'/%3E%3C/svg%3E){kind=small}
မန္တလေးတိုင်း ၊သပိတ်ကျင်းမြို့နယ် ချောင်းကြီး ကျေးရွာရှိ ရဲကင်းစခန်းအနီးတွင် ယနေ့(ဧပြီ ၁၆)နေ့လည်ပိုင်း၌ TBK တောဆင်ရိုင်းပြောက်ကျားတပ်ဖွဲ့က ဗုံးဖောက်ခွဲတိုက်ခိုက်ရာ စစ်ကောင်စီတပ်ဖွဲ့ဝင် ၂ ဦးသေဆုံးပြီး ဗိုလ်ကြီးအပါအဝင် ၃ ဦးဒဏ်ရာအပြင်းအထန်ရရှိကြောင်း အဆိုပါအဖွဲ့ကထုတ်ပြန်သည်။
ယနေ့ ညနေ သုံးနာရီခွဲခန့်တွင်ပြုလုပ်သော တိုက်ခိုက်မှုတွင်စစ်ကောင်စီဝင် ၂ဦးမှာ နေရာတွင်ပွဲချင်းပြီးသေဆုံးခဲ့ပြီး သုံးပွင့်ဗိုလ်ကြီးတစ်ဦး၊ရဲကင်းစခန်းမှူးတစ်ဦးနှင့် ချောင်းကြီးကျေးရွာ စစ်ကောင်စီခန့် အုပ်ချုပ်ရေးမှူး ဖိုးထောင်တို့ ပြင်းထန်စွာ ထိခိုက်ဒဏ်ရာရရှိခဲ့ကြောင်းလည်းဒေသခံအချို့ထံမှ သိရသည်။ချောင်းကြီးရွာသည်သပိတ်ကျင်းမြို့နှင့် ဆိုင်ကယ်ဖြင့်သွားလျှင် တစ်နာရီဝန်းကျင်မောင်းရသောအကွာအဝေးတွင်ရှိသည်။
”မနက်တုန်းက အိမ်စီးကားလေးနဲ့ (စစ်ကောင်စီတပ်က)ကင်းပတ်နေကြတာ ၊ ဒီနေ့ နေ့လည်ပိုင်း ၃နာရီခွဲ လောက်မှာ ရဲကင်းထိပ်ဘက်က အုံးဆိုပြီး အသံအကျယ်ကြီး ကြားလိုက်ရတာ။ ပြီးတော့ သေနတ် ၅ချက်လောက် ဆက်တိုက်ဖောက်တော့တာဘဲ” ဟု ဒေသခံတစ်ဦးကပြောသည်။
အဆိုပါတိုက်ခိုက်မှုကိုTBK တောဆင်ရိုင်းပြောက်ကျားတပ်ဖွဲ့ နှင့်လက်အောက်ခံအဖွဲ့ဝင် ဗိုလ်တေဇ(02)မှ ဖောက်ခွဲတိုက်ခိုက်ခဲ့ခြင်းဖြစ်သည်။
Public Service Announcement
စစ်ကောင်စီဘက်မှ အထိ့နာခဲ့မှုနှင့်ပတ်သပ်၍ အခြားဒေသခံတစ်ဦးကလည်း”ပထမ တခါ မတ်တူးကား အနောက်အဖုံးထဲမှာထည့်ပြီး တစ်ယောက်သယ်သွားတာ မြင်လိုက်တာ။ ခဏနေတော့ နာရေးကားနှစ်စီးနဲ့ သယ်ပြီး ကြာအင်းစစ်ဆေးရုံဘက် ကို မောင်းသွားကြတာ”ဟု ပြောသည်။
ယနေ့တိုက်ခိုက်မှုမှာ TBK တောဆင်ရိုင်းပြောက်ကျားအဖွဲ့၏ ပထမဆုံးစစ်ရဆင်ရေးဖြစ်ပြီး တပ်ဖွဲ့ဝင်အားလုံးစစ်ဆင်ရေးပြီးနောက်အောင်မြင်စွာဆုတ်ခွာနိုင်ခဲ့ကြောင်းလည်း အဖွဲ့၏ သတင်းတာဝန်ခံကပြောသည်။
TBKတောဆင်ရိုင်းပြောက်ကျားတပ်ဖွဲ့အနေဖြင့် သပိတ်ကျင်းမြို့နယ်အတွင်းစစ်ကောင်စီ အပါအဝင် စစ်ကောင်စီလက်အောက်ခံ မည်သည့်အဖွဲ့အစည်းကိုမဆို သက်ညှာမှူ့မရှိဘဲ တိုက်ခိုက်သွားမည်ဖြစ်ကြောင်း ထုတ်ပြန်ချက်တွင် ဖော်ပြထားသည်။
ပြည်သူများအနေဖြင့် စစ်ကောင်စီတပ်ဖွဲ့ဝင်များ ၊အုပ်ချုပ်ရေးမှူးများ ၊ဒလံများ နှင့်နီးနီးကပ်ကပ်မနေရန်လည်းအသိပေးသည်။ထိုအပြင် စစ်ဆင်ရေးများထပ်မံပြုလုပ်နိုင်ရေး ရန်ပုံငွေလိုအပ်သဖြင့် ပြည်သူများအနေဖြင့်ထည့်ဝင်ကူညီပေးကြရန်လည်း အထက်ပါ တာဝန်ရှိသူကမေတ္တာရပ်ခံသည်။
