စစ်ကောင်စီတပ်သားသုံးဦး သုတ်သင်နိုင်ပြီး လက်နက်ခဲယမ်းများရရှိခဲ့
စစ်ကောင်စီတပ်ဖွဲ့ဝင်များ ရှိနေသည့် ဗန်းမောက်မြို့အဝင်စစ်ဆေးရေးဂိတ်ကို အင်းတော်ပြည်သူ့ကာကွယ်ရေးတပ်ဖွဲ့က ယနေ့ တိုက်ခိုက်ခဲ့ရာ စစ်ကောင်စီဘက်မှ သုံးဦး သေဆုံးခဲ့သည်။
ဗန်းမောက်မြို့အဝင်စစ်ဆေးရေးဂိတ်ကို အင်းတော်ပြည်သူ့ကာကွယ်ရေးတပ်ဖွဲ့က ယနေ့(ဧပြီ ၂၆ရက်) နေ့လယ် ၂နာရီခန့်တွင် တိုက်ခိုက်ခဲ့ခြင်းဖြစ်သည်။
“အပြန်အလှန်ပစ်ကြသေးတယ်။ ခဏနေတော့ စစ်ခွေးတွေဘက်က ထွက်ပြေးတယ်။
ရဲနှစ်ယောက်၊ မီးသတ်တစ်ယောက်သေတယ်။ ကလေးတွေ( ပြည်သူ့ကာကွယ်ရေးရဲဘော်များ) ဘက်က မထိခိုက်ဘူး”ဟု ဒေသခံတစ်ဦးက ပြောသည်။
Public Service Announcement
” ဗန်းမောက် စစ်ဆေးရေးဂိတ်အား အင်းတော် PDFမှ ညနေ၂နာရီအချိန်တွေ ဝင်ရောက်တိုက်ခိုက်ခဲ့။ ဂိတ်စောင့် ရဲနှစ်ယောက်၊ မီးသတ်တစ်ယောက် ေသဆုံး၊ အများအပြား ဒဏ်ရရပြီး G3 နှစ်လက်၊ ခြောက်လုံးပြူးတစ်လက်၊ လက်ပစ်ဗုံးနှစ်လုံး၊ G3ကျည် တောင့်၇၇တောင့် ခြောက်လုံးပြူးကျည် ၆တောင်၊အိုင်ကွန်တစ်လုံး၊ ဖုန်းတစ်လုံး၊ လက်ထိတ်တစ်ခု သိမ်းဆည်း ရမိခဲ့ပါတယ်”ဟုအင်းတော် ပြည်သူ့ကာကွယ်ရေးတပ်၏ သတင်းထုတ်ပြန်ရေးစာမျက်နှာ Indaw Revolution -IRက ထုတ်ပြန်ထားသည်။
စစ်ဆေးရေးဂိတ်အနီးရှိ စက်သုံးဆီဆိုင် မီးလောင်ခဲ့ပြီး လူထိခိုက်မှုမရှိဟု ဒေသခံများကပြောသည်။
“ဗန်းမောက်တစ်မြို့လုံး အကုန်တံခါးပိတ်ပြီးနေနေရတယ်”ဟု ဗန်မောက်မြို့ဒေသခံတစ်ဦးက ပြောသည်။
အင်းတော် ပြည်သူ့ကာကွယ်ရေးတပ်သည် မိုင်းဆွဲတိုက်ခိုက်ရာတွင်လည်း နာမည်ကြီးပြီး ယခုအခါ အနီးပတ်ဝန်းကျင်မြို့အထိဝင်ပြီး စစ်ကောင်စီကို တိုက်ခိုက်ခြင်းဖြစ်သည်။
