ထားဝယ်ခရိုင် လောင်းလုံမြို့နယ်တွင် စစ်ကောင်စီအောက်စွဲ ပျူစောထီးအဖွဲ့က နေအိမ်အတွင်းဝင်ရောက်ပစ်ခတ်၍ ပြည်သူနှစ်ဦးသေဆုံးပြီး တစ်ဦးပြင်းထန်ဒဏ်ရာရရှိခဲ့ကြောင်း ဒီမိုကရေစီအရေးလှုပ်ရှားမှုသပိတ်ကော်မတီ(ထားဝယ်ခရိုင်)က ယနေ့(ဧပြီ ၂၉) ထုတ်ပြန် သည်။
ပျူစောထီးအဖွဲ့ဝင်များသည် ယမန်နေ့(ဧပြီ ၂၈)ည ၉ နာရီဝန်းကျင်က လောင်းလုံနယ် ပန္ဒလဲကျေးရွာအတွင်းဝင်ရောက်ကာ အပြစ်မဲ့ပြည်သူသုံးဦးကို နေအိမ်အတွင်း ဝင်ရောက်ပစ်ခတ်ခဲ့ခြင်းဖြစ်သည်။
နေအိမ်အတွင်း ဝင်ရောက်ပစ်ခတ်ခံရသော ပြည်သူသုံးဦးမှာ အသက်(၇၀)ခန့်ရှိ ဦးဖေသန်း၊ အသက် (၅၀) ဝန်းကျင်ရှိ ဦးကျော်ထွေးနှင့် ဦးဖေမွန်တို့ဖြစ်ကြပြီး ဦးဖေမွန်မှာ ဒဏ်ရာအပြင်း အထန်ရရှိကာ ကျန်နှစ်ဦးမှာ ပွဲချင်းပြီးသေဆုံးသွားကြောင်း ထုတ်ပြန်ချက်တွင် ဖော်ပြသည်။
“အခုလိုလုပ်ရပ်ဟာ တော်တော်ယုတ်မာအောက်တန်းကျတဲ့ လူမဆန်နဲ့လုပ်ရပ်ပဲ။ စစ်ကောင်စီကလည်း ဒါကို တရားဝင်ခွင့်ပြုပေးထားတာတင်မကဘဲ လက်နက်ပါတပ်ဆင်ပေးထားတယ်”ဟု ဒီမိုကရေစီအရေး လှုပ်ရှားမှုသပိတ်ကော်မတီ(ထားဝခရိုင်)မှ ဦးဆောင်ကော်မတီဝင်တစ်ဦးက ပြောသည်။
Public Service Announcement
ဒဏ်ရာအပြင်းအထန်ရရှိခဲ့သော ဦးဖေမွန်မှာ လက်ရှိတွင် ထားဝယ်ပြည်သူ့ဆေးရုံကြီး၌ အတွင်းလူနာအဖြစ် တက်ရောက်ကုသနေရကြောင်း သိရသည်။
