ကေအဲန်ယူ-သထုံခရိုင် ဘီးလင်းမြို့နယ်အတွင်းမှာ စစ်ကောင်စီက ကျေးရွာတွေကို လက်နက်ကြီးနဲ့ပစ်ခတ်လို့ ဒေသခံအရပ်သားပြည်သူ (၇၀၀၀) နီးပါး ထွက်ပြေးတိမ်းရှောင်ခဲ့ရပြီး အခြေခံစားသောက်ကုန်နဲ့ ဆေးဝါးတွေ လိုအပ်တယ်လို့ ကေအဲန်ယူက သတင်းထုတ်ပြန်ထားပါတယ်။
ပြီးခဲ့တဲ့ ဧပြီ ၂၃ ရက်ကစပြီး ဘီးလင်းမြို့နယ်အတွင်းမှာ KNLA KNDO တပ်နဲ့ စစ်ကောင်စီ နယ်ခြားစောင့်တပ်(BGF) ပူးပေါင်းတပ်တွေအကြား စစ်ရေးတင်းမာမှုတွေရှိလာခဲ့ပြီး စစ်ကောင်စီက လူနေထိုင်ရာကျေးရွာတွေအပေါ် လက်နက်ကြီးနဲ့ ပစ်ခတ်ခဲ့တာပါ။
ဒီလိုပစ်ခတ်မှုကြောင့် ဘီးလင်းမြို့နယ် မြစ်ကျိုးကျေးနယ်အတွင်း ကျေးရွာပေါင်း ၉ ရွာက လူဦးရေ (၇၀၀၀) နီးပါးဟာ နေရပ်စွန့်ခွာပြီး ဘေးလွတ်ရာဒေသကို ထွက်ပြေးတိမ်းရှောင်နေရကာ ဆန်၊ ဆေးဝါးနဲ့ အခြေခံ စားသောက်ကုန်တွေ လိုအပ်လျက်ရှိနေတယ်လို့ ထုတ်ပြန်ချက်မှာ ဖော်ပြထားပါတယ်။
ဧပြီ ၂၃ ရက်ညကလည်း စစ်ကောင်စီရဲ့ လက်နက်ကြီးပစ်ခတ်မှုကြောင့် ဒေါဇံကြီးကျေးရွာက ကလေးတစ်ဦးနဲ့ အဘွားတစ်ဦး ထိခိုက်ဒဏ်ရာရရှိခဲ့သေးပြီါး လူနေအိမ်ငါးလုံး လက်နက်ကြီးထိမှန်ပျက်စီးခဲ့သေးတာပါ။
ဒါ့အပြင် ဧပြီ ၂၄ ရက် ည ၇ နာရီအချိန်ခန့်က လေးကေကျေးရွာမှာအခြေချတဲ့ စစ်ကောင်စီ BGF ပူးပေါင်းစခန်းကနေ လက်နက်ကြီးနဲ့ ပစ်ခတ်တာကြောင့် လေးကေကျေးရွာအတွင်း နေအိမ်သုံးလုံး ထိမှန်ပျက်စီးခဲ့တယ်လို့ ထုတ်ပြန်ချက်မှာ ပါရှိပါတယ်။
ဘီးလင်းမြို့နယ်အတွင်းမှာ စစ်ကောင်စီက လေယာဉ်နဲ့ လာရောက်ပစ်ခတ်မှာကို စိုးရိမ်တဲ့အတွက် ဘေးလွတ်ရာကို ထွက်ပြေးတိမ်းရှောင်နေတာတွေလည်းရှိနေတယ်လို့ ကေအဲန်ယူ-ဘီးလင်းမြို့နယ် သတင်းနဲ့ပြန်ကြားရေးဌာနခွဲ့ သတင်းပေးပို့ထားပါတယ်။
ဘီးလင်းမြို့နယ်အတွင်းရှိ စစ်ကောင်စီBGF ပူးပေါင်းတပ်ရဲ့ လေးကေနဲ့ ဝင်းတာပန်စခန်းနှစ်ခုကို ဧပြီ ၂၃ ရက်နေ့နောက်ဆုံးထားပြီး ထွက်ခွာပေးဖို့ KNDO တပ်ရင်း(၂)ဌာနချုပ်က ထုတ်ပြန်ကြေငြာခဲ့ပြီး စစ်ကောင်စီက လိုက်နာမှုမရှိတဲ့အတွက် စစ်ရေးတင်းမာတဲ့အခြေအနေတွေ ရှိလာခဲ့တာဖြစ်ပါတယ်။