အာဆီယံခေါင်းဆောင်များချမှတ်သည့် ဘုံသဘောတူဆုံးဖြတ်ချက် ၅ရပ်ကို စစ်ကောင်စီ၏ ပူးပေါင်းဆောင် ရွက်ခြင်းမရှိသည့်အပေါ် ရှုတ်ချကြောင်း ပြင်သစ်နိုင်ငံခြားရေးဝန်ကြီးဌာနက ထုတ်ပြန်သည်။
ပြီးခဲ့သည့် ၂၀၂၁ ဧပြီ ၂၄ ရက်တွင် အာဆီယံခေါင်းဆောင်များ ဆုံးဖြတ်ချမှတ်ခဲ့သည့် သဘောတူညီချက်များကို အကြမ်းဖက်စစ်ကောင်စီက လိုက်နာဆောင်ရွက်ခြင်းမရှိ၍ ကန့်ကွက်ရှုတ်ချ ခဲ့ခြင်းဖြစ်ပြီး မြန်မာလုံခြုံရေးတပ်ဖွဲ့များ ကျူးလွန်သည့် အကြမ်းဖက်မှုများကို ချက်ချင်းရပ်တန့်ရန်၊ လူသားချင်းစာနာမှုအကူအညီများပေးအပ်နိုင်ရေးအတွက် အတားအဆီးများကို ဖယ်ရှားရန် တို့ကိုလည်း ပြင်သစ်က တောင်းဆိုသည်။
အထူးသဖြင့် အမျိုးသားညီညွတ်ရေးအစိုးရ (NUG)၊ ပြည်ထောင်စုလွှတ်တော် ကိုယ်စားပြု ကော်မတီ (CRPH) နှင့် အခြားသော ဒီမိုကရေစီ အင်အားစုများ ပါဝင်သော နိုင်ငံရေး ဆွေးနွေးပွဲများအတွက် ထပ်မံတောင်းဆိုကြောင်း ပြင်သစ်က ထုတ်ပြန်သည်။
တိုင်းပြည်၏ အကျပ်အတည်းကို အဆုံးသတ်ရန် အရေးကြီးသောကြောင့် ယင်းသို့ တောင်းဆိုရ ခြင်းဖြစ်ကြောင်းလည်း ဖော်ပြသည်။
ဒီမိုကရေစီရရှိရေးအတွက် ဆင်းရဲဒုက္ခများနှင့် ဖိနှိပ်မှုများကြားမှ အဆက်မပြတ် ပြန်လည်ရှင်သန်လာနေသည့် မြန်မာလူမျိုးများ၏ သတ္တိနှင့် မယိမ်းယိုင်သောကြိုးပမ်းမှုကို ချီးကျူးလိုပြီး မြန်မာပြည်သူများအပေါ် ထောက်ခံမှုကိုလည်း ထပ်မံအတည်ပြုကြောင်း ပြင်သစ်က ထုတ်ပြန် သည်။
ထို့အပြင် မြန်မာပြည်သူလူထု၏ဆန္ဒကို လေးစားကာ မြန်မာနိုင်ငံအကျပ်အတည်း အဆုံးသတ်ရေး နိုင်ငံရေးအရ ဖြေရှင်းမှုရရှိရန် အာဆီယံအသင်းနှင့် အဖွဲ့ဝင်နိုင်ငံများ၏ ကြိုးပမ်းဆောင်ရွက်ချက်ကို ပြင်သစ်က ထောက်ခံကြောင်း ထပ်လောင်းပြောသည်။