စစ်ကိုင်းတိုင်း၊ စစ်ကိုင်းမြို့မှ အစီးရေ ၁၀၀ ကျော်ပါဝင်သော အကြမ်းဖက်စစ်ကောင်စီယာဥ်တန်းသည် ယနေ့နံနက်ပိုင်းက မုံရွာနယ်ဘက်သို့ ဦးတည်ထွက်ခွာလာကြောင်း ဒေသခံများက ပြောသည်။
ယနေ့ ဧပြီလ ၂၇ ရက်နေ့ နံနက် ၆နာရီ ၂၀ မိနစ် ဝန်းကျင်က စစ်ကိုင်းမြို့ တပ်မ၃၃အနီးတွင် မိုးကာအုပ်ထားသော စစ်တပ်ယာဉ် အစီးရေ ၅၀ကျော်ရပ်ထားသည်ကို တွေ့ရကြောင်း၊ ၆း၄၅ ခန့်တွင် မုံရွာ-မန္တလေးလမ်းအတိုင်း ထွက်ခွာသွားခဲ့ကြပြီး အုန်းတောလမ်းဆုံတွင် မုံရွာလမ်းအတိုင်း ဆက်လက်မောင်းနှင်သွားကြောင်း၊ စစ်ကားအကြီး၊ အသေး၊ အချုပ်ကား စသဖြင့် ပါဝင်ပြီး အလုံပိတ်ထားကာ စုစုပေါင်းအစီးရေ ၁၃၇စီးခန့်ရှိကြောင်း ဒေသခံများက ပြောသည်။
စစ်ကိုင်းမှ ထွက်ခွာလာသောကားများသည် စစ်ကိုင်းမြို့နယ်၊ ပျော့ရွာအနီး မိုင်းဆွဲခံရကြောင်း၊၂စီးတစ်စု ၊၃စီး တစ်စုဖြင့်မုံရွာမြို့သို့ ဦးတည်လာနေကြောင်း ဒေသတွင်းဇေယျာတိုင်းမ်စာမျက်နှာက အသိပေးသည်။
“မုံရွာ စစ်ကိုင်းလမ်း နေရာအတော်များများမှာလည်း အကြမ်းဖက်စကစတွေက ကင်းအနေထားနဲ့ ရှိနေတာတွေ့မြင်နေရပါတယ်။”ဟု ဇေယျာတိုင်းမ်စာမျက်နှာက ရေးသားထားသည်။
Public Service Announcement
စစ်ကောင်စီကားအများစုမှာရွက်ဖြင်သားဖြင့် အလုံပိတ်များဖြစ်ပြီး ကားနောက်ခန်းတွင် လူပါ၊မပါ မသိ့ရဘဲ ၊ နောက်ပေါက်ပွင့်နေသောကားအချို့တွင် စစ်ကောင်စီတပ်သား အနည်းငယ်သာပါသည်ကိုတွေ့ရသည်။
စစ်ကိုင်းတိုင်းအတွင်း သင်္ကြန်အပြီးကာလတွင် အကြမ်းဖက်စစ်ကောင်စီတပ်နှင့် ဒေသတွင်း PDFများအကြား ထိတွေ့တိုက်ပွဲဖြစ်စဥ်များ ပိုမိုဖြစ်ပွားလာခဲ့သည်။ မုံရွာမြို့ သည်စစ်ကောင်စီ တပ်၏ အနောက်မြောက်တိုင်းစစ်ဌာနချုပ်(နမခ) တည်ရှိရာမြို့ဖြစ်ပြီး ဒေသတွင်းစစ်ရေးလှုပ်ရှားမှုများကို နမခကို အခြေပြုလှုပ်ရှားလေ့ရှိသည်။
