၂၀၂၀ ရွေးကောက်ပွဲအနိုင်ရ လွှတ်တော်ကိုယ်စားလှယ်များအား အကြမ်းဖက်စစ်ကောင်စီက ရုပ်ပိုင်းဆိုင်ရာနှင့် ဥပဒေပိုင်းဆိုင်ရာ အရေးယူနေမှုများကို ရပ်တန့်ရန် နိုင်ငံတကာပါလီမန်များအဖွဲ့(IPU)က တောင်းဆိုလိုက်သည်။
(၂၀၉) ကြိမ်မြောက် IPU အမှုဆောင်ကောင်စီ အစည်းအဝေးတွင် မြန်မာလွှတ်တော်ကိုယ်စားလှယ်များ၏ လူ့အခွင့်အရေးချိုးဖောက်ခံရမှုများနှင့် စပ်လျဉ်းသည့် ဆုံးဖြတ်ချက်ကို အတည်ပြုရာ၌ ထည့်သွင်းတောင်းဆိုခြင်းဖြစ်သည်။
ရွေးကောက်ခံလွှတ်တော်ကိုယ်စားလှယ်အားလုံး၏ လူ့အခွင့်အရေးကို စစ်တပ်အာဏာပိုင်များက လေးစားလိုက်နာရန်၊ ကိုယ်စားလှယ်များအနေဖြင့် စစ်တပ်၏ အရေးယူမှုများကို ကြောက်ရွံ့ မှုမရှိဘဲ အပြန်အလှန်ဆက်သွယ်ဆောင်ရွက်ခွင့်၊ စုဖွဲ့ခွင့်၊ စုဝေးခွင့်၊ အမြင်များဖော်ပြခွင့်၊ သတင်း အချက်အလက်များကို ရယူ/ပေးအပ်ခွင့်၊ သွားလာခွင့်များကို တားမြစ်ခြင်းမပြုရန်လည်း IPU အမှုဆောင်ကောင်စီက တောင်းဆိုသည်။
IPU သည် ပြည်ထောင်စုလွှတ်တော်ကိုယ်စားပြုကော်မတီ(CRPH)အပါအဝင် ၂၀၂၀ ရွေးကောက်ပွဲအနိုင်ရလွှတ်တော်ကိုယ်စားလှယ်များနှင့်အတူ ရပ်တည်ကြောင်း ဆုံးဖြတ်ချက်၌ ဖော်ပြ သည်။
ဆက်လက်ပြီး မြန်မာနိုင်ငံတွင် ဒီမိုကရေစည်းမျဉ်းစည်းကမ်းများနှင့် လူ့အခွင့်အရေးများအပေါ် လေးစား လိုက်နာရေး ရှိစေရန်အတွက် IPU အဖွဲ့ဝင်လွှတ်တော်များ၊ အမြဲတမ်းလေ့လာသူများနှင့် အာဆီယံ ပါလီမန် များ ညီလာခံ (AIPA) အပါအဝင် လွှတ်တော်ညီလာခံများက ဖိအားပေးရေး၊ အကျပ်အတည်းဖြေရှင်းရေးတွင် အထောက်အကူဖြစ်စေရန် အရပ်သားများအပေါ် လက်နက်အသုံးပြုမှု ရပ်တန့်ရေး အပါအဝင် ယင်းကိစ္စရပ်များတွင် ပိုမိုလုပ်ဆောင်ရေးတို့ကို IPUက ဆုံးဖြတ်ချမှတ်သည်။
CRPH အနေဖြင့်လည်း စစ်အာဏာရှင်များ ကျဆုံးရေးနှင့် ဒီမိုကရေစီပြန်လည်ရရှိရေး ရည်မှန်းချက်များဖြင့် အကြမ်းဖက်စစ်တပ်က ကျူးလွန်လျက်ရှိသည့် ရာဇဝတ်မှုများ၊ လူ့အခွင့်အရေးချိုးဖောက်နေမှုများနှင့် စပ်လျဉ်း၍ စစ်တပ်မှ တာဝန်ခံမှုရှိစေရေးနှင့် စစ်တပ်အား အရေးယူဆောင်ရွက်နိုင်ရေးတို့အတွက် ကမ္ဘာ့နိုင်ငံများ၊ နိုင်ငံတကာလွှတ်တော်များ၊ လွှတ်တော်အဖွဲ့အစည်းများ၊ လွှတ်တော်ကိုယ်စားလှယ်များနှင့် လက်တွဲ ပူးပေါင်းလုပ်ဆောင်နေကြောင်း ထုတ်ပြန်သည်။