ရန်ကုန်မြို့၊ သာကေတမြို့နယ်၌ ကင်းပုန်းဝပ်နေသည့် အကြမ်းဖက်စစ်ကောင်စီတပ် ကားတစ်စီးအတွင်းသို့ လက်ပစ်ဗုံး ထည့်သွင်းတိုက်ခိုက်ခဲ့ရာ နှစ်ဦးသေဆုံးကြောင်း ရန်ကုန်တိုင်းစစ်ဒေသခွဲကွပ်ကဲရေးအဖွဲ့ တာဝန်ရှိသူက People’s Springသို့ ပြောသည်။
ဖြစ်စဥ်မှာ ယမန်နေ့(ဧပြီ ၁၅ ရက်) ည ၉နာရီတွင် သာကေတမြို့နယ်အတွင်း ဆောင်ရွက်ခဲ့ခြင်းဖြစ်ကာ “နန်းထိုက်အောင်” စစ်ဆင်ရေး၏ အစိတ်အပိုင်းဖြစ်သည်ဟု ဆိုသည်။
“ကင်းပုန်းဝပ်နေတဲ့ ကားထဲကို လက်ပစ်ဗုံးနဲ့ပစ်ပြီးတိုက်ခိုက်ခဲ့ပါတယ်။၂ကောင်သေ၊ ၁ကောင်ဒဏ်ရာရတယ်။နန်းထိုက်အောင်စစ်ဆင်ရေးအနေနဲ့ တော်လှန်ရေးရဲဘော်တွေက အတွင်းဖရဲသီး ဖုန်းဆက်ပြောလို့ မစ်ရှင်လုပ်ခဲ့တာပါ။ မစ်ရှင်ပြီးပြီးချင်း စစ်ခွေးတွေ ရောက်လာပြီး သေတဲ့၂ကောင်ကို တရွတ်တိုက်ဆွဲပြီး ကားပေါ်တင်သွားကြတယ်”ဟု အထက်ပါတာဝန်ရှိသူက ပြောသည်။
ယမန်နေ့ည ၉ နာရီခန့်ကလည်း ပေါက်ကွဲသံကြားရပြီးနောက် ရူ့ခင်းသာလမ်းမကြီးမှတစ်ဆင့် အရေးပေါ်ကားတစ်စီး ဖြတ်သန်းသွားသည်ဟုလည်း သာကေတမြို့နေသူတစ်ဦးက အတည်ပြုသည်။
“နန်းထိုက်အောင်” စစ်ဆင်ရေးကို ဧပြီ ၁၅ရက်ကလည်းကော့မှူးမြို့နယ်တွင် ဆောင်ရွက်ခဲ့ပြီး ရန်သူစစ်ကောင်စီတပ်သား တစ်ဦးသေ၊ အများအပြား ပြင်းထန်ဒဏ်ရာရကြောင်း သိရသည်။
အလားတူ ဧပြီ ၈ရက်ကစ၍ မင်္ဂလာဒုံ၊ အင်းစိန် ၊ ကမာရွတ်၊လမ်းမတော်၊ ကော့မှုး၊ တွံတေး၊ သုံးခွ၊ ရွှေပြည်သာ နှင့် လှိုင်သာယာမြို့နယ်တို့တွင်”နန်းထိုက်အောင်” စစ်ဆင်ရေးအရ ပစ်ခတ်ဖောက်ခွဲမှုများပြုလုပ်ခဲ့သည်။
ထိုတိုက်ခိုက်မှုများတွင် စစ်ကောင်စီတပ်မှ ဗိုလ်မှူးတစ်ဦး၊ရဲတပ်သားတစ်ဦး အပါအဝင် စစ်ကောင်စီထောက်တိုင် အုပ်ချုပ်ရေးမှူးနှင့် ဒလန်ငါးဦးထက်မနည်း သေဆုံးခဲ့သည်။