ကန်တော်ကျေးရွာမှ ဧပြီး ၂၉ ရက်တွင်မီးရှို့အကြမ်းဖက်ခဲ့သော အကြမ်းဖက်စစ်ကောင်စီတပ်များသည် ယနေ့( ဧပြီလ၃၀ )၊ နံနက် ၄ နာရီ အချိန်ကထီးဆောင်းမှမုံရွာဘက်သို့ အရပ်သားပြည်သူကား (၂) စီးအားအသုံးပြု၍ ထွက်ခွာလာရာ အလ္လကပ္ပကျေးရွာနှင့် ဝမ်းပြည့်ကျေးရွာအကြားတွင် BEDF-MMU မှ ပဒေသာမိုင်း (၃)လုံး၊ တစ်ဖက်ပွင့်စိန်ပြောင်း (၃) လုံးတို့ဖြင့် တိုက်ခိုက်ခဲ့သည်။ ထိုသို့တိုက်ခိုက်ရာ ကား(၂)စီးလုံး ထိထိမိမိ ထိမှန်ခဲ့ပြီး နောက်ဆုံးအစီးမှာ ဟန်ချက်ပျက်၍ ခေတ္တခဏ ထိုးရပ်သွားသောကြောင့် အကြမ်းဖက်စစ်ကောင်စီတပ်သား အများအပြား သေဆုံးနိုင်ပြီးအထိအခိုက်များနိုင်ကြောင်း မြင်းမူမြို့နယ် Black Eagle Defence Force -MMU ( မြင်းမူလင်းယုန်နက် ကာကွယ်ရေးအဖွဲ့)က ပြောသည်။
အဆိုပါစစ်ဆင်ရေးအား မြင်းမူမြို့နယ် Black Eagle Defence Force -MMU ( မြင်းမူလင်းယုန်နက် ကာကွယ်ရေးအဖွဲ့ ) မှ ဦးဆောင်ပြီး People’s Defence Force Myinmu – MMU PDF၊ Myinmu Civil Revolution Force-CRF(Myinmu)၊ မြင်းမူလျှပ်စီး ပျောက်ကြားတပ်ဖွဲ့ ၊မြောင်မြို့နယ် ပြည်သူ့ကာကွယ်ရေးနှင့် လုံခြုံရေးအဖွဲ့-CDSOM စသည့် မဟာမိတ်(၅)ဖွဲ့တို့က ပူးပေါင်းတိုက်ခိုက်ခဲ့ခြင်းဖြစ်သည်။မဟာမိတ်အဖွဲ့များမှ ရဲဘော်များ အထိအခိုက်မရှိ ပြန်လည်ဆုတ်ခွာနိုင်ခဲ့ကြောင်း မဟာမိတ်အဖွဲ့များက အသိပေးသည်။
ဧပြီ ၂၉ နံနက်ပိုင်းက မြင်းမူမြို့နယ်တွင် အကြမ်းဖက်စစ်တပ်နှင့် ဒေသတွင်းပြည်သူ့ကာကွယ်ရေးအဖွဲ့များ တိုက်ပွဲဖြစ်ပွားရာ စစ်ကောင်စီတပ်က အနီးနားရှိ ကန်တော်ကျေးရွာကိုအကြမ်းဖက် မီးရှို့ဖျက်ဆီးခဲ့၍ ပြည်သူ ၄ ဦးသေဆုံးခဲ့ပြီး အိမ်ပေါင်း ၆၀၀ ကျော်မီးလောင်ပျက်စီးသွားကြောင်း ဒေသခံများက ပြောသည်။ ဧပြီ ၂၉ ရက်တိုက်ပွဲတွင် စစ်ကောင်စီဘက်မှ ၃၀ဦးသေဆုံး ၂၀ကျော် အပြင်းအထန်ဒဏ်ရာရရှိခဲ့ကြောင်း၊မိမိတို့ အဖွဲ့၅ဖွဲ့ မှ ၁ဦး (ကိုရခိုင် – Zero မြင်းခြံပျောက်ကျား၂တပ်ဖွဲ့ ဒုခေါင်းဆောင်) ကျဆုံးခဲ့ပြီး ၂ ဦးဒဏ်ရာ ရရှိခဲ့ပြီး စခန်းအချို့ကို လက်လွှတ်ခဲ့ရကြောင်း GTR MMU အဖွဲ့က အသိပေးသည်။