▪️နိုင်ငံအချို့မှ ထိပ်တန်းတာဝန်ရှိသူများနှင့် လူချင်းတွေ့ဆုံဆွေးနွေးမည်ဟုဆို
အမျိုးသားညီညွတ်ရေးအစိုးရ(NUG) နိုင်ငံခြားရေးဝန်ကြီး ဒေါ်ဇင်မာအောင်သည် အမေရိကန်-အာဆီယံထိပ်သီးဆွေးနွေးပွဲတက်ရောက်လာသည့် နိုင်ငံအချို့နှင့်တွေ့ဆုံဆွေးနွေးရန် ဝါရှင်တန်သို့ရောက်ရှိနေကြောင်း အစိုးရအဖွဲ့သတင်းပြန်ကြားရေးတာဝန်ရှိသူတစ်ဦးက ပြောသည်။
အမေရိကန်သမ္မတဂျိုးဘိုင်ဒင် ဧည့်ခံဆွေးနွေးမည့် အမေရိကန်-အာဆီယံထိပ်သီးဆွေးနွေးပွဲ တက်ရောက်ရန် အာဆီယံခေါင်းဆောင်များသည် ဝါရှင်တန်သို့ရောက်ရှိနေကြပြီး NUGနိုင်ငံခြား ရေးဝန်ကြီးက ဒေသတွင်းနိုင်ငံအချို့ထိပ်တန်းတာဝန်ရှိသူများနှင့် လူချင်းတွေ့ဆုံဆွေးနွေးရန် ရှိနေသည်။
“Side meeting အချို့တက်ဖို့ရှိပေမယ့် အချို့နိုင်ငံတွေက သူတို့နဲ့ တွေ့ဖို့ကို သတင်းထုတ်ပြန်ခွင့်ပြု မပြုက မသေချာဘူး ဖြစ်နေတယ်”ဟု NUG အစိုးရအဖွဲ့ သတင်းပြန်ကြားရေးတာဝန်ရှိသူ တစ်ဦးက ပြောသည်။
Public Service Announcement
အမေရိကန်-အာဆီယံထိပ်သီးဆွေးနွေးပွဲတွင် မြန်မာ့အရေးကို ဆွေးနွေးပွဲအစီအစဉ်တစ်ရပ် အဖြစ်ထည့်သွင်းဆွေးနွေးမည်ဟု အမေရိကန်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူက ထုတ်ဖော်ပြောကြားထားသည်။
သို့သော် အဆိုပါ ထိပ်သီးဆွေးနွေးပွဲသို့ အကြမ်းဖက်စစ်ကောင်စီခေါင်းဆောင် မင်းအောင်လှိုင်ကို ဖိတ်ကြားခြင်းမရှိဘဲ အာဆီယံ၏ ထုံးတမ်းအတိုင်း နိုင်ငံရေးနှင့်မပတ်သက်သူကိုယ်စားလှယ် (non-political representative)ကိုသာ ဖိတ်ကြားထားသည်ဟု အမေရိကန်က ဆိုသည်။
ထိပ်သီးဆွေးနွေးပွဲမတိုင်မီ မလေးရှားနိုင်ငံခြားရေးဝန်ကြီးက အာဆီယံအနေဖြင့် မြန်မာပြည်သူများရွေးချယ်တင်မြှောက်ထားသည့် အမျိုးသားညီညွတ်ရေးအစိုးရ NUG နှင့် အလွတ်သဘော တွေ့ဆုံဆွေးနွေးသင့်ကြောင်း အဆိုပြုထားသည်။
မလေးရှားနိုင်ငံခြားရေးဝန်ကြီးကိုယ်တိုင်လည်း ပြီးခဲ့သည့်ဧပြီတွင် အမျိုးသားညီညွတ်ရေးအစိုးရ (NUG) နိုင်ငံခြားရေးဝန်ကြီး ဒေါ်ဇင်မာအောင်၊ အမျိုးသားညီညွတ်ရေးအတိုင်ပင်ခံကောင်စီ (NUCC)ထိပ်တန်းတာဝန်ရှိသူများနှင့် အွန်လိုင်းမှတွေ့ဆုံဆွေးနွေးခဲ့သည်။
