ပြည်သူလူထုသည် ယခုနှစ်သင်္ကြန်ရက်များကို တော်လှန်သင်္ကြန်အဖြစ် ပုံဖော်ကြရန်နှင့် အကြမ်းဖက်စစ်ကောင်စီ ၏ သင်္ကြန်အစီအစဉ်များတွင် လုံး၀မပါဝင်ကြရန် အမျိုးသားညီညွတ်ရေးအတိုင်ပင်ခံကောင်စီ (NUCC) က တိုက်တွန်းထုတ်ပြန်သည်။
အကြမ်းဖက်စစ်အုပ်စု၏ နိုင်ငံရေးအမြတ်ထုတ်ရန် ကြိုးပမ်းမှုကို ထိရောက်စွာ ချေဖျက်ရန် အရေးကြီးသည်ဖြစ်ရာ NUCCက ပြည်သူလူထုကို အလေးအနက်တိုက်တွန်းထုတ်ပြန်ခြင်းဖြစ်ကြောင်းဖော်ပြသည်။
ပြည်တွင်း၊ ပြည်ပ မီဒီယာများနှင့် လူမှုကွန်ရက်များတွင် အကြမ်းဖက်စစ်ကောင်စီ၏ သင်္ကြန်သတင်းများကို အမှောင်ချထားခြင်းဖြင့် ပူးပေါင်းပါဝင်ရန်၊ အနုပညာရှင်များနှင့် အခြားနယ်ပယ် အသီးသီးမှ ထင်ရှားကျော်ကြားသူများအနေဖြင့်လည်း ပြည်သူလူထုနှင့် လက်တွဲကာ တော်လှန် သင်္ကြန်လှုပ်ရှားမှုတွင်ပါဝင်ကြရန်၊ အကြမ်းဖက်စစ်အုပ်စု၏ သင်္ကြန်ကို ဆန့်ကျင်သပိတ်မှောက်ရန် NUCC က တိုက်တွန်းထားသည်။
အကြမ်းဖက်စစ်အုပ်စုသည် ဖျော်ဖြေရေးမဏ္ဍပ်များ၊ လမ်းလျှောက်သင်္ကြန်များပြုလုပ်ကာ ပြည်သူလူထုက စစ်အုပ်ချုပ်ရေးကို အသားကျသွားပြီး စစ်အုပ်ချုပ်ရေးယန္တရားပုံမှန်ဖြစ်လေဟန် ပြည်တွင်း၊ ပြည်ပကို လိမ်လည်လှည့်ဖျား၍ နိုင်ငံရေးအမြတ်ထုတ်ရန် ကြိုးပမ်းနေကြောင်း NUCC က ထုတ်ပြန်သည်။
သို့သော် အကြမ်းဖက်စစ်အုပ်စုသည် လက်ရှိအချိန်တွင် နိုင်ငံတဝန်း၌ စီးနင်းဝင်ရောက်ခြင်း၊ ဖမ်းဆီးခြင်းနှင့် ပိတ်ဆို့ စစ်ဆေးခြင်းများကို လုပ်ဆောင်နေပြီး သင်္ကြန်ကာလ ပျော်ပွဲရွှင်ပွဲများကို အခွင့်ကောင်းယူကာ အကြမ်းဖက်ဖိနှိပ်မှုများကို ပိုမိုတိုးမြှင့်လုပ်ဆောင်လာနိုင်သည့် အန္တရာယ် ရှိနေကြောင်း NUCCက သတိပေးသည်။
ထို့ကြောင့် သင်္ကြန်ကိုခုတုံးလုပ်ကာ မသမာသည့်နည်းလမ်းပေါင်းစုံဖြင့် နိုင်ငံရေးအရ အမြတ်ထုတ်ရန် ကြိုးပမ်းနေသည့် အကြမ်းဖက်စစ်အုပ်စု၏ ဟန်ဆောင်လိမ်ညာသောလုပ်ရပ်များကို NUCCက အပြင်းအထန်ကန့်ကွက်ရှုတ်ချလိုက်ကြောင်း ထုတ်ပြန်သည်။