စစ်ကိုင်းတိုင်း၊ မုံရွာမြို့ရှိ လမ်းပိုင်း၃ ခုအား ဖြတ်သန်းခွင့်ယာယီပိတ်သိမ်းထားကြောင်း ဒေသတွင်း Black Dragon Special Task Force အဖွဲ့က အသိပေးကြေညာသည်။
မုံရွာ-ဗောဓိတစ်ထောင်လမ်းပိုင်း၊ ကျောက္ကာ-ဗောဓိဖြတ် လမ်းပိုင်း၊ မုံရွာ-အရာတော် လမ်းပိုင်းများအား ယမန်နေ့ မေလ(၁၁)ရက်နေ့ နံနက်ပိုင်းမှစ၍ အရေးကြီးကိစ္စမရှိဘဲ သွားလာခြင်းမပြုကြရန် မဟာမိတ်အဖွဲ့များကိုယ်စား Black Dragon Special Task Force အဖွဲ့ကမေတ္တာရပ်ခံသည်။
မဖြစ်မနေအသုံးပြုမည်ဆိုပါက ပတ်ဝန်းကျင် အခြေအနေကို လေ့လာပြီးမှအသုံးပြုကြပါရန်နှင့် ထိုလမ်းများကိုအသုံးပြုသွားလာနေသည့် အိမ်စီးကားများ ကားမှန်မချပါက တိုက်ခိုက်မည်ဟု Black Dragon Special Task Forceက သတိပေးသည်။
အကြမ်းဖက်စစ်တပ်က ထိုအနီးတစ်ဝိုက်တွင် စစ်ကြောင်းထိုးနေပြီး အိမ်စီးကားအမျိူးမျိုးအသုံးပြုနေကြောင်း အရေးပေါ်ထုတ်ပြန်ကြေညာခြင်းဖြစ်သည်ဟုဆိုသည်။
Public Service Announcement
စစ်ကိုင်းတိုင်းအတွင်း တိုက်ပွဲများဖြစ်ပွားနေ၍ မုံရွာ၊ ချောင်းဦး၊ ယင်းမာပင်၊ ကနီ၊ တောင်တွင်းဒေသ၊ ကလေးဝ အစရှိသည့်ဒေသများ၌ လမ်းပိုင်းအချို့ ဖြတ်သန်းခွင့်ယာယီပိတ်ထားသည်။
ထိုအပြင် ပခုက္ကူ- ချောင်းဦးလမ်းပိုင်းအတွင်းသွားလာနေသော မော်တော်ယဥ်များအနေဖြင့် ခရီးသွားစဥ်တွင် မှန်တင်၍မောင်းနှင်ခြင်းများနှင့် မိုးကာများအားအုပ်၍ မောင်းနှင်ခြင်းများမပြုလုပ်ရန်N- YSO ပြောက်ကျားတပ်ဖွဲ့ကလည်းမေလ ၁၁ ရက်တွင်အသိပေးသည်။အကယ်၍ အသိပေးချက်ကိုလိုက်နာခြင်းမရှိဘဲမောင်းနှင်ပါက စစ်ကားများနှင့်မှားယွင်းနိုင်သည်ဖြစ်၍ အသက်အာမခံမည် မဟုတ်ကြောင်း အသိပေးအပ်ပါသည်ဟုဖော်ပြထားသည်။
