●စစ်ကောင်စီတပ်ဖွဲ့ဝင်များ အရှင်ဖမ်းမိပြီး လက်နက်ခဲယမ်းများ ရရှိဟုဆို
ကရင်အမျိုးသားအစည်းအရုံး(KNU)တပ်မဟာ(၅)နယ်မြေ ဖာပွန်ခရိုင် ရှိ စစ်ကောင်စီတပ်စခန်းတစ်ခုကို ကရင်အမျိုးသားလွတ်မြောက်ရေးတပ်မတော်(KNLA) တပ်ဖွဲ့ဝင်များက ယနေ့ တိုက်ခိုက်သိမ်းပိုက်ခဲ့ကြောင်း KNU ဗဟိုမှ သတင်းရင်းမြစ်က ပြောသည်။
“ ဒီနေ့ သူတို့ တက်သိမ်းတာဟုတ်တယ်။ အတည်ပြုလို့ရပြီ။ ကျောက်ညှပ်စခန်းကတော့ ကျွန်တော်တို့ ဖာပွန်မြို့နယ်ပေါ့။ သံလွင်ကမ်းနားနဲ့တော့ သိပ်တော့မဝေးဘူး။နယ်စပ်ပေါ့” ဟု ၎င်းကဆက်ပြောသည်။
အဆိုပါ တပ်စခန်း တွင် အင်အား ၂၀ ပတ်ဝန်းကျင်သာရှိသည်ဟု သိရပြီး စစ်ကောင်စီတပ်မှ ထိခိုက်ကျဆုံး အခြေအနေ အသေးစိတ်ကို မသိရသေးကြောင်း KNU သတင်းရင်းမြစ်က ပြောသည်။
Public Service Announcement
“သူတို့က စခန်းတစ်ခုက လူသိပ်မများဘူးလေ။ ၂၀၊ ၃၀ အများဆုံးပဲ။ ကြားတာကတော့ ၆ယောက်တော့ အရှင်ဖမ်းမိတယ်လို့ ပြောတာပဲ။ ဒါပေမဲ့ မသေချာသေးဘူး။” ဟု ၎င်းက ပြောသည်။ လက်နက်ခဲယမ်းရရှိသည်ဟု သိရကြောင်းလည်း ၎င်းက ပြောသည်။
Salween Press၏ သတင်းဖော်ပြချက်တွင် ကျောက်ညှပ်စခန်း ကျပြီးနောက် သံလွင်မြစ်ရှိ မယ်နုထာ့ကျေးရွာကို စစ်ကောင်စီက လေယာဉ်ဖြင့် ဗုံးလာကြဲ၍ ဒေသခံအများအပြားထွက်ပြေးကြရသည်ဟု ဖော်ပြထားသည်။
KNU တပ်မဟာ(၅)အနေဖြင့် စစ်တပ်အာဏာသိမ်းပြီးနောက်ပိုင်း စစ်ကောင်စီတပ်စခန်းများကို တိုက်ခိုက် သိမ်းပိုက်ခြင်း၊ ခြုံခိုပစ်ခတ်တိုက်ခိုက်ခြင်း၊ စစ်ကောင်စီစစ်ကြောင်းများကို ကြားဖြတ်တိုက်ခိုက်ခြင်းများ ဆက်တိုက်ပြုလုပ်ခဲ့ရာ လစဉ် တိုက်ပွဲရာချီဖြစ်ပွားခဲ့သည်။ အဆိုပါ တိုက်ပွဲများ၌ စစ်ကောင်စီတပ်မှ သေဆုံးထိခိုက်မှုလည်းများပြားခဲ့သည်။
