အကြမ်းဖက်စစ်ကောင်စီသည် ရွေးကောက်ပွဲကျင်းပခြင်းဖြင့် ပြည်တွင်းနှင့် နိုင်ငံတကာသို့ လှည့်ဖြားရန် ကြိုးပမ်းမှုအဖြစ် ခရိုင်များကို တိုးချဲ့ဖွဲ့စည်းခြင်းဖြစ်ကြောင်း နိုင်ငံရေးလေ့လာသုံး သပ်သူများက ပြောသည်။
နိုင်ငံတဝန်း ယခင်က ၇၅ ခရိုင်ဖွဲ့စည်းထားရာ အကြမ်းဖက်စစ်ကောင်စီက ၄၆ ခရိုင် အသစ်ထပ်မံ ဖွဲ့စည်းလိုက်၍ စုစုပေါင်း ၁၂၁ ခရိုင် ရှိလာခဲ့ပြီး ယင်းလုပ်ဆောင်မှုသည် လာမည့် ရွေးကောက်ပွဲ၌ ကျယ်ကျယ်ပြန့်ပြန့်ကျင်းပကြောင်း လှည့်စားရန် ပြင်ဆင်မှုဖြစ်သည် စောင့်ကြည့်သူများကမှတ်ချက်ပြုသည်။
“ကိန်းဂဏန်းနဲ့ တိုင်းပြည်နဲ့ ကမ္ဘာကိုလှည့်စားဖို့လုပ်တာပေါ့။ အကြောင်းပြချက်ပေးဖို့ ပြင်ဆင်တာပေါ့။ ရွေးကောက်ပွဲ ကျယ်ကျယ်ပြန့်ပြန့်ဖြစ်တယ်လို့ ပြောဖို့အတွက် ကိန်းဂဏန်းဖန်တီး တာပေါ့။ ရွေးကောက်ပွဲကို နယ်မြေအများအပြားမှာ လုပ်နိုင်တယ်လို့ ပြောဖို့အတွက် ပြင်ဆင်မှု ပေါ့” ဟု လုံခြုံရေးအရ အမည်မဖော်လိုသူ လေ့လာသူတစ်ဦးက ပြောသည်။
အကြမ်းဖက်စစ်ကောင်စီသည် လူထုထောက်ခံမှုလုံး၀မရှိသည့် နိုင်ငံရေးပါတီများဖြင့် ရွေး ကောက်ပွဲကို ၂၀၂၃ နှစ်ကုန်ပိုင်းတွင် ကျင်းပရန်စီစဥ်နေသည်။ အဆိုပါ ရွေးကောက်ပွဲတွင် စစ်ကောင်စီသည် PR(အချိုးကျကိုယ်စားပြုစနစ်)ကျင့်သုံးရန် ကြိုးပမ်းနေသည်ကိုတွေ့ရသည်။
ပြီးခဲ့သည့် ၂၀၁၅ နှင့် ၂၀၂၀ အထွေထွေရွေးကောက်ပွဲများတွင် စစ်တပ်ကျောထောက်နောက်ခံ ပြု ပြည်ခိုင်ဖြိုးပါတီနှင့် စစ်တပ်လိုလားသော နိုင်ငံရေးပါတီများသည် အမျိုးသားဒီမိုကရေစီအဖွဲ့ ချုပ်ပါတီကို အပြတ်အသတ်ရှုံးနိမ့်ခဲ့သဖြင့် လက်ရှိ FPTP(နိုင်သူအကုန်ယူစနစ်)အစား PR စနစ် ဖြင့် အစားထိုးကျင့်သုံးရန် စစ်ကောင်စီက ကြိုးပမ်းနေခြင်းဖြစ်သည်။
သို့သော် မြန်မာပြည်သူများနှင့် တော်လှန်ရေးအင်အားစုများသည် စစ်အာဏာရှင်စနစ်နှင့် အာ ဏာရှင်စနစ်မှန်သမျှကို အမြစ်ပြတ်ဖယ်ရှားရန်လုပ်ဆောင်နေကြပြီး တရားမဝင် အာဏာသိမ်း စစ်ကောင်စီ၏ အယောင်ပြရွေးကောက်ပွဲကို စိတ်ဝင်စားခြင်းမရှိကြပေ။
အကြမ်းဖက်စစ်ကောင်စီသည် နေပြည်တော်နှင့် တိုင်းဒေသကြီးနှင့် ပြည်နယ် ၁၄ ခုစလုံးကို ခရိုင်များတိုးချဲ့ဖွဲ့စည်းခဲ့ပြီး ရန်ကုန်တိုင်းတွင် ၁၀ ခရိုင်၊ ရှမ်းပြည်နယ်တွင် ၉ ခရိုင် ဖြင့် အများဆုံး တိုးချဲ့ဖွဲ့စည်းခဲ့သည်။
