“ နန်းထိုက်အောင်စစ်ဆင်ရေး” အဖြစ် ကော့မှူးနှင့်သန်လျင်မြို့ရှိ စစ်ရေးပစ်မှတ်ကိုတိုက်ခိုက်ရာ ဗိုလ်ကြီးတစ်ဦးအပါအဝင်နှစ်ဦးသေ၊ နှစ်ဦးဒဏ်ရာရ

ရန်ကုန်တိုင်း၊ ကော့မှူးနှင့် သန်လျင်မြို့နယ်တို့တွင် “ နန်းထိုက်အောင်စစ်ဆင်ရေး” အနေဖြင့် စစ်ရေးပစ်မှတ် နှစ်နေရာကို တိုက်ခိုက်ရာ စစ်ကောင်စီတပ်မှ ဗိုလ်ကြီးတစ်ဦးအပါအဝင်နှစ်ဦးသေဆုံးပြီး နှစ်ဦးဒဏ်ရာရရှိသည်ဟု ရန်ကုန်တိုင်းစစ်ဒေသခွဲကွပ်ကဲရေးအဖွဲ့တာဝန်ရှိသူက အတည်ပြုသည်။

ယနေ့(မေ ၃ ရက်) ညနေ ၄ နာရီခန့်က ကော့မှူးမြို့နယ် မကျီးကန်-ကျိုက်ထော်လမ်းမပေါ်၊ ဌက်အော်စမ်းကျေးရွာအနီးတွင် နယ်မြေရှင်းလင်းမှုအတွက် ကင်းပတ်လာသော စစ်ကောင်စီတပ်ယာဉ်တန်းကို တောင်ပိုင်းခရိုင်ပြည်သူ့ကာကွယ်ရေးအထူးတပ်ဖွဲ့က ကြားဖြတ်တိုက်ခိုက်ခဲ့သည်။

ထိုဖြစ်စဥ်တွင် စစ်ကောင်စီတပ်မှ ဗိုလ်ကြီးတစ်ဦးအပါအဝင် နှစ်ဦးသေဆုံးပြီး နှစ်ဦးအပြင်းအထန်ဒဏ်ရာရရှိသွားကြောင်း ရန်ကုန်တိုင်းစစ်ဒေသခွဲကွပ်ကဲရေးအဖွဲ့က ဆိုသည်။

“ စခ DC ကားလေးကို ထိတာ ။နောက်ခန်းမှာထိုင်နေတဲ့သူ နှစ်ယောက်ပစ်လဲနေ တာတွေ့တယ်။ပြီးတော့ ခေါင်းခန်းကနေလဲ တစ်ယောက် သွေးတွေထွက်နေလို့ ဆွဲထုတ်ရတယ်” ဟု မျက်မြင်တွေ့ရှိသည့် ဒေသခံတစ်ဦးက ပြောသည်။

Public Service Announcement

ထို့အတူ သန်လျင်မြို့နယ် ပြည်တော်သာလမ်းအနီးရှိ ရဲလေ့ကျင့်ရေးသင်တန်းကျောင်းဝန်းကို မြို့နယ်ပြည်သူ့ကာကွယ်ရေးအဖွဲ့က ညနေ ၅ နာရီခန့်တွင် ဖောက်ခွဲတိုက်ခိုက်ခဲ့ရာ ထိချက်မှန်ပြီး ရဲလိုင်းခန်းသို့ကျရောက်ပေါက်ကွဲခဲ့သည်ဟု အသိပေးသည်။

အဆိုပါ တိုက်ခိုက်မှုကြောင့် ရန်သူအချို့ ဒဏ်ရာရရှိခဲ့ပြီး အသေအပျောက်ကို အတည်မပြုနိုင်သေးပေ။

ဧပြီ ၂၆ ရက် ည ၇နာရီခွဲခန့်ကလည်း “ နန်းထိုက်အောင်” စစ်ဆင်ရေးအစိတ်အပိုင်းအဖြစ် ရွှေပြည်သာမြို့နယ်၊ ဧရာဝတီပတ်လမ်းရှိ ယာဥ်ထိန်းရဲရုံးအတွင်းရှိ စစ်ကောင်စီတပ်သားများကို ရန်ကုန်မြို့ပြ ပြောက်ကျားတပ်ဖွဲ့ YUGA က တိုက်ခိုက်ခဲ့သည်။

ယာဥ်ထိန်ရဲရုံးအတွင်း လက်ပစ်ဗုံးနှစ်လုံးနှင့်အတူ သေနတ်ဖြင့် ၁၀ချက်ခန့် ပစ်ခတ်ကာ နောက်ချန်မိုင်းတစ်လုံးပါ ထပ်မံဖောက်ခွဲခဲ့သည်ဟု ဆိုသည်။

ဧပြီ ၈ရက်ကစတင်ခဲ့သော “ နန်းထိုက်အောင်” စစ်ဆင်ရေးအရ အကြမ်းဖက်စစ်တပ်နှင့် ၎င်း၏ ထောက်တိုင်များကို ပစ်မှတ်ထား၍ မင်္ဂလာဒုံ၊ အင်းစိန် ၊ ကမာရွတ်၊လမ်းမတော်၊ တွံ​တေး၊ သုံးခွ၊ ​ဒလနှင့် လှိုင်သာယာမြို့နယ်တို့တွင် ဆောင် ရွက်ထားသည်