စစ်ကိုင်းတိုင်း၊ ခင်ဦးမြို့နယ်တွင် အကြမ်းဖက်စစ်တပ် မီးရှို့ဖျက်ဆီးမှုကြောင့် အင်းပတ်ကျေးရွာရှိ နေအိမ် ၃၀ဝကျော် ပျက်စီးခဲ့ပြီး ဒေသခံပြည်သူတစ်ဦး သတ်ဖြတ်မီး့ခံခဲ့ရကြောင်း ဒေသတွင်း သတင်းရင်းမြစ်များက ပြောသည်။
အကြမ်းဖက်စစ်တပ်သည် အင်းပတ်ကျေးရွာအား မေလ ၁ ရက်နှင့် ၂ ရက်တွင် နှစ်ရက်ဆက် ဝင်ရောက်မီးရှို့ဖျက်ဆီးခဲ့ခြင်း ဖြစ်သည်။
သံချပ်ကာကား သုံးစီးနှင့် ရွာသစ်ကုန်းပျူစောထီးအင်အားပေါင်း ၁၀၀ခန့်က မီးရှို့ခဲ့ကြခြင်းဖြစ်ကြောင်း ဒေသခံများက ပြောသည်။
အကြမ်းဖက်စစ်တပ်သည် ကျေးရွာအစွန်ရှိ အသက် ၄၀ခန့်အရွယ် ကိုနိုင်ဦးဆိုသူအား ပစ်သတ်ပြီး ကြိုးတုပ်၍ မီးထဲထည့်ခဲ့သည်ဟု ဒေသခံတို့က ဆိုသည်။
Public Service Announcement
အင်းပတ်ရွာသည် အိမ်ခြေ၅၀၀ကျော်ရှိပြီး အကြမ်းဖက်စစ်တပ် မီးရှို့မှုကြောင့် နေအိမ်၃၀၅အိမ်၊ခိုင်းနွား ၁၀ကောင်၊ရေစုပ်စက်၊ စပါးမှုတ်စက်၊ထွန်စက်၂၀လုံး၊ ဆိုင်ကယ်စက်ဘီး ၄၀စီးနှင့် အိမ်တွင်း ပရိဘောဂများစွာ ဆုံးရှုံးခဲ့ရကြောင်း ခင်ဦးမြို့နယ်သတင်းမှန်ပြန်ကြားရေးက အသိပေးသည်။
“ဘာပစ္စည်းမှ မသယ်နိုင်ဘူး။ အခု နေစရာလည်းမရှိဘူး။ ကျွဲနွားတွေကလည်း ဒဏ်ရာရဆိုတော့ ကျွန်မတို့မှာ အခက်အခဲမျိုးစုံနဲ့ ရင်ဆိုင်ကြုံတွေ့နေရပါတယ်။”ဟု ဒေသခံ အမျိုးသမီးတစ်ဦးက ပြောသည်။
အကြမ်းဖက်စစ်တပ်သည် အင်းပတ်ကျေးရွာအား ငါးကြိမ်မြောက် မီးရှို့ဖျက်ဆီးခြင်းဖြစ်ပြီး ယခုနောက်ဆုံးအကြိမ်မီးမှာ ယနေ့ (မေလ၃ရက်) နံနက် ၁၁ နာရီအထိ ငြှိမ်းသတ်ခဲ့ရကြောင်း Khin U Support Organization (KSO) အဖွဲ့က ပြောသည်။
“ဆုံးရှုံးမှုသည် သိန်းထောင်ချီ ဖြစ်ပါတယ်။အင်းပတ်ကျေးရွာ တစ်ခုတည်းမှာတင် လူပေါင်း နှစ်ထောင်ခန့် စားစရာ၊ နေစရာအခက်အခဲဖြစ်နေပါတယ် ။ဒေသတွင်း အကူအညီတွေသာ ရရှိနေကြရတာဖြစ်ပြီး ပြည်သူလုထု တစ်ရပ်လုံးအနေဖြင့် လူသားချင်းစာနာ ထောက်ထားမှုများ မျှဝေပေးကြဖို့ မေတ္တာရပ်ခံတောင်းဆိုအပ်ပါတယ် ခင်ဗျာ။”ဟု Khin U Support Organization (KSO) အဖွဲ့က ပြောသည်။
အင်းပတ်ကျေးရွာကို မီးရှို့ခဲ့သော အကြမ်းဖက်စစ်တပ်သည် ယမန်နေ့ ညနေ ၃ နာရီခန့်တွင် ညောင်ပင်ကြီးစုရွာဘက်သွားရာလမ်း၌ မိုင်းမိခဲ့ပြီး ကားတစ်စီး မိုင်းထိခဲ့သည်။
ခင်ဦးနယ်ရှိ သရက်ကန်၊အင်တိုင်းလေး၊အင်းပတ်၊မူးသာ စသည့်ကျေးရွာလေးရွာမှ ဒေသခံ ပြည်သူ လေးထောင်ကျော်မှာ ထွက်ပြေးတိမ်းရှောင်နေရသည်။
အာဏာသိမ်းစစ်ကောင်စီတပ်က စစ်ကိုင်းနှင့် မကွေးတိုင်းရှိ ကျေးရွာများမှ ပြည်သူလူထုနေအိမ်များ အပါအဝင် နေရာပေါင်း ၄၀ကျော်ကို မီးရှို့ဖျက်ဆီးမှုများ အရှိန်မြှင့်လုပ်ဆောင်ခဲ့၍ နှစ်ပတ်အတွင်း အိမ်ခြေ ၂၂ ၃၀ လုံးထက်မနည်း မီးလောင်ပျက်စီးခဲ့ရကြောင်း Data for Myanmar က သတင်းထုတ်ပြန်ထားသည်။
၂၀၂၁ ဖေဖော်ဝါရီ ၁ရက်မှ ၂၀၂၂ ဧပြီ ၃၀ရက်အတွင်း စစ်ကောင်စီတပ်နှင့် လက်အောက်ခံ အဖွဲ့အစည်းများက နေရာပေါင်း ၂၉၆ နေရာမှ လူနေအိမ် ခန့်မှန်းခြေ ၁၁,၄၁၇ လုံးကို မီးရှို့ဖျက်ဆီးခဲ့သည်ဟု ဖော်ပြထားသည်။ Data for Myanmarက ဧပြီ ၁၃ရက်အထိ ထုတ်ပြန်ခဲ့သည့် စာရင်းမှာ နေရာပေါင်း ၂၅၄ နေရာမှ နေအိမ် ၉,၁၈၇လုံးကို စစ်ကောင်စီတပ်က မီးရှို့ခဲ့သည်ဟု ဖော်ပြခဲ့ရာ ယခုနှစ်ပတ်အတွင်း အိမ်ခြေ ၂ထောင်ကျော်ကို စစ်ကောင်စီတပ်က ထပ်မံမီးရှို့ခဲ့ခြင်းဖြစ်သည်။
