မန္တလေးတိုင်း မတ္တရာမြို့နယ် သဖန်းကိုင်းကျေးရွာမှ နေအိမ်များကို မီးရှို့သွားသည့် စစ်ကောင်စီတပ်သည် သဖန်းကိုင်းကျေးရွာမှပြန်အထွက်တွင် မိုင်းဆွဲတိုက်ခိုက်ခံခဲ့ရကြောင်း ဒေသခံက သတင်းပေးပို့သည်။
ဧပြီ ၁၉ရက် နံနက် ၃နာရီ ၁၀မိနစ်၌ သဖန်းကိုင်းရွာမှ နေအိမ်ရှစ်လုံးကို စစ်ကောင်စီတပ်က မီးရှို့ပြီး ဒေသခံတစ်ဦးကို ဖမ်းသွားသည်ဟု ဆိုသည်။
“အောင်ကျော်စိုးဆိုတဲ့ တစ်ယောက်က အဖမ်းခံရတယ် မီးရှို့ခံရတယ်။ ပြီးတော့ သူ့ရဲ့ယောက္ခမ အိမ်မီးရှို့ခံရတယ်။ သူတို့အိမ်တွေအပါ အားလုံးပေါင်း အိမ် ၈လုံးပေါ့ အဲဒါမီးရှို့သွားတယ်”ဟု ၎င်းက ပြောသည်။
ထို့နောက် စစ်ကောင်စီတပ်သည် အုတ်ထင်းသယ်သည့် ကား ၂စီး၊ ဆိုင်ကယ် ၂စီးဖြင့်ထွက်သွားရာ မြောင်းသစ်ရွာအလွန်၌ မိုင်းဆွဲတိုက်ခိုက်ခံရသည်ဟု ဆိုသည်။
“မြောင်းသစ်ရွာအလွန်မှာ၄နာရီ ၁၅လောက်မှာ မိုင်း သုံးလုံးဆွဲသံကြားတယ်။ပစ်ခတ်သံတွေ။ သဖန်းကိုင်းမှာရွာမီးရှို့တုန်းကလည်း တောက်လျှောက်ပစ်ခတ်ရင်းနဲ့ မီးရှို့တာ” ဟု ဒေသခံက ပြောသည်။ ထိုသို့ တိုက်ခိုက်မှုကြောင့် စစ်ကောင်စီတပ်မှ ထိခိုက်မှုရှိ၊မရှိ မသိရသေးဟုဆိုသည်။
သဖန်းကိုင်းရွာကို စစ်ကောင်စီတပ်က ၂၀၂၁ အောက်တိုဘာတွင် စတင်မီးရှို့ခဲ့ပြီး ကျေးရွာအနီးတောတဲတိုက်များကို မီးရှို့ခြင်းအပါအဝင် မီးရှို့သည့်အရေ အတွက် ငါးကြိမ်ခန့်ရှိပြီဟု ဆိုသည်။