နေပြည်တော်၌ ခရိုင် ၂ ခု တိုးချဲ့ဖွဲ့စည်းကာ အခြားသော တိုင်းနှင့် ပြည်နယ်များတွင် ၁ ခရိုင်၊ ၂ ခရိုင်၊ ၄ ခရိုင် စသဖြင့် တိုးချဲ့ဖွဲ့စည်းခဲ့သည်ကိုတွေ့ရသည်။
အာဏာသိမ်းပြီးနောက်ပိုင်း တိုင်းပြည်သည် အဖက်ဖက်တွင် အခြေအနေဆိုးရွားနေခဲ့သော် လည်း အကြမ်းဖက်စစ်ကောင်စီက နိုင်ငံရေး၊ အုပ်ချုပ်ရေး၊ စီးပွားရေး၊ လူမှုရေးစသည်တို့ တိုးတက်ပြောင်းလဲဖြစ်ပေါ်မှုအရ ယင်းသို့ ခရိုင်များတိုးချဲ့ခြင်းဖြစ်ကြောင်းနှင့် စုစုပေါင်း ၁၂၁ ခရိုင်ဖြင့် ဒေသဖွံ့ဖြိုးတိုးတက်ရေး၊ အုပ်ချုပ်ရေးဆိုင်ရာလုပ်ငန်းများ ပိုမိုအဆင်ပြေချောမွေ့စွာ ဆောင်ရွက် နိုင်မည်ဟု ဝါဒဖြန့်ထားသည်။
နိူင်ငံအာဏာလုယူပြီး ပြည်သူများကို အကြမ်းဖက်သတ်ဖြတ်၊ပြည်သူနေအိမ်များမီးရှို့ဖျက်ဆီးနေသောစစ်ကောင်စီသည် ပြည်သူများ၏ ပြင်းထန်သောခုခံတော်လှန်စစ်ရင်ဆိုင်နေရပြီး နိုင်ငံရေး ၊စစ်ရေး ၊စီးပွားရေး၊နိုင်ငံတကာသံတမန်ရေးရာ စသဖြင့် ကဏ္ဍပေါင်းစုံတွင် အကျပ်အတည်းတွေ့နေသည်။ နိုင်ငံတကာက တရားဝင်အစိုးရအဖြစ်အသိ့အမှတ်ပြုမှု ရရှိရန် နည်းပေါင်းစုံအသုံးပြု ကြံစည်နေသောစစ်ကောင်စီ၏ ၂၀၂၃ ရွေးကောက်ပွဲဆိုသည်မှာ စစ်ကောင်စီ ထွက်ပေါက်ရရန် အတွက်အယောင်ပြရွေးကောက်ပွဲသာဖြစ်မည်ဖြစ်ကြောင်း နိုင်ငံရေးသမားအချို့ကပြောသည်။
တော်လှန်ရေးအင်အားစုများက စစ်ကောင်စီကို အဆိုပါနိုင်ငံရေးထွက်ပေါက်ပေးမည်မဟုတ်ကြောင်းအတိအလင်းပြောကြားထားသည်။
ရှစ်လေးလုံးလူထုအရေးတော်ပုံနှင့်နွေဦးတော်လှန်ရေးတွင် ဦးဆောင်ပါဝင်သူများထဲမှတစ်ဦးဖြစ်ပြီး ပြီး၊ NUCC (အမျိုးသားညီညွတ်ရေးအတိုင်ပင်ခံကောင်စီ)၏အဖွဲ့ဝင် ဦးမင်းကိုနိုင်က People’s Spring နှင့် မတ်လတွင်ပြုလုပ်သောသီးသတ့်မေးမြန်းခန်းတွင်နွေဦးတော်လှန်ရေး၏ နိုင်ငံရေးဗျူဟာနှင့်ပတ်သပ်၍မေးမြန်းရာ “စစ်ကောင်စီရဲ့ ထွက်ပေါက်က ၂၀၀၈ အောက်က နောက်ရွေးကောက်ပွဲ အသစ်လေ။ နွေဦးတော်လှန်ရေးဗျူဟာက စစ်ကောင်စီ အသက်ဆက်ခွင့်ကို ကောင်းစွာဖျက်ဆီးနိုင်ပါတယ်။ သူတို့ အဲဒီနည်းနဲ့ အသက် ဆက်ခွင့်လုံး၀မရှိစေရ”ဟုပြောကြားထားသည်။