▪️ဘုန်းကြီးကျောင်းတစ်ကျောင်းထိမှန်ကာ ကိုရင်များအပါအဝင် ခုနစ်ဦးထိခိုက်ပြီး တစ်ဦးသေဆုံး
စစ်ကိုင်းတိုင်း၊ ကသာမြို့နယ်တွင် ဧရာဝတီမြစ်ကြောင်းတစ်လျှောက် ကျေးရွာများအား စစ်ကောင်စီတပ်က လက်နက်ကြီးဖြင့် ပစ်ခတ်ခဲ့၍ ဘုန်းကြီးကျောင်းတစ်ကျောင်းထိမှန်ကာ ကိုရင်များအပါအဝင် ခုနစ်ဦးထိခိုက်ခဲ့ပြီး တစ်ဦးသေဆုံးကြောင်း ဒေသခံများက ပြောသည်။
ယမန်နေ့(မေလ ၁၉ ရက်) နံနက်ပိုင်းက ထီးချိုင့်မြို့နယ်မှ တက်လာသော စစ်ကောင်စီတပ်သည် ကသာမြို့နယ်ရှိ ပေလမ်းရွာ၊ အင်းရွာနှင့် သပြေသာကျေးရွာတို့ကို လက်နက်ကြီးဖြင့် ပစ်ခတ်ခဲ့သည်။
ထိုသို့ ပစ်ခတ်မှုကြောင့် ကသာမြို့နယ် ပေလမ်းရွာရှိဘုန်းကြီးကျောင်း ထိမှန်ပြီး ကိုရင် လေးပါး၊အမျိုးသမီး နှစ် ဦး၊ အမျိုးသား တစ်ဦး စုစုပေါင်း ခုနစ်ဦးထိခိုက်ဒဏ်ရာရရှိခဲ့ကြောင်း၊ အမျိုးသမီးနှစ်ဦးအနက် တစ်ဦးမှာ ဒဏ်ရာပြင်းထန်သဖြင့် ငါးအိုးဆေးရုံမှ ရွှေကူဆေးရုံသို့ ထပ်မံလွှဲပြောင်းရာ လမ်း၌ သေဆုံးခဲ့ရကြောင်း ကသာ(ပကဖ)က ပြောသည်။
Public Service Announcement
အကြမ်းဖက်စစ်တပ်သည် ကသာမြို့နယ်၊ အင်းကျေးရွာ အလယ်ရပ်အား မီးရှို့ဖျက်ဆီးခဲ့သည်။
“အင်းကျေးရွာ ပြည်သူများရဲ့ နေအိမ်များအား အကြောင်းမဲ့ မီးရှို့ဖျက်ဆီးသွားခဲ့ပါတယ်။မီးရှို့ခံ အိမ်ခြေအရေအတွက်များနိူင်ပါတယ်။ သပြေသာရွာကို ပစ်ခဲ့တဲ့ လက်နက်ကြီးကြောင့်လည်း အိမ်တစ်လုံး ပျက်စီးခဲ့ပါတယ်။”ဟု ကသာ(ပဖက)အဖွဲ့က ပြောသည်။
အင်းရွာသည် ရွာငယ်လေးငါးရွာခန့် စုပေါင်းထားသည့်ရွာကြီးတစ်ရွာဖြစ်ပြီး ရွာလယ်ပိုင်းကို မီးရှို့ဖျက်ဆီးခံခဲ့ရခြင်းဖြစ်ကြောင်း၊ ပြည်သူများထွက်ပြေးတိမ်းရှောင်နေရ၍ မီးလောင်အိမ်ခြေ အတိအကျမသိရသေးကြောင်း ဒေသခံများက ပြောသည်။
ထိုစစ်ကြောင်းအား ကြက်တစ်ကောင်နှင့် သပြေသာကြားတွင် ကသာခရိုင်PDF တပ်ရင်း (၃)၊ကသာ၊ထီးချိုင့် (ပကဖ)များမှ တိုက်ခိုက်ခဲ့ကြောင်း ၎င်းတို့က ပြော သည်။
ထို့အပြင် ကြက်တစ်ကောင်မှ ထွက်လာမည့် သင်္ဘောသုံးစင်းအားကာကွယ်ရန် ဧရာဝတီမြစ်ကြောင်းတစ်လျှောက်ရှိကျေးရွာများကို အကြမ်းဖက်ဖျက်ဆီးနေခြင်းဖြစ်ကြောင်း ကသာ(ပဖက)အဖွဲ့က ခန့်မှန်းပြောကြား သည်။ ထို့ကြောင့် မြစ်ကြောင်းတစ်လျှောက်ကျေးရွာများ သတိထားကြရန် ကသာ(ပကဖ)အဖွဲ့က သတိပေးသည်။
