▪️ယမန်နေ့ညတိုက်ပွဲတွင် စစ်ကောင်စီတပ် အလောင်းပြန်စွဲသွားသည့် အရာများတွေ့ရဟု PDFတပ်မှူးပြော
ကရင်အမျိုးသားအစည်းအရုံး(KNU) တပ်မဟာ(၆) နယ်မြေ လေးကေ့ကော်ဒေသရှိ KNU ဦးဆောင်သည့် ပူးပေါင်းတပ်ဖွဲ့ဝင်များ၏ ကော်ဘရာစစ်ကြောင်း တပ်စွဲရာသို့ ထိုးစစ်ဆင်လာသည့် စစ်ကောင်စီ တပ်ထံမှ လက်နက်ခဲယမ်းများ ထပ်မံရရှိခဲ့ကြောင်း ကော်ဘရာစစ်ကြောင်းက သတင်းထုတ်ပြန်သည်။
ယမန်နေ့ (ဧပြီ ၁၄ရက်) ည ၁၁ နာရီခန့်မှစ၍ ထိုးစစ်ဆင်လာသည့် စစ်ကောင်စီတပ်ကို ကော်ဘရာစစ်ကြောင်း တပ်ဖွဲ့ဝင်များက ခုခံတိုက်ခိုက်ခဲ့ရာ ယနေ့ (ဧပြီ ၁၅ရက်) နံနက် ၃နာရီခွဲအထိ တိုက်ပွဲပြင်းထန်စွာဖြစ်ခဲ့သည်ဟုဆိုသည်။ ထို့နောက် စစ်ကောင်စီတပ်များ အထိနာပြီး ပြန်လည်ဆုတ်ခွာသွားရာ ကော်ဘရာစစ်ကြောင်းမှ နယ်မြေရှင်းလင်းရေး ဆောင်ရွက်ခဲ့ကြောင်း ဖော်ပြထားသည်။
ယနေ့နံနက် ကော်ဘရာစစ်ကြောင်း၏ ကနဦးသတင်းထုတ်ပြန်ချက်၌ စစ်ကောင်စီတပ်၏ စစ်အသုံးအဆောင်ပစ္စည်းများ၊ ကျည်များ သိမ်းဆည်းရမိကြောင်း ဖော်ပြထားပြီး ထပ်မံ၍လည်း လက်နက်ကြီးကျည်များအပါအဝင်ကျည်နှင့် ခဲယမ်းအများအပြား သိမ်းဆည်းရမိခဲ့သည်ဟု ကော်ဘရာစစ်ကြောင်းက ယနေ့ညပိုင်း၌ ထုတ်ပြန်သည်။
Public Service Announcement
“အလောင်းတွေတော့မတွေ့ဘူး။အလောင်းတွေက သူတို့ ပြန်စွဲသွားတယ်။ သွေးကွက် တွေနဲ့ သွေးလမ်းကြောင်းတွေပဲ တွေ့တယ်။ အတိအကျ မသိနိုင်ပေမယ့် အော်သံတွေ ကြားတယ် တော်တော်တော့ထိကြတယ်” ဟု အဆိုပါဒေသရှိ ပြည်သူ့ကာကွယ်ရေးတပ်(PDF) တပ်မှူးတစ်ဦးက ပြောသည်။
စစ်ကောင်စီတပ်အနေဖြင့် ပူးပေါင်းတပ်၏ စခန်းအား တိုက်ခိုက်သိမ်းပိုက်နိုင်မည်အထင်ဖြင့် ထိုးစစ်ဆင်လာသော်လည်း အထိနာပြီး ပြန်လည်ဆုတ်ခွာသွားကြောင်း တိုက်ပွဲဖြစ်ပြီးနောက်ပိုင်းမှ ယခု ညပိုင်းအချိန်ထိ စစ်ရေးငြိမ်သက်နေပြီး စစ်ကောင်စီတပ်မှ လှုပ်ရှားမှုကို မတွေ့ရကြောင်း အဆိုပါတပ်မှူးက ပြောသည်။
ကော်ဘရာစစ်ကြောင်းမှ ထပ်မံသိမ်းဆည်းရမခဲ့သည့် ခဲယမ်း၊ ကျည်များမှာ (၆၀)မမ ဗုံးသီး ၁၈ လုံး၊ (၈၁) မမ တစ်လုံး၊ RPG လေးလုံး၊ ပို့ယမ်း သုံးထုပ်၊ 5.56 ကျည် ၃၀၀ တောင့်၊ 7.62 စနိုက်ပါကျည် ၁၀၀တောင့်၊ ခြေနင်းမိုင်း ၁ လုံး၊ MA 1ကျည်အိမ် ၉ ခုတို့ ဖြစ်သည်ဟု ဖော်ပြထားသည်။
