ဒဏ်ရာရစစ်သားများကို ပုခက်ဖြင့်ထမ်း၍​ခြေကျင်လာ​သောစစ်​ကြောင်း ထပ်မံမိုင်းခွဲဆွဲခံရပြီး​သေဆုံးထိခိုက်မှုများ

စစ်ကိုင်းတိုင်း၊ ချောင်းဦးမြို့နယ်တွင် ဒဏ်ရာရသူများအား ပုခက်ဖြင့်ထမ်းသယ်လာရသည့် စစ်​ကောင်စီတပ်၏ခြေလျင်စစ်ကြောင်အားမိုင်းဆွဲတိုက်ခိုက်ခဲ့ရာသေဆုံထိခိုက်မှုများရှိကြောင်း ချောင်းဦးမြို့နယ်ပြည်သူ့ကာကွယ်ရေးတပ်ဖွဲ့က ပြောသည်။

မေလ ၁၅ ရက်နေ့က ချောင်းဦးမြို့နယ်ရှိ ပျူစောထီးကြီးစိုးရာရွာဖြစ်သော ကံဇီးရွာမှ ချောင်းဦးမြို့သို့ တောလမ်းအတိုင်း ထွက်ခွာလာသော အကြမ်းဖက်စစ်ကောင်စီတပ်နှင့် ပျူစောထီးများကိုမိုင်းဆွဲတိုက်ခိုက်ခဲ့ခြင်းဖြစ်သည်။

နေရာ ၃ နေရာမှ စောင့်ကြိုကာ မိုင်းဆွဲတိုက်ခိုက်ခဲ့ခြင်းဖြစ်ပြီး ချောင်းဦးမြို့ပေါ်မှ နာရေးကူညီမှုယာဥ်၊ အိမ်စီးကားများပါ ခေါ်ယူ၍ သေဆုံးထိခိုက်သူများအား သယ်ဆောင်သွားကြောင်း၊ သေဆုံးထိခိုက်သူအရေအတွက် မသိရသေးဟု ချောင်းဦးPDFအဖွဲ့က ပြောသည်။

“ချောင်းဦးမြို့နယ်ထဲ ပတ်ထိုးနေတဲ့စစ်ကြောင်းပါ။ အဲဒီစစ်ကြောင်းက ၁၅ ရက်မနက်စောစော ကံကြီးကုန်းပျူစောထီးရွာကနေ ‌ကံဇီးပျူစောထီးရွာကိုရောက်ပါတယ်။ ကံဇီးကနေချောင်းဦးကိုဆက်ထွက်တာပါ။ မိုင်းကြောက်တော့လမ်းကမသွားဘဲ လယ်ကွက်တွေထဲကနေ တောလမ်းအတိုင်းခြေလျင်သွားတာပါ။ ဒဏ်ရာရထားလို့ စောင်ပုခက်နဲ့သယ်လာရတဲ့ အထမ်းသမားတွေလည်း ပါတယ်။ အဲဒီစစ်ကြောင်းကို ၃ နေရာကနေ မိုင်းဆွဲတိုက်တာပါ။”ဟု ချောင်းဦး PDF တာဝန်ရှိသူက ​ပြောသည်။

Public Service Announcement

တိုက်ခိုက်ခံရသော စစ်ကြောင်းသည် မေလ ၁၄ ရက်နေ့က ချောင်းဦးမြို့နယ်၊ ဆီပန်းကန်ရွာသို့ ဝင်ရောက်မီးရှို့ရာ ဒေသခံကာကွယ်ရေးတပ်များ၏ တိုက်ခိုက်မှုကိုခံရပြီး ထိခိုက်သေဆုံးမှုများရှိခဲ့သည်။

အဆိုပါဖြစ်စဥ်အား ချောင်းဦးမြို့နယ် ပြည်သူ့ကာကွယ်ရေးတပ်ဖွဲ့ CHUPDF တပ်ခွဲ-၃နှင့် တပ်ခွဲ-၄(မိုင်းတပ်ခွဲ)မှ ရဲဘော်များက တိုက်ခိုက်ခဲ့ခြင်းဖြစ်သည်။

မေလ ၁၃ ရက် နံနက် ၅နာရီအချိန်က ချောင်းဦးမြို့နယ်၊ ကံကြီးကုန်းရွာမှ ပျူစောထီးများနှင့်ကံကြီးကုန်းရွာသို့အင်အားဖြည့်ရောက်ရှိနေသော အကြမ်းဖက်စစ်တပ်သည် ချောင်းဦး မြို့နယ် ရွှေလှေရွာသို့ လက်နက်ကြီးများဖြင့် ပစ်ခတ်ကာ ဝင်ရောက် မီးရှို့ဖျက်ဆီးခဲ့သေးသည်။