စစ်ကောင်စီတပ်ဖွဲ့ဝင်များ CDM ပြုလုပ်ပြီး ပြည်သူ့ရင်ခွင်သို့ ခိုလှုံရန် ကြိုဆိုနေမှုကို လက်မခံဘဲ စစ်မြေပြင်ကို ရွေးပါက တူမီးက စကားပြောလိမ့် မည်ဖြစ်ကြောင်း မင်းတပ် ချင်းကာကွယ်ရေးတပ် (CDF) က သတင်း စကားပါးသည်။
ဧပြီ ၂၄ရက်တွင် ကျရောက်သည့် တူမီးဖြင့် စတင်တော်လှန်ခဲ့သည့် မင်းတပ် CDF ၏ တော်လှန်ရေးတစ်နှစ်ပြည့် အခမ်းအနားတွင် ဆလိုင်းလိုရာမိုး၏ တူမီးတော်လှန်ရေးကဗျာကို ဖတ်ကြားခဲ့သည်။
“ကမ်းလက်လှမ်းထားတယ်။ ပြည်သူ့ရင်ခွင်က ကြိုဆိုပေးနေတယ်။ စစ်မြေပြင်ကိုမှ ခင်ဗျားရွေးရင် တူမီးက စကားပြောလိမ့်မယ်။ချင်းတစ်ယောက်ဟာ သေနတ်တစ်လက်လွယ်တဲ့အခါ ကြောက်စရာကောင်းတဲ့အကြောင်း ခင်ဗျားတို့ဆီ သတင်းစကားမလာဘဲနဲ့ သိရမယ်။တူမီးပြောတဲ့ စကားသံအောက်မှာ အဓမ္မတွေနိဂုံးချုပ်ရမယ်။ ဖက်ဆစ်ဝါဒီတွေကျရှုံးရမယ်။ တူမီးသံဟာ စစ်မိစ္ဆာတွေလန့်ဖြတ်ရတဲ့ ဂါထာသံဆိုလည်း ဟုတ်တယ်” ဟု မင်းတပ် CDF တာဝန်ရှိသူ တစ်ဦးက အခမ်းအနားတွင် ကဗျာဖတ်ကြားသည်။
အခြေအနေ အချိန်အခါအရ လက်နက်ခဲယမ်း တောင့် တင်းအောင် ကြိုးစားနေချိန်ဖြစ်ကြောင်း ၎င်း အဆိုပါ မင်းတပ် CDF တာဝန်ရှိသူက ၎င်းမိန့်ခွန်း၌ ထည့်သွင်း ပြောကြားသည်။
Public Service Announcement
“မောင်းပြန်ဖြစ်မှ မောင်းပြန်ကိုင်ရမှ ရှေ့တန်းသွားမယ်ဆိုတဲ့ စိတ်ဓာတ်မမွေးကြပါနဲ့” ဟု ၎င်းက ဆိုသည်။
သေနတ်ကိုင်သည့် တပ်ဖွဲ့ဝင်များ ဖြစ်၍ စည်းကမ်းရှိရမည်ဖြစ်ပြီး အမိန့်နာခံမှုရှိရမည်ဖြစ်ကြောင်း၊ ပြည်သူကို အမိအဖကဲ့သို့ ဆက်ဆံရမည်ဖြစ်ကြောင်း အဆိုပါ တာဝန်ရှိသူက ပြောသည်
“ပြည်သူ့ရဲ့ထောက်ခံမှုမရှိဘဲ ကျွန်တော်တို့ တော်လှန်ရေးအောင်မြင်မှာ မဟုတ်ပါဘူး။ ဒါကြောင့် ပြည်သူနဲ့ထိတွေ့ဆက်ဆံတဲ့အချိန်မှာ မိဘနဲ့ထိတွေ့ဆက်ဆံသလို ထိတွေ့ဆက်ဆံပေးဖို့လိုချင်တယ်” ဟု ၎င်းက ပြောသည်။
ပြည်သူများ၏ အခက်အခဲကိုတက်နိုင်သလောက် ဖြေရှင်းပေးရေး အမြဲတမ်းအာရုံစိုက်ကြရန်လည်း မင်းတပ် CDF တာဝန်ရှိသူက ပြောသည်။
“ကျွန်တော်တို့ လက်နက်ကိုင်တယ်ဆိုတာ အာဏာလိုချင်လို့ လက်နက်နဲ့ သာယာတဲ့ ဘ၀တစ်ခုကို တည်ဆောက်ချင်လို့ လက်နက်ကိုင်တာ မဟုတ်ပါဘူး။ ကျွန်တော်တို့ တပ်ဖွဲ့ဝင်တွေရဲ့ အန္တိမ ပန်းတိုင်ဟာ ချင်းပြည်နယ်နဲ့ ချင်းပြည်သူလူထုကို ကာကွယ်စောင့်ရှောက်ဖို့ဖြစ်တယ်ဆိုတာ ဘယ်တော့မှ မမေ့ပါနဲ့” ဟု၎င်းက ပြောကြားသည်။
ပြည်သူကို ကာကွယ်စောင့်ရှောက်ပေးရန်အတွက် လက်နက်ကိုင်ခြင်းဖြစ်၍ မိမိတို့၏ ရပ်တည်ချက်ကို မဖောက်ဖျက်မိအောင် ကြိုးစားကြရန်လည်း မင်းတပ် CDF တာဝန်ရှိသူက ပြောကြားသည်။
မင်းတပ် CDFသည် စစ်ကောင်စီတပ်များကို တူမီးသေနတ်များဖြင့် စတင်တော်လှန်ခဲ့ရာ မင်းတပ်မြို့အနီး ကနဦးဖြစ်ပွားခဲ့သည့် တိုက်ပွဲများ၌ပင် လက်နက်အင်အားသာလွန်သည့် စစ်ကောင်စီတပ်ကို အထိနာအောင် တိုက်ခိုက်နိုင်ခဲ့ပြီး ခုခံတော်လှန်သည့် တိုက်ပွဲများဆက်တိုက် ဆင်နွှဲခဲ့သည့် ချင်းကာကွယ်ရေးတပ်ဖွဲ့ဖြစ်သည်။
