အင်အား ၉၅ ဦး ရှိသည့် စစ်ကောင်စီတပ်စစ်ကြောင်း ကို စစ်ကိုင်းတိုင်း ၊ ထီးချိုင့်မြို့နယ် ပေကုန်း နှင့် အင်ဒေါင်းရွာကြားတွင် မိုင်းဆွဲတိုက်ခိုက်ခဲ့ရာ ၁၀ ဦးခန့်သေဆုံးနိုင်ကြောင်း Special.9-HPDF က ထုတ်ပြန်သည်။
ယနေ့(မေ ၁၈ ရက်)နံနက်အစောပိုင်းတွင် မိုင်းဆွဲတိုက်ခိုက်ခဲ့ခြင်းဖြစ်ပြီး သတင်းအချက်အလက် မှန်ကန်စွာရရှိပြီး တိကျစွာဆောင်ရွက်နိုင်ခဲ့သည့် စစ်ဆင်ရေးတစ်ခုဖြစ်ကြောင်း Special 9-HPDFမှ တာဝန်ရှိသူကပြောသည်။
“အင်ဒေါင်းကြက်တကောင် ကို တက်လာပြီ ဆိုတာနဲ့ စောင့်ကြည့်ခဲ့တယ်။ပြီးတော့ အဲဒီလမ်းမှာ ရန်သူက မဖြစ်မနေ ဖြတ်ရမယ့် ကွန်ကရစ် တံတား ရှိတယ်။အတိအကျဆို ပေကုန်းနှင့် အင်ဒေါင်းကြား ချောင်းကူး တံတား။အခု ရေကလည်း ကြီးနေတာလေ။သူတို့ဖြတ်လာတဲ့အချိန်ကိုက် ကို မိုင်းဆွဲနိုင်ခဲ့တယ်”ဟု ၎င်းက People’s Spring သို့ ပြောသည်။
စစ်ကောင်စီတပ်သေဆုံး ဒဏ်ရာရရှိမှုနှင့်ပတ်သပ်၍ People’s Springကသီးခြားအတည်မပြုနိုင်ပါ။
Public Service Announcement
တိုက်ခိုက်မှုကို Special.9-HPDFနှင့် ဒေသတွင်းပကဖ (ပြည်သူ့ကာကွယ်ရေးအဖွဲ့)တို့ပူးပေါင်း၍ မိုင်းသုံးလုံးဖြင့်ဖောက်ခွဲတိုက်ခိုက်ခဲ့ခြင်းဖြစ်သည်ဟု သိရသည်။
မိုင်းဆွဲတိုက်ခိုက်ခဲ့သည့် ဗီဒီယိုဖိုင်မှတ်တမ်း ရှိသော်လည်း စစ်ကောင်စီ၏ အင်တာနက်လိုင်းဖြတ် တောက်ခံရမှုကြောင့် မကြာမီထုတ်ပြန်နိုင်ရန် ကြိုးပမ်းနေကြောင်းလည်း အသိ ပေးသည်။
မေလ ၂ ရက်နေ့ကလည်း ထီးချိုင့်မြို့နယ် ညောင်ပင်စုနှင့် ကိုးတဲ ရွာကြားတွင် စစ်ကောင်စီတပ်ကို မိုင်းဆွဲခဲ့ရာ သေဆုံးထိခိုက်ဒဏ်ရာရရှိသူ အများအ ပြားရှိခဲ့သည်ဟု ဒေသတွင်းတပ်ဖွဲ့များက ထုတ်ပြန်ထားသည်။
