စစ်ကောင်စီရဲ့ အနောက်ပိုင်းတိုင်းစစ်ဌာနချုပ်တိုင်းမှူးကို AA စစ်ဦးစီးချုပ် သတိပေး

AA စစ်ဦးစီးချုပ် ဗိုလ်ချုပ်ထွန်းမြတ်နိုင်က စစ်ကောင်စီရဲ့ အနောက်ပိုင်းတိုင်းစစ်ဌာနချုပ် တိုင်းမှူး အခြေစိုက်ရာ အမ်းမြို့ထိ တက်ပြီး တိုက်ခိုက်မယ်လို့ လူမှုကွန်ရက် တွစ်တာကနေ စစ်ကောင်စီတိုင်းမှူးကို သတိပေး ကြိမ်းဝါးလိုက်ပါတယ်။

စစ်ကောင်စီရဲ့အနောက်ပိုင်းတိုင်းစစ်ဌာနချုပ်တိုင်းမှူးဟာဗိုလ်ချုပ်ထင်လတ်ဦးဖြစ်ပါတယ်။

ဒီနေ့မနက်ပိုင်းက AA စစ်ဦးစီးချုပ် ဗိုလ်ချုပ် ထွန်းမြတ်နိုင်ရဲ့ တွစ်တာမှာ ” ကိုထင်လတ်ဦး သိပ်လျှောက်မလုပ်နဲ့ အာရုံနောက်နေပြီ ၊ငြိမ်းချမ်းရေး ဘာညာသောက်ဂရုစိုက်နေမှာမဟုတ်ဘူး၊ မင်းနေတဲ့နေရာအထိတက်ကြိတ်ပလိုက်မှာနော်” လို့ရေးသားထားတာတွေ့ရပါတယ်။

ဒီလိုကြိမ်းဝါးရတဲ့ အကြောင်းရင်းကိုတော့မသိရသေးပါဘူး။

Public Service Announcement

ဒါပေမယ့် စစ်ကောင်စီဟာ ရခိုင်ပြည်နယ်အတွင်းစစ်အင်အားတိုးချဲ့တာတွေရှိနေသလို AA နဲ့ဆက်နွယ်သူတွေကို ဖမ်းဆီးတာတွေကြောင့် AAစစ်ဦးစီးချုပ်က အခုလို သတိပေးလိုက်တာဖြစ်နိုင်တယ်လို့ သုံးသပ်တာတွေလည်းရှိနေပါတယ်။

အာဏာသိမ်း စစ်ကောင်စီခေါင်းဆောင်က သူကိုယ်တိုင် တိုင်းရင်းသားလက်နက်ကိုင်ခေါင်းဆောင်တွေနဲ့ တွေ့ဆုံလိုတယ်လို့ ဖိတ်ကြားထားတဲ့အချိန် မှာ AA စစ်ဦးစီးချုပ်က အခုလိုပြောလာတာလည်းဖြစ်ပါတယ်။

AA ဟာ နွေဦးတော်လှန်ရေးမှာ ပါဝင်တဲ့ တော်လှန်ရေးအဖွဲ့အစည်းအချို့ကို စစ်ပညာသင်ကြားပေးနေတာရှိပါတယ်။