အာဏာသိမ်း စစ်ကောင်စီခေါင်းဆောင် ဖိတ်ခေါ်ထားတဲ့ ငြိမ်းချမ်းရေးဆွေးနွေးပွဲတက်ဖို့ တရားဝင်ထုတ်ဖော်ပြောကြားလာတဲ့ စာရင်းတွေအရ တိုင်းရင်းသားလက်နက်ကိုင်အဖွဲ့ ၆ ဖွဲ့သာ ရှိနေသေးတယ်လို့ သိရပါတယ်။
ဒီစာရင်းဟာ တိုင်းရင်းသားလက်နက်ကိုင်အဖွဲ့တွေရဲ့ မီဒီယာကိုဖြေကြားထားချက်အရသိရတဲ့ စာရင်းဖြစ်ပါတယ်။
ဒါအပြင် ဆွေးနွေးပွဲ တက်မယ့် အဖွဲ့တွေ နောက်ဆုံးစာရင်းပေးသွင်းရမယ့် ရက်လို့ စစ်ကောင်စီဘက်က သတ်မှတ်ထားတဲ့ မေလ ၉ ရက်မတိုင်ခင် တစ်ရက်အလို စာရင်းလည်းဖြစ်ပါတယ်။
တက်မယ့်အဖွဲ့တွေဟာ အပစ်ရပ် လက်မှတ်ရေးထိုးထားတဲ့ ၁၀ ဖွဲ့ က ၅ ဖွဲ့ နဲ့ မိုင်းလားအဖွဲ့ NDAA တို့ဖြစ်ပါတယ်။
အပစ်ရပ်ထိုးထားတဲ့အဖွဲ့ ၁၀ ဖွဲ့ထဲကတက်မယ့် ၅ ဖွဲ့ဟာ ဒီမိုကရေစီအကျိုးပြုကရင်တပ်မတော်(DKBA) ၊ ပအိုဝ်းအမျိုးသားလွတ်မြောက်ရေးအဖွဲ့ချုပ်(PNLO)၊ မွန်ပြည်သစ်ပါတီ ( NMSP)၊ရခိုင်ပြည်လွတ်မြောက်ရေးပါတီ (ALP)၊ ကရင်ငြိမ်းချမ်းရေးကောင်စီ(KNU/KNLA -PC) တို့ဖြစ်ပါတယ်။
နောက်ထပ် ဆွေးနွေးပွဲတက်မယ့် မိုင်းလားအဖွဲ့ NDAA ဟာ အင်အားကြီးလက်နက်ကိုင်အဖွဲ့ ၇ ဖွဲ့ စုဖွဲ့ထားတဲ့ ပြည်ထောင်စု နိုင်ငံရေးဆွေးနွေးညှိနှိုင်းရေးကော်မတီ(FPNCC) အဖွဲ့ဝင်လည်းဖြစ်ပါတယ်။
ဒါပေမယ့် NDAA တက်ရောက်မှုဟာ FPNCC ကို ကိုယ်စားမပြုဘဲ တစ်ဖွဲ့ချင်းတက်ရောက်မှုသာဖြစ်တယ်လို့ NDAA က မီဒီယာကိုဖြေထားပါတယ်။
FPNCC မှာ ဝ UWSA က ဥက္ကဋ္ဌဖြစ်ပြီး ကချင်လွတ်မြောက်ရေးအဖွဲ့ (KIO) က ဒုတိယခေါင်းဆောင်အဖြစ် တာဝန်ယူကာ AA ၊ TNLA၊ MNDAA၊ NDAA၊ ရှမ်းပြည်တိုးတက်ရေးပါတီ(SSPP) တို့ပါဝင်ကြပါတယ်။
ဝ အဖွဲ့က ဆွေးနွေးပွဲတက် ၊မတက် ထုတ်ပြန်လာတာမရှိသေးပေမယ့် KIO ကတော့ စစ်ကောင်စီရဲ့ ဆွေးနွေးပွဲမှာ ပါဝင်သင့် ပါဝင်ထိုက်သူတွေမပါတာကြောင့် ဆွေးနွေးပွဲကို ပယ်ချထားပါတယ်။
FPNCC အဖွဲ့ဝင်AA ရဲ့ စစ်ဦးစီးချုပ်ကလည်း ရခိုင်ပြည်နယ်နဲ့ချင်းပြည်နယ်ကို စစ်ရေးတာဝန်ယူထားတဲ့ စစ်ကောင်စီရဲ့ အနောက်ပိုင်းတိုင်းစစ်ဌာနချုပ် တိုင်းမှူးကို တွစ်တာကနေ သတိပေးတာမျိုး ပြီးခဲ့တဲ့ရက်ပိုင်းကလုပ်ထားတာရှိပါတယ်။
စစ်ကောင်စီတပ်တွေနဲ့ အပြင်းအထန်တိုက်ပွဲတွေဖြစ်နေတဲ့ ကရင်နီအမျိုးသားပါတီ (KNPP ) နဲ့ ချင်းအမျိုးသားတပ်ဦး(CNF) တို့ကလည်း စစ်ကောင်စီရဲ့ဖိတ်ခေါ်ချက်ဟာပါဝင်သင့်ပါဝင်ထိုက်သူတွေမပါဝင်ဘဲ နိုင်ငံရေးပြဿနာတွေကို ဆွေးနွေးလိုတဲ့စစ်မှန်တဲ့ဆန္ဒကိုမတွေ့တာကြောင့် မတက်ရောက်ဖို့ ဆုံးဖြတ်ထားကြပါတယ်။
စစ်ကောင်စီရဲ့ငြိမ်းချမ်းရေးဖိတ်ခေါ်ချက်ဟာ မြေပြင်မှာ စစ်အင်အားတိုးချဲ့တိုက်ခိုက်မှုတွေ လုပ်နေတာကြောင့် မရိုးသားဘူးလို့ KNU တာဝန်ရှိသူတွေကဆိုထားပါတယ်။ ဒါအပြင် ငြိမ်းချမ်းရေးဆွေးနွေးမယ်ဆိုရင် စစ်ကောင်စီဟာ NUG နဲ့စကားပြောဖို့လိုတယ်လို့ လည်း KNU က သဘောထားပေးထားပါတယ်။
စစ်ကောင်စီခေါင်းဆောင်ဟာ ဒီနှစ်ကို ငြိမ်းချမ်းရေးနှစ်လို့ကြွေးကြော်ထားပြီး တိုင်းရင်းသားလက်နက်ကိုင်အဖွဲ့ တွေကို သူကိုယ်တိုင်တွေ့မယ်လို့ ကြေညာထားတာပါ။
ဒါပေမယ့် သူတွေ့ဆုံမယ့်အဖွဲ့တွေထဲမှာ နွေဦးတော်လှန်ရေးမှာပေါ်ပေါက်လာတဲ့တော်လှန်ရေးအင်အားစုတွေကိုအကြမ်းဖက်အဖြစ်သတ်မှတ်ပြီး ချန်လှပ်ထားတာပါ။
စစ်ကောင်စီရဲ့ပြောရေးဆိုခွင့်ရှိသူကတော့ ဆွေးနွေးပွဲတက်ဖို့ အသိပေးထားတဲ့အဖွဲ့ဟာ ဒါဇင်ကျော်တယ်လို့ ပြောထားတာရှိပါတယ်။