ကေအဲန်ယူ သထုံခရိုင် တပ်မဟာ ၁ နယ်မြေဖြစ်တဲ့ ဘီးလင်းမြို့နယ်အတွင်းမှာ စစ်ကောင်စီရဲ့ တပ်မ(၄၄)လက်အောက်ခံတပ်တွေက ဒေသခံပြည်သူတွေအပေါ် လူ့အခွင့်အရေးချိုးဖောက်မှုတွေ ကျူးလွန်လျက်ရှိနေတယ်လို့ ကေအဲန်ယူက သတင်းထုတ်ပြန်ထားပါတယ်။
ပြီးခဲ့တဲ့ မေ ၃ ရက် ညနေပိုင်းက စစ်ကောင်စီတပ်မ(၄၄) လက်အောက်ခံ ခလရ(၄၀၃) တပ်ဖွဲ့ဟာ ဘီးလင်းမြို့နယ် ဘီးလင်း-ဖာပွန်ကားလမ်းမပေါ်မှာရှိတဲ့ မဲပလီစခန်းကနေ နတ်ကြီးစခန်းဘက်ကို စစ်ကြောင်းထိုးလာပြီး အစူးချောင်းကျေးရွာအရောက်မှာ ဒေသခံရွာသူရွာသားတွေကို စုဝေးခေါ်ယူခဲ့တာပါ။
အဲ့ဒီလိုစုဝေးခေါ်ယူရာမှာ အသက် ၄၀ ကျော်အရွယ်ရှိတဲ့ အစူးချောင်းရွာသား တီးဖားကျော်ထူးကို စစ်ကောင်စီတပ်က ရိုက်နှက်နှိပ်စက်ကျူးလွန်ခဲ့တာကြောင့် အပြင်းအထန်ဒဏ်ရာရရှိသွားခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
“စစ်ကောင်စီစစ်သားတွေ ရွာရောက်တော့ ရွာမှာရှိတဲ့ လူတွေမှန်သမျှကို ခေါ်စုခိုင်းတယ်။ အရွယ်ကောင်းတဲ့ လူတွေက စစ်ကောင်စီလာတယ်ဆိုတာသိလို့ ကြိုပြီးတိမ်းရှောင်နေကြတယ်။ ရွာမှာ သက်ကြီးရွယ်အိုနဲ့ ကလေးတွေပဲကျန်တာ။ တီးဖားကျော်ထူးက ကျန်ခဲ့တဲ့လူကြီးတွေထဲမှာ အရွယ်ကောင်းတုန်းပေါ့၊ သူ့ကိုနှိပ်စက်သွားတာ ပြင်းပြင်းထန်ထန်ပဲ” လို့ ဒေသခံတစ်ဦးက ပြောပါတယ်။
Public Service Announcement
စစ်ကောင်စီရဲ့ ခလရ(၄၀၃) တပ်ဟာ မဲပလီစခန်းကနေ နတ်ကြီးစခန်းကို ခြေလျင်နဲ့တပ်ချိန်း ပြန်လာတဲ့တပ်ဖြစ်ပြီး အစူးချောင်းရွာဘေး တောစပ်မှာ စစ်ကောင်စီတပ်သား နှစ်ဦး မြေမြုပ်မိုင်းထိမှန်သွားခဲ့တယ်လို့ ကေအဲန်ယူက ဆိုထားပါတယ်။
အဲ့ဒီနောက် အစူးချောင်းကျေးနယ်အုပ်စု ဝါ့ကတယ်ကျေးရွာဖက်ကနေ နတ်ကြီးဖက်ကို စစ်ကြောင်းထိုးဆင်းသွားရာ ကရင်အမျိုးသားလွတ်မြောက်ရေးတပ်မတော် KNLA တပ်မဟာ ၁ က ကြားဖြတ်တိုက်ခိုက်ခဲ့ရာ စစ်ကောင်စီဘက်က အယောက် ၂၀ ခန့် ထိခိုက်သေဆုံးဒဏ်ရာရသွားခဲ့တယ်လို့ ထုတ်ပြန်ချက်မှာ ပါရှိပါတယ်။
ဒီလိုကြားဖြတ်တိုက်ခိုက်ခံရလို့ စစ်ကောင်စီဟာ ဝါ့ကတယ်ကျေးရွာဖက်ကို လက်နက်ကြီးနဲ့ ပြန်လည်ပစ်ခတ်ခဲ့ရာ ကျေးရွာအတွင်းက လူနေအိမ်တစ်လုံး ထိခိုက်ပျက်စီးခဲ့ပြီး ကျွဲနှစ်ကောင်နဲ့ ဆိတ်တစ်ကောင် သေဆုံးသွားခဲ့တယ်လို့ ကေအဲန်ယူက ဆိုထားပါတယ်။
ဒါ့အပြင် အစူးချောင်းရွာသားတစ်ဦး၊ ဝါ့ကတယ်ကျေးရွာအတွင်း ဗုံးခိုကျင်းတွေမှာ ပုန်းအောင်နေတဲ့ ရွာသားခုနှစ်ဦး၊ သွားလာနေတဲ့ ဒေသခံသုံးဦး စုစုပေါင်း ၁၁ ဦးကို စစ်ကောင်စီတပ်မ(၄၄) လက်အောက်ခံတပ်တွေက လူသားဒိုင်းအဖြစ် အဓမ္မဖမ်းဆီးခေါ်ဆောင်သွားခဲ့သေးတယ်လို့ ကေအဲန်ယူ-ဘီးလင်းမြို့နယ် သတင်းနဲ့ပြန်ကြားရေးဌာနခွဲထံကနေ သိရပါတယ်။
