
တော်လှန်ရေးအရှိန်မြင့်တင်နေရာ ပြည်သူများ အနေဖြင့် စစ်ကား၊ အကြမ်းဖက်စစ်ကောင်စီတပ်သားများအနီးမသွားလာကြရန် နှင့် မိမိနှင့်သက်ဆိုင်မှုမရှိသည့် အထုပ်များကို ထိတွေ့ကိုင်တွယ်ခြင်းများမပြုရန် မြို့ပြပြောက်ကျားအဖွဲ့က သတိပေးသည်။
ယမန်နေ့ညက မြောက်ဒဂုံမြို့နယ်တွင် ပေါက်ကွဲသံများဆက်တိုက်ကြားရ၍ လူငယ်မြို့ပြပြောက်ကျား တပ်ဖွဲ့များ ဘေးကင်းကြစေရန် လူမှုကွန်ရက်တွင် ရေးသားခဲ့သည်။ ထိုသို့ ဖြစ်ပြီးနောက် လျှပ်စစ်မီးလည်း ပြတ်တောက်သွားသည်ဟု ရန်ကုန်မြို့ခံများက ပြောသည်။
