ပြည်သူ့ရင်ခွင်ကိုခိုလှုံလာသူ စစ်ကောင်စီတပ်ဖွဲ့ဝင် အင်အားဟာ ဦးရေ တစ်သောင်းနီးပါးရှိလာပြီလို့ အမျိုးသားညီညွှတ်ရေးအစိုးရ (NUG) ရဲ့ပြည်ထောင်စုဝန်ကြီးချုပ်မန်းဝင်းခိုင်သန်းက ဒီနေ့မှာကျင်းပတဲ့ လွှတ်တော်အစည်းအဝေးမှာပြောလိုက်ပါတယ်။
ဒီလိုပြည်သူ့ရင်ခွင် ခိုဝင်လာသူတွေဟာ စစ်ကောင်စီလက်အောက်မှာဆက်လက်တာဝန်မထက်ဆောင်လိုသူတွေ ၊လူထုကို နှိပ်စက်ညှင်းပမ်း သတ်ဖြတ်တာတွေမလုပ်ချင်တဲ့သူတွေဖြစ်တယ်လို့ ဝန်ကြီးချုပ်က ဆိုပါတယ်။
ဒါအပြင် အကြောင်းအမျိုးမျိုးကြောင့် အပြင်ကိုမထွက်လာဘဲ အတွင်းထဲကနေ ချိတ်ဆက်တော်လှန်နေကြသူတွေလည်းရှိတယ်လို့ ပြောပါသေးတယ်။
ဒီလိုအတွင်းထဲက ချိတ်ဆက်တော်လှန်နေကြသူတွေထံကနေ တန်ဖိုးရှိတဲ့သတင်းအချက်တွေရနေတယ်လို့လည်းဝန်ကြီးချုပ် မန်းဝင်းခိုင်သန်းကပြောပါတယ်။
Public Service Announcement
ရှေ့တန်းမှာရှိတဲ့စစ်ကောင်စီတပ်ရင်းတပ်ဖွဲ့တွေဟာလည်း နီးစပ်ရာ တော်လှန်ရေးအဖွဲ့အစည်းတွေ ၊တိုင်းရင်းသားလက်နက်ကိုင်အဖွဲ့အစည်း တွေထံ လက်နက်ချ ခိုလှုံလာတာမျိုးတွေလည်းရှိလာနေတယ်လို့ ဝန်ကြီးချုပ်က အသိပေးပါသေးတယ်။
NUG အစိုးရ တစ်နှစ်ပြည့် အထိမ်းအမှတ်အဖြစ် လူထုကိုပြောကြားတဲ့ မိန့်ခွန်းမှာ ယာယီသမ္မတ က စစ်ကောင်စီကို စွန့်ခွာလိုသူတွေအတွက် ပြည်သူ့ရင်ခွင်အစီအစဉ်ကို စီစဉ်ပေးထားပြီး သွေးမြေမကျတဲ့အတွက် နိုင်ငံတကာအနေနဲ့ ကူညီပေးကြဖို့ကိုလည်းတိုက်တွန်းထားတာရှိပါတယ်။
ပြီးခဲ့တဲ့ လပိုင်းကတော့ စစ်ကောင်စီကို စွန့်ခွာလာသူ တပ်ဖွဲ့ဝင်တွေအတွက် သြစတြေးလျ နိုင်ငံက ခိုလှုံခွင့်ဗီဇာပေးမယ်လို့ ထုတ်ပြန်လာပြီးနောက်မှာ ဒီသတင်းဟာ စစ်ကောင်စီ တပ်တွင်းကိုအကြီးအကျယ်ထိတ်လန့်စေခဲ့ပါတယ်။
ဒါကြောင့် စစ်ကောင်စီခေါင်းဆောင်ပိုင်းတွေဟာ တပ်တွင်းစည်းရုံးရေးကို မြေပြင်ဆင်းပြီး စည်းရုံးပြောဆိုတာတွေတောင်လုပ်လာရပါတယ်။
