အင်းလေးဒေသတွင်စစ်ကောင်စီ၏ အဓိကဒေါက်တိုင်ဖြစ်သော ပြည်သူ့စစ်ခေါင်းဆောင်နှင့်သတင်းပေး သားမက်ဖြစ်သူကို မေလ ၉ ရက်တွင် သေနတ်ဖြင့် ပစ်ခတ်ရှင်းလင်းလိုက်ကြောင်းAssassin For Justice- AFJ ပြောက်ကျားအဖွဲ့ကထုတ်ပြန်သည်။
အင်လေးဒေသ ရွာမ ၊ကလေးငယ်ရပ်မှ ပြည်သူ့စစ်ခေါင်းဆောင် စည်ရုံးရေးမှူး ရဲမြင့် နှင့် ၎င်း၏သားမက်လည်းဖြစ် သတင်းပေးလည်းဖြစ်သော ကျော်စွာတို့ကို ဒေသတွင်းပြည်သူ့ကာကွယ်ရေးတပ်ဖွဲ့ဖြစ်သော Assassin For Justice- AFJက ညောင်ရွှေမြို့နယ်၊သန်းတောင်ဈေးတွင် မေလ ၉ ရက် နံနက်ကတစ်ပြိုင်နက်သေနတ်ဖြင့်ပစ်၍ ရှင်းလင်းလိုက်ခြင်းဖြစ်သည်ဖော်ပြထားသည်။
ရဲမြင့်နှင့်သူ၏သားမက်ကျော်စွာသည် စစ်ကောင်စီအလိုကျ ပြည်သူ့စစ်နှင့် ပျူစောထီးဖွဲ့စည်းခြင်း၊ သတင်းပေးခြင်းတို့ လုပ်ဆောင်နေပြီး စစ်ကောင်စီ၏ အဓိက ဒေါက်တိုင်ဖြစ်နေ၍ ယခုကဲ့သို့ ရှင်းလင်းလိုက်ခြင်းဖြစ်ကြောင်းလည်း AFJကအသိပေးသည်။
“ယနေ့မနက်တွင် G*n ဖြင့် သုံးချက်အား ဒလန်အားသုတ်သင်ရှင်းလင်းခဲ့၍ တစ်ချက်မှာ မိုးပေါ်ထောင်၍ပစ်ခဲ့ခြင်းသည် ပြည်သူလူထုအားလုံးဝခြိမ်းခြောက်ခြင်းမဟုတ်ဘဲ ပြေးလွှားရန်အခက်အခဲကြောင့် မဖြစ်မနေပစ်ဖောက်ခဲ့မိပါသည်။ ထို့ကြောင့်လဲပြည်သူလူထုများအား AFJ အဖွဲ့သားအားလုံးအနူးအညွတ်တောင်းပန်အပ်ပါသည်” ဟုထုတ်ပြန်ထားသည်။
Public Service Announcement
မေလ ၃ ရက်တွင်ပြုလုပ်သောအရှေ့ပိုင်းတိုင်းစစ်ဌာနချုပ်က ပြည်သူ့စစ်များကိုခေါ်၍ အစည်းအဝေးပြုလုပ်ရာ တက်ရောက်စဥ် ၎င်းတို့ကို ရှင်းလင်းရန်အခွင့်မသာ၍ မေ ၉ ရက်တွင်ရှင်းလင်းခြင်းဖြစ်ကြောင်းလည်း သိ့ရသည်။
“အင်းလေးမှာ ဒလန်အရှင်းခံရတာများတော့ အင်းလေးက PDFသတင်းတွေကို စောင့်ကြည့်ပြီး ရပခ ကိုသတင်းပို့ဖို့ခေါ်ပြောတာ” ဟု မေ ၃ ရက်အစည်းအဝေးနှင့်ပတ်သပ်၍ ဒေသခံတစ်ဦးကပြောသည်။အသတ်ခံရသူ နှစ်ဦးမှာ ပြည်သူစစ်ခေါင်းဆောင်နှင့် ဒလန်ဖြစ်ပြီး စစ်ကောင်စီအတွက်အလုပ်လုပ်ပေးနေကြသူများဖြစ်ကြောင်းဒေသခံတစ်ဦးကလည်းပြောသည်။
အင်းလေးဒေသနှင့်ဆက်စပ်နေသော ရွာငံဒေသတွင်လည်း စစ်ကောင်စီသတင်းပေး အကြီးစားဒလန်ဖြစ်သော ဦးတင်အိုဆိုသူကို ဓနုပြောက်ကျားတပ်ဖွဲ့(DGF)က မေလ ၄ရက်တွင် သုတ်သင်ရှင်းလင်းခံရသည်။
ရှမ်းပြည်နယ်တောင်ပိုင်းတွင် စစ်အာဏာရှင်အား လက်နက်ကိုင်တော်လှန်ရေးအရှိန်မြင့်လာနေပြီး စစ်ကောင်စီကလည်း အင်အားသုံး ဖိနှိပ်နေသည်။ သို့သော် ပြည်သူ့ကာကွယ်ရေးအဖွဲ့များကလည်း ယခင်ထက်ပိုအားကောင်းလာပြီး ပိုမိုလှုပ်ရှားလာကြောင်း ဒေသခံများက မှတ်ချက်ပြုကြသည်။
