ရှမ်းပြည်နယ်တောင်ပိုင်း ရွာငံဒေသတွင် စစ်ကောင်စီက သုံးလအတွင်း အပြစ်မဲ့ပြည်သူ ၁၀ဦးကို နှိပ်စက်သတ်ဖြတ်ခဲ့ပြီး ကျေးရွာလေးရွာမှ ဒေသခံ ၈၀၀ကျော်သည် နေရပ်စွန့်ခွာထွက်ပြေး တိမ်းရှောင်နေရသည်ဟု ရှမ်းလူ့အခွင့်အရေးမဏ္ဍိုင်က ထုတ်ပြန်သည်။
ရှမ်းလူ့အခွင့်အရေးမဏ္ဍိုင်က စစ်တမ်းကောက်ယူထားသည့် ရွာငံဒေသလူ့အခွင့်အရေးချိုးဖေါက်မှုမှတ်တမ်းကို မေလ၁၁ရက်တွင် သတင်းထုတ်ပြန်ခြင်းဖြစ်သည်။
ရွာငံမြို့နယ်အတွင်း ၂၀၂၂ ဖေဖော်၀ါရီမှဧပြီအထိ သုံးလအတွင်း စစ်ကောင်စီတပ်သားများသည် တရားလက်လွတ်သတ်ဖြတ်မှု၊ မတရားဖမ်းဆီးမှု၊ လုယက်မှု ၊အိမ်မီးရှို့ဖျက်ဆီးမှုများ ကျူးလွန်ခဲ့သည်ဟု ရှမ်းလူ့အခွင့်အရေးမဏ္ဍိုင်က မှတ်တမ်းပြုစုထားသည်။
စစ်ကောင်စီက အရပ်သား ၁၀ဦးကို သတ်ဖြတ်ခဲ့ရာတွင် တစ်ဦးကိုလမ်းတွင် ပစ်ခတ်သတ်ဖြတ်ခဲ့ပြီး ကိုးဦးကို PDFဟု စွပ်စွဲကာ အစုလိုက်အပြုံလိုက်သတ်ဖြတ်ခဲ့ခြင်းဟု ဆိုသည်။
Public Service Announcement
အရပ်သား ကိုးဦး အစုလိုက်အပြုံလိုက်အသတ်ခံခဲ့ရသည့် ဖြစ်စဥ်မှာ ရွာငံမြို့နယ် ပဲရင်းတောင်ကျေးရွာတွင်ဧပြီ ၁၉ ရက်က ဖြစ်ခဲ့သည်။ စစ်ကောင်စီတပ်ဖွဲ့နှင့် ပြည့်သူ့ကာကွယ်ရေးတပ်ဖွဲ့ (PDF)၀င်များ တိုက်ပွဲဖြစ်နေ၍ တောထဲတွင်ပုန်းရှောင်နေသော ပဲရင်းတောင်ကျေးရွာမှ အမျိုးသား ကိုဦးကို စစ်ကောင်စီတပ်သားများက ဖမ်းဆီးသတ်ဖြတ်ခြင်းဟု ထုတ်ပြန်ချက်ပါရှိသည်။
” စစ်ကောင်စီတပ်သားများသည် ရွာသားများ၏ လက်နှင့် ၀မ်းဗိုက်တို့ကို ဓားဖြင့်မွန်းကာနှိပ်စက်ခဲ့ပြီး နောက် ပစ်သတ်ကာ ပဲရင်းတောင်ကျေးရွာ အနောက်ဘက်ရှိကွင်းပြင်ထဲတွင် ၄င်းတို့၏ရုပ်အလောင်းကို ကားတာယာများဖြင့်မီးပုံရှို့ခဲ့ကြသည်”ဟု ရှမ်းလူ့အခွင့်အရေးမဏ္ဍိုင်က ဖော်ပြထားသည်။
စစ်ကောင်စီက ဒေသခံများပိုင်ဆိုင်သည့်နေအိမ် ခုနှစ်လုံးကို မီးရှို့ဖျက်ဆီးခဲ့သလို အကြမ်းဖက်မှုဖြစ်စဥ်များကြောင့် နွားဘန်းကြီး၊ လွှစင်၊ လယ်ကိုင်းနှင့်ပဲရင်းတောင် ကျေးရွာ များမှ ဒေသခံပြည်သူရှစ်ရာကျော်သည် နေအိမ်များကိုစွန့်ခွာကာ ကျေးရွာအနီးရှိ တောတောင်များအတွင်းရှောင်တိမ်းနေထိုင်နေရသည်ဟု လတ်တလောအခြေအနေကို အသိပေးထားသည်။
ထို့အပြင် အရပ်သား ၂၅ဦးလည်း ဖမ်းဆီးခံထားရပြီး ၂၄ဦးသည် မည်သည့်နေရာတွင် ထိန်းသိမ်းခံထားရသည်ကို မသိသလို မိသားစုနှင့်အဆက်အသွယ်မရသေးဟု ဆိုသည်။
ရွာငံဒေသတွင် အရပ်သားများအား ဖိနှိပ်သတ်ဖြတ်ပြီး လူ့အခွင့်အရေးချိုးဖောက်မှုများ ကျုးလွန်နေသည့် စစ်ကောင်စီတပ်များမှာ အရှေ့ပိုင်းတိုင်းစစ်ဌာနချုပ်လက်အောက်ခံ ကလောအခြေစိုက် ခမရ(၁၁၂)နှင့် (၁၁၅) ၊ ရပ်စောက်အခြေစိုက် ခမရ (၅၀၈) နှင့် (၅၀၉) တို့ ဖြစ်သည်ဟု မှတ်တမ်းတင်ထားသည်။